കോട്ടകെട്ടി കാത്ത കേരളത്തിന്​ നന്ദി... ഗാലിബിനടുത്തേക്ക്​ ആശയും പറന്നു

ആലപ്പുഴ

മതനിരപേക്ഷ കേരളം കെട്ടിയ കോട്ടയിൽനിന്ന്​ പറന്ന്​ ആശാ വർമ മുഹമ്മദ്​ ഗാലിബിന്റെ ചാരത്തണഞ്ഞു. രാത്രി 9.50ന്​ അബുദാബിയിലേക്ക്​ എയർ അറേബ്യ വിമാനം ഉയർന്നപ്പോൾ അകന്നുപോയത്​ കൊന്നുതള്ളുമെന്ന ഹിന്ദുത്വ തീവ്രവാദികളുടെ ഭീഷണിയും. വീണ്ടും ചർച്ചയാകുന്നത്​ മറ്റൊരു ‘റിയൽ കേരള സ്​റ്റോറി’യും.

കൊച്ചി അന്താരാഷ്​ട്ര വിമാനത്താവളത്തിന്റെ ​പ്രവേശനകവാടത്തിന്​ മുന്നിൽ യാത്രപറയുമ്പോൾ അഭിഭാഷകയും സുഹൃത്തുമായ ഗയ എസ്‌ ലതയെ ആശ ചേർത്തുപിടിച്ചു പറഞ്ഞു ‘മറക്കില്ല, ഇ‍ൗ നാടും നിങ്ങൾ നൽകിയ സ്​നേഹവും. കേരളം ഇനി ഞങ്ങളുടെയും വീടാണ്. മടങ്ങിയെത്തും ഒരുമിച്ച്​’. ലൗ ജിഹാദ് ആരോപിച്ച്‌ ബന്ധുക്കളും തീവ്രഹിന്ദുസംഘടനകളും കൊന്നുതള്ളുമെന്ന്‌ ഭീഷണിപ്പെടുത്തിയതിനാൽ ഭയന്നോടിയ ജാർഖണ്ഡ് സ്വദേശികൾ മുഹമ്മദ് ഗാലിബും (30) ആശ വർമയും (27) ഇനി ഒരുമിച്ച്​ ജീവിക്കും.

ആശങ്കകളുടെ അതിർത്തിവിട്ട്​ അബുദാബിയിൽ പറന്നിറങ്ങിയ ആശയെ ഗാലിബും സുഹൃത്തുക്കളും ചേർന്ന്​ സ്വീകരിച്ചു. പതിറ്റാണ്ടിന്റെ പ്രണയത്തിന്​ സാഫല്യമാകുമ്പോഴും ഇരുവരുടെയും മനസിൽ അഭയം നൽകിയ മതേതരകേരളത്തിന്റെ സ്​നേഹമാണ്. ജീവൻ നഷ്​ടമാകുമെന്ന സ്ഥിതിയായതോടെ ഫെബ്രുവരിയിലാണ്​ ജാർഖണ്ഡ് ചിത്തപ്പുർ സ്വദേശികളായ ഇരുവരും ഭയന്നോടി കേരളത്തിലെത്തിയത്​. ഇരുവരുടെയും 10​ വർഷത്തെ പ്രണയം ഇരുവീട്ടുകാരും എതിർത്തു. ലൗ ജിഹാദ്​ ആരോപണവുമായി പ്രദേശത്തെ ഹിന്ദുത്വസംഘടനകൾ രംഗത്തെത്തി. വർഗീയസംഘർഷത്തിലേക്ക് നീങ്ങിയതോടെ നാടുവിട്ടു.

വാർ ആൻഡ്​ ല‍ൗ

ഗാലിബിനൊപ്പം ജോലിചെയ്യുന്ന കായംകുളം സ്വദേശിയാണ്‌ കേരളത്തിലെത്താനും അഡ്വ. ഗയയെ കാണാനും നിർദേശിക്കുന്നത്‌. കായംകുളത്തെത്തിയ ഇരുവരും ഇസ്ലാം മതവിശ്വാസപ്രകാരവും ഹിന്ദുമത വിശ്വാസപ്രകാരവും വിവാഹിതരായി. ഇരുവരെയും തെരഞ്ഞ്​ ജാർഖണ്ഡിലെ രാജ്‌രപ്പ പൊലീസിനൊപ്പം പെൺകുട്ടിയുടെ ബന്ധുക്കളുമെത്തി. ഇരുവരും പോകാൻ തയ്യാറായില്ല. വിട്ടുനൽകാൻ കഴിയില്ലെന്ന്‌ കായംകുളം പൊലീസ്​ ജാർഖണ്ഡ് പൊലീസിനെ അറിയിച്ചു.

ആശയെ ഗാലിബ്‌ തട്ടിക്കൊണ്ടുവന്നതാണെന്ന്‌ കേസ്‌ രജിസ്​റ്റർചെയ്​ത്​ വീണ്ടുമെത്തി. സംഭവം വാർത്തയായതോടെ ഡിവൈഎഫ്​ഐയടക്കം സംഘടനകൾ പിന്തുണപ്രഖ്യാപിച്ചു. ഇതിനിടെ നിയമപരമായി വിവാഹം രജിസ്​റ്റർ ചെയ്​തു. ഇരുവർക്കും സുരക്ഷയാവശ്യപ്പെട്ട്​ ഹൈക്കോടതിയെയും സമീപിച്ചു. ഖാലിബിനെതിരെ അറസ്‌റ്റ്‌ വാറന്റ്‌ നിലനിൽക്കെ നാട്ടിലേക്ക്‌ മടങ്ങേണ്ടിവരുമോയെന്ന ആശങ്കയിലായിരുന്നു. സുരക്ഷ ഉറപ്പാക്കണമെന്നും മടക്കി അയക്കരുതെന്നും കോടതി നിർദേശിച്ചത്‌ ഇരുവർക്കും ആശ്വാസമായി. പൊലീസ്​ സംഘം മടങ്ങിയെങ്കിലും ആശയുടെ വീട്ടുകാരിൽനിന്ന്​ ഭീഷണി തുടർന്നു.

മാർച്ചിൽ ഗാലിബ്​​ യുഎഇയിലേക്ക്​ മടങ്ങി. ആശ അഡ്വ. ഗയയുടെ മാതാപിതാക്കളോടൊപ്പം കായംകുളത്ത്​ തുടർന്നു. അഞ്ചുമാസം നീണ്ട നടപടികൾക്കൊടുവിലാണ്​ പാസ്​പോർട്ട്​ അടക്കം രേഖകൾ വീണ്ടെുത്തത്​. രണ്ടുമാസംമുമ്പും ഭീഷണിയുമായി ബന്ധുക്കളെത്തി. ഗാലിബിനെതിരെ രാജ്‌രപ്പ പൊലീസിട്ട എഫ്​ഐആർ റദ്ദാക്കണമെന്നാവശ്യപ്പെട്ട്​ നിയമനടപടികൾ റാഞ്ചി ഹൈക്കോടതിയിൽ തുടരുകയാണ്​.