ജബൽപൂർ ക്രൈസ്തവ വേട്ട: ചോദ്യത്തോട് പൊട്ടിത്തെറിച്ച് സുരേഷ് ​ഗോപി

കൊച്ചി : ജബൽപൂർ ആക്രമണത്തെ കുറിച്ച് ചോദിച്ചപ്പോൾ മാധ്യമങ്ങളോട് ക്ഷുഭിതനായി തൃശൂർ എംപി സുരേഷ് ​ഗോപി. ജബൽപൂരിലെ സംഭവങ്ങൽ ചോദിക്കാൻ നിങ്ങളാരാണെന്നും ആരോടാണ് ചോദിക്കുന്നതെന്ന് ഓർമയുണ്ടോ എന്നും സുരേഷ് ​ഗോപി കയർത്തു. വിഷയത്തിൽ ഉത്തരം പറയാൻ സൗകര്യമില്ലെന്നും സുരേഷ് ​ഗോപി പറഞ്ഞു.

ചോദ്യങ്ങൾ ആവർത്തിച്ചപ്പോൾ ഒരു മാധ്യമ സ്ഥാപനത്തെ ഉദ്ദേശിച്ച് ദ്വയാർഥ സൂചനയിൽ അശ്ലീല പ്രയോഗവും നടത്തി. ന്യൂനപക്ഷങ്ങൾക്കെതിരെ കേരളത്തിലും ആക്രമണം നടന്നിട്ടുണ്ടെന്ന് ന്യായീകരണവും പറഞ്ഞു.

ജബൽപൂരിലെ വൈദികരെ ആക്രമിച്ചത് നിങ്ങൾക്ക് നിയമപരമായി നേരിടാമെന്നും സുരേഷ് ​ഗോപി വെല്ലുവിളിച്ചു. ജബൽപൂർ വിഷയത്തെ കുറിച്ച് ചോദിച്ചപ്പോൾ മാധ്യമങ്ങൾ കുത്തിതിരിപ്പ് ഉണ്ടാക്കുകയാണെന്നും പാലാ ബിഷപ്പിനെ കുത്തിക്കൊല്ലാൻ തീരുമാനിച്ചിരുന്നതല്ലെന്നുമാണ് അദ്ദേഹം മറുപടിയായി പറഞ്ഞത്. രാഹുൽ ​​ഗാന്ധിയെയും പ്രിയങ്കാ ​ഗാന്ധിയെയും കളിയാക്കിക്കൊണ്ട് ആങ്ങളയും പെങ്ങളും എന്തുകൊണ്ട് സഭയിൽ വന്നില്ലായെന്നും സുരേഷ് ​ഗോപി ചോദിച്ചു.