ലോറി തടഞ്ഞ്​ 3.24 കോടി തട്ടിയ കേസ്​ ; കൂടുതൽ ബിജെപി നേതാക്കൾക്ക്​ പങ്കുണ്ടെന്ന്‌ സൂചന

കായംകുളം

പാഴ്​സൽ ലോറി തടഞ്ഞ്​ 3.24 കോടി രൂപ തട്ടിയ കേസിൽ കേരളത്തിലും തമിഴ്​നാട്ടിലും കൂടുതൽ ബിജെപി നേതാക്കൾക്ക്​ പങ്കുണ്ടെന്ന്‌ സൂചന. സംഭവത്തിൽ ഇതിനകം അറസ്‌റ്റിലായവരിൽനിന്ന്‌ ലഭിച്ച വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ്‌ സൂചന ലഭിച്ചത്‌. കോയമ്പത്തൂരിൽനിന്ന്​ വന്ന പാഴ്സൽ ലോറി കരിയിലക്കുളങ്ങര രാമപുരം ജങ്‌ഷനിൽവച്ച്‌ 13ന് പുലർച്ചെ തടഞ്ഞുനിർത്തിയാണ് പണംതട്ടിയത്.

കേസിൽ അഞ്ച് പ്രതികളെ നേരത്തെ തമിഴ്​നാട്ടിൽനിന്ന്​ അറസ്​റ്റ്​ ചെയ്തിരുന്നു.

പ്രധാന പ്രതികളിലൊരാളായ ദുരൈ അരസ്​ ബിജെപി നേതാവാണ്​. കൊള്ളസംഘം സഞ്ചരിച്ചിരുന്ന വാഹനത്തിന്റെ ഉടമയായ ശ്രീറാമിനെ ചോദ്യം ചെയ്​ത്​ വിട്ടയച്ചു. ഇയാൾ ബിജെപിയുടെയും ഒബിസി മോർച്ചയുടെയും നേതാവാണ്​. ദുരൈ അരസിന്റെ സുഹൃത്താണ്‌ ഇയാൾ. വാർത്തകൾ മാധ്യമങ്ങളിൽ വന്നതോടെ ഇരുവരെയും പുറത്താക്കിയതായി തമിഴ്‌നാട്‌ ബിജെപി വൃത്തങ്ങൾ അറിയിച്ചു.

തട്ടിപ്പിൽ കേരളത്തിൽനിന്ന്​ സഹായം ലഭിച്ചിട്ടുണ്ടോ എന്ന അന്വേഷണവും നടക്കുന്നുണ്ട്​. കവർച്ചാസംഘം ഉപയോഗിച്ച രണ്ട് വാഹനങ്ങൾ പൊലീസ് പിടിച്ചെടുത്തിരുന്നു. ഒമ്പതംഗ സംഘമാണ് രണ്ട് വാഹനങ്ങളിലായി എത്തി പണം കവർന്നത്. കൊല്ലം സ്വദേശിയായ സ്വർണവ്യാപാരിക്ക്‌ നൽകാൻ ബന്ധു കൊടുത്തുവിട്ട പണമായിരുന്നു ഇത്. കരീലക്കുങ്ങര സി ഐ ജെ നിസാമുദ്ദീന്റെ നേതൃത്വത്തിലാണ്​ അന്വേഷണം.