യാത്രയ്ക്കിടെ ജഗതിയെ കണ്ട് മുഖ്യമന്ത്രി; ചിത്രം പങ്കുവച്ചു

കൊച്ചി : യാത്രയ്ക്കിടയിൽ മലയാളത്തിന്റെ പ്രിയ നടൻ ജ​ഗതി ശ്രീകുമാറിനെ കണ്ടുമുട്ടിയ വിശേഷം പങ്കുവച്ച് മുഖ്യമന്ത്രി പിണറായി വിജയൻ. എറണാകുളത്തേക്കുള്ള വിമാനയാത്രയ്ക്കിടയിലാണ് മുഖ്യമന്ത്രി അപ്രതീക്ഷിതമായി നടനെ കണ്ടത്. ജ​ഗതി ശ്രീകുമാറിന്റെ അടുത്തേക്കുചെന്ന് സുഖവിവരങ്ങൾ അന്വേഷിച്ച മുഖ്യമന്ത്രി ചിത്രം ഫേസ്ബുക്കിൽ പങ്കുവച്ചു. ഇന്ന് എറണാകുളത്തേക്കുള്ള യാത്രക്കിടെ മലയാളത്തിന്റെ അതുല്യനടൻ ജഗതി ശ്രീകുമാറിനെ കണ്ടുമുട്ടി. സുഖവിവരങ്ങൾ അന്വേഷിച്ചു - മുഖ്യമന്ത്രി ചിത്രത്തിനൊപ്പം കുറിച്ചു.

2012-ൽ ഉണ്ടായ അപകടത്തെ തുടർന്ന് സിനിമ രം​ഗത്തുനിന്നും വിട്ടുനിൽക്കുകയാണ് ജ​ഗതി ശ്രീകുമാർ. മലപ്പുറം ജില്ലയിലെ തേഞ്ഞിപ്പലത്ത് വച്ചുണ്ടായ വാഹനാപകടത്തിൽ ​ഗുരുതര പരിക്കേറ്റതിനെത്തുടർന്നാണ് സിനിമ വിട്ടത്. ഈ വർഷം വീണ്ടും ഒരു ചിത്രത്തിലൂടെ ജ​ഗതി തിരിച്ചുവരവിനൊരുങ്ങുന്നതായി വാർത്തകൾ പുറത്തുവന്നിരുന്നു. ‘വല’ എന്ന സിനിമയിലെ ‘പ്രൊഫസർ അമ്പിളി’ എന്ന മുഴുനീള വേഷത്തിലൂടെ സിനിമാലോകത്തേക്ക് തിരിച്ചുവരവിനൊരുങ്ങുന്നുവെന്നായിരുന്നു വാർത്തകൾ. ജ​ഗതിയുടെ പിറന്നാൾ ദിവസം ചിത്രത്തിലെ ക്യാരക്ടർ പോസ്റ്ററും അണിയറ പ്രവർത്തകർ പുറത്തുവിട്ടിരുന്നു. ബ്രിട്ടീഷ് ഭൗതികശാസ്ത്രജ്ഞൻ സ്റ്റീഫൻ ഹോക്കിങ്ങിനെ അനുസ്മരിപ്പിക്കുന്ന വിധത്തിൽ ചക്രകസേരയിലിരിക്കുന്ന രീതിയിലുള്ള പോസ്റ്ററാണ് പുറത്തുവിട്ടിരുന്നത്. ഗഗനചാരി' എന്ന ചിത്രത്തിലൂടെ ശ്രദ്ധേയനായ അരുൺ ചന്തുവിന്റെ അടുത്ത ചിത്രമാണ് വല.