സതീശന്റെ ശ്രമം അപവാദം പ്രചരിപ്പിച്ച കോൺ​ഗ്രസുകാരെ രക്ഷിക്കാൻ: കെ എൻ ഉണ്ണികൃഷ്ണൻ

കൊച്ചി: അപവാദ പ്രചാരണം കോൺ​ഗ്രസ് പ്രവർത്തകരെ രക്ഷിക്കാനാണ് പ്രതിപക്ഷനേതാവ് വി ഡി സതീശൻ ശ്രമിക്കുന്നതെന്ന് വൈപ്പിൻ എംഎൽഎ കെ എൻ ഉണ്ണികൃഷ്ണൻ. തനിക്കെതിരെ അടിസ്ഥാനമില്ലാത്തതും വ്യാജവുമായ പ്രചാരണത്തിന് ആദ്യം തുടക്കമിട്ടത് വൈപ്പിനിലെ പ്രാദേശിക കോൺ​ഗ്രസ് പ്രവർത്തകനാണ്. പിന്നീട് തന്റെ പേരും ചിത്രങ്ങളും വെച്ച് സോഷ്യൽമീഡിയയിൽ പ്രചരിച്ചപ്പോൾ, രാഷ്ട്രീയജീവിതം കളങ്കപ്പെടുത്താനുള്ള ആസൂത്രിത ശ്രമമാണെന്ന് മനസിലായി. എന്നാൽ അപവാദം പ്രചരിപ്പിക്കുന്ന കോൺ​ഗ്രസുകാരെ തിരുത്താൻ പ്രതിപക്ഷനേതാവ് തയ്യാറായിട്ടില്ല. ഇതിന് പിന്നിലുള്ള കോൺ​ഗ്രസ് പ്രവർത്തകരെയും, എത്തിച്ചേര്‍ന്ന ജീർണിച്ച സംസ്കാരത്തിൽനിന്ന് കോൺ​ഗ്രസിനെയും രക്ഷിക്കാനുള്ള പാഴ്ശ്രമമാണ് പ്രതിപക്ഷ നേതാവ് നടത്തുന്നതെന്നും കെ എൻ ഉണ്ണികൃഷ്ണൻ പറഞ്ഞു.

ഇത്തരത്തിൽ വ്യാജവും മ്ലേച്ഛവുമായ പ്രചാരണം കോൺ​ഗ്രസുകാർ നടത്തുമ്പോൾ പ്രതിപക്ഷനേതാവ് നിരുത്സാഹപ്പെടുത്തേണ്ടതാണ്. ഇതിൽ നേതൃത്വത്തിന് പങ്കില്ലെങ്കിൽ കോൺ​ഗ്രസ് അത് നിഷേധിക്കണം. വിഷയത്തിൽ ആശയക്കുഴപ്പമുണ്ടാക്കാനാണ് സതീശൻ സിപിഐ എമ്മിനെതിരെ പറഞ്ഞതെന്നും കെ എൻ ഉണ്ണികൃഷ്ണൻ മാധ്യമങ്ങളോട് പറഞ്ഞു.

അപവാദ പ്രചാരണം നടത്തുന്നവർക്കതിരെ നിയമനടപടി ആവശ്യപ്പെട്ട് കെ എൻ ഉണ്ണികൃഷ്ണനും കെ ജെ ഷൈനും മുഖ്യമന്ത്രിക്കും ഡിജിപിക്കും പരാതി നൽകിയിട്ടുണ്ട്.