ജെഎൻയുവിന്റേത്‌ സംഘപരിവാറിനെതിരെ പോരാടുന്ന എല്ലാവരുടെയും വിജയം
അജിൻ ജി നാഥ്‌
Published on Nov 16, 2025, 12:01 AM | 3 min read
രാജ്യത്തിന്റെ ബ‍ൗദ്ധിക കേന്ദ്രമെന്നറിയപ്പെടുന്ന ഇടമാണ്‌ ഡൽഹിയിലെ ജവാഹർലാൽ നെഹ്‌റു സർവകലാശാല. ഇന്ത്യൻ രാഷ്ട്രീയത്തിൽ അതുല്യ പ്രതിഭകളെ സംഭാവന ചെയ്‌ത ക്യാമ്പസ്‌. അടിയന്തരാവസ്ഥയുടെ കിരാതപർവത്തിൽ ജെഎൻയു വിദ്യാർഥികൾ ഏകാധിപത്യത്തെ മുട്ടുകുത്തിച്ചു. അനീതികൾക്കെതിരായ ആ പോരാട്ടപാരമ്പര്യം ഇന്നും കൈവിട്ടിട്ടില്ല. സംഘപരിവാറിന്റെ സകല വിദ്വേഷപ്രചാരണങ്ങളെയും അധികാരപ്രയോഗങ്ങളെയും അട്ടിമറിച്ചാണ്‌ ഇക്കഴിഞ്ഞ വിദ്യാർഥി യൂണിയൻ തെരഞ്ഞെടുപ്പിൽ ഇടതുപക്ഷ വിദ്യാർഥി സഖ്യം വിജയം നേടിയത്‌. ജനാധിപത്യത്തെയും മതനിരപേക്ഷതയെയും ഭരണഘടനയെയും വെല്ലുവിളിക്കുന്ന സംഘപരിവാറിന്‌ രാജ്യതലസ്ഥാനത്ത്‌ വിദ്യാർഥികൾ നൽകിയ ചുട്ട മറുപടി. ആ ഐതിഹാസിക വിജയത്തിൽ കേരളത്തിനും അഭിമാനിക്കാനേറെയുണ്ട്‌. ആ തെരഞ്ഞെടുപ്പിൽ ഏറ്റവും അധികം വോട്ടുകൾ നേടി വൈസ്‌ പ്രസിഡന്റായി തെരഞ്ഞെടുക്കപ്പെട്ട എസ്എഫ്ഐ നേതാവ്‌ മലയാളി പെൺകുട്ടിയാണ്‌. സെന്റർ ഫോർ ദ സ്റ്റഡി ഓഫ്‌ ലോ ആൻഡ്‌ ഗവേർണൻസിൽ ഗവേഷകയും തൃശൂർ ഇരിങ്ങാലക്കുട സ്വദേശിയുമായ കെ ഗോപിക ബാബു. ഇ‍ൗ ചരിത്രവിജയം സംഘപരിവാറിനോട്‌ പോരാടുന്ന എല്ലാവരുടെയും വിജയമാണെന്ന്‌ ഗോപിക പറയുന്നു.
മിന്നുംജയം
ജെഎൻയു വൈസ്‌പ്രസിഡന്റ്‌ സ്ഥാനത്തേക്ക്‌ എബിവിപിയുമായി നേരിട്ടുമത്സരിച്ചാണ്‌ മിന്നുന്ന വിജയം നേടിയത്‌. എബിവിപി സ്ഥാനാർഥിയെക്കാൾ 1,236 വോട്ടുകൾ നേടി. സമീപവർഷങ്ങളിൽ ഒരു സ്ഥാനാർഥിക്ക്‌ ലഭിക്കുന്ന ഏറ്റവും വലിയ ഭൂരിപക്ഷമാണിത്‌. 2,996 വോട്ടുകളാണ്‌ ആകെ നേടിയത്‌. ആ വിജയത്തിൽ ചെറുതല്ലാത്ത ഒരു ആത്മാഭിമാനവും ഗോപികയ്‌ക്കുണ്ട്‌. ഹിന്ദി മാതൃഭാഷയല്ലാത്തയാളാണ്‌, ദക്ഷിണേന്ത്യക്കാരിയാണ്‌, മുഴുവൻ വിദ്യാർഥികളെയും പ്രതിനിധീകരിക്കാനാകില്ല തുടങ്ങിയ വിവേചനപരമായ പ്രചാരണങ്ങളാണ്‌ മത്സരരംഗത്ത്‌ എബിവിപി അഴിച്ചുവിട്ടത്‌. ഇ‍ൗ പ്രചാരണങ്ങളെ തകർത്തുകൊണ്ട്‌ ജെഎൻയു ഉയർത്തിപ്പിടിച്ച വൈവിധ്യങ്ങളുടെയും ഉൾക്കൊള്ളലിന്റെയും രാഷ്ട്രീയത്തിൽ അതിയായ അഭിമാനമാണ്‌ ഗോപികയ്‌ക്ക്‌.
പൊരുതിത്തോൽപ്പിച്ചു
കേവലമായ ഒരു വിജയമല്ല ജെഎൻയുവിന്റെത്‌. സംഘപരിവാറിന്റെ പ്രത്യയശാസ്‌ത്രത്തെയാണ്‌ ജെഎൻയു പരാജയപ്പെടുത്തിയത്‌. സംവരണ വിരുദ്ധത, സ്‌ത്രീ വിരുദ്ധത, മണ്ഡൽ കമീഷൻ വിരുദ്ധ മുദ്രാവാക്യങ്ങൾ, മുസ്ലിം വിരുദ്ധത തുടങ്ങിയവയാണ്‌ എബിവിപി ഉയർത്തിയത്‌. അതുമാത്രമല്ല കേന്ദ്ര–സംസ്ഥാന സർക്കാരുകളുടെ സ്വാധീനം ഉപയോഗിച്ചുള്ള അടിച്ചമർത്തലുകൾ, ഭീഷണികൾ, പൊലീസിന്റെ ക്രൂരമായ മർദ്ദനങ്ങൾ തുടങ്ങി എല്ലാത്തിനെയും പൊരുതിത്തോൽപ്പിച്ചു. മോദി സർക്കാരിനെതിരെ സംസാരിച്ചാൽ ജയിലിലടയ്‌ക്കും എന്ന്‌ വിദ്യാർഥികളെ നിരന്തരം അവർ ഓർമിപ്പിച്ചു. ഉമർ ഖാലിദ്‌ ഉൾപ്പെടെ ഉദാഹരണമായിരുന്നു. ക്യാമ്പസിലേക്ക്‌ ആദ്യമെത്തുന്ന, ബഹുഭൂരിപക്ഷം വരുന്ന ഉത്തരേന്ത്യൻ വിദ്യാർഥികൾ പുറത്ത്‌ കണ്ടുവന്നതത്രയും വിഭജനത്തിന്റെയും വിദ്വേഷത്തിന്റെയും രാഷ്‌ട്രീയം മാത്രമാണ്‌. അവർക്ക്‌ ആദ്യം എബിവിപിയല്ലാതെ മറ്റ്‌ സാധ്യതകളറിയില്ല. ഐക്യപ്പെടലിന്റെയും ഉൾച്ചേരലിന്റെയും രാഷ്‌ട്രീയം സാധ്യമാണെന്നും വൈവിധ്യങ്ങളാണ്‌ ജെഎൻയുവിന്റെ പാരമ്പര്യമെന്നും സർവകലാശാലയിലെ എസ്എഫ്ഐ അടക്കമുള്ള ഇടതുപക്ഷ വിദ്യാർഥി സംഘടനകളാണ്‌ അവരെ ബോധ്യപ്പെടുത്തുന്നത്‌. ആ രാഷ്‌ട്രീയത്തെ ഉൾക്കൊണ്ട്‌ സംഘപരിവാറിന്റെ വെറുപ്പിന്റെ പ്രത്യയശാസ്‌ത്രത്തെയാണ്‌ ജെഎൻയു പരാജയപ്പെടുത്തിയത്‌.
പ്രതിരോധത്തിന്റെ വഴി
സംഘപരിവാറിന്റെ മനുഷ്യവിരുദ്ധ രാഷ്‌ട്രീയത്തെ പ്രതിരോധിക്കാനുള്ള ശരിയായ വഴി ഇടതുപക്ഷമാണെന്ന്‌ ജെഎൻയു തെളിയിച്ചതായി ഗോപിക പറയുന്നു. നവഫാസിസത്തെ പരാജയപ്പെടുത്താൻ വേണ്ടത്‌ വിശാലമായ ഇടതുപക്ഷ ജനാധിപത്യ മതനിരപേക്ഷ ശക്തിയാണ്‌. അത്തരത്തിലൊരു ആശയവ്യക്തതയുള്ള ശക്തിക്ക്‌ മാത്രമേ അതിനെ പരാജയപ്പെടുത്താനാകൂ. അതിനാൽ തന്നെയാണ്‌ ജെഎൻയുവിലെ ഇടതുപക്ഷ വിദ്യാർഥി സംഘടനകളായ എസ്എഫ്ഐ, ഐസ, ഡിഎസ്‌എഫ്‌ സംഘടനകൾ ഒന്നിച്ച്‌ തെരഞ്ഞെടുപ്പിനെ നേരിട്ടത്‌. ആ രാഷ്‌ട്രീയം ജെഎൻയു അംഗീകരിച്ചുവെന്നത്‌ രാജ്യം ഉറ്റുനോക്കിയ ഒന്നാണ്‌. അതിനാൽ തന്നെ ഇത്‌ ജെഎൻയുവിന്റെ മാത്രം വിജയമല്ല. നവഫാസിസത്തിനെതിരെ പോരാടുന്ന, മോദി സർക്കാരിനെതിരെ പ്രവർത്തിക്കുന്ന, ജനാധിപത്യത്തിനും മതനിരപേക്ഷതയ്‌ക്കുമായി നിലകൊള്ളുന്ന, പോരാടുന്ന തൊഴിലാളികളുടെയും കർഷകരുടെയും, അങ്ങനെ സംഘപരിവാറിനെതിരെ പോരാടുന്ന എല്ലാവരുടെയും വിജയമാണ്‌.
മാർഗം പോരാട്ടമാണ്‌
അനീതികൾക്കെതിരായ നിരന്തരമായ പോരാട്ടമാണ്‌ ജെഎൻയുവിന്റെ മുഖമുദ്ര. പുതിയ വിദ്യാർഥി യൂണിയനും മറ്റൊന്നല്ല വഴി. അന്യായമായി വെട്ടിക്കുറച്ച ഫണ്ടുകൾ നേടിയെടുക്കാനും, ലൈബ്രറിയുടെ ഉൾപ്പെടെ അടിസ്ഥാന ആവശ്യങ്ങൾ നേടാനും അടിസ്ഥാന സ‍ൗകര്യം വർധിപ്പിക്കാനുമുള്ള നിരന്തരപോരാട്ടം പുതിയ യൂണിയനും നടത്തുമെന്ന്‌ ഗോപിക പറഞ്ഞു. സീതാറാം യെച്ചൂരിയുടെ നേതൃത്വത്തിൽ എഴുതിയ ഭരണഘടനയാണ്‌ ജെഎൻയു വിദ്യാർഥി യൂണിയന്റേത്‌. മുഴുവൻ വിദ്യാർഥികളെയും വേർതിരിവുകളില്ലാതെ ഉൾക്കൊള്ളുന്ന, സ്‌കോളർഷിപ്പുകളും സംവരണവും, തുല്യനീതിയും ഉറപ്പാക്കുന്ന ഭരണഘടന. അതിനെ കാലാകാലങ്ങളിൽ സംരക്ഷിച്ചും വികസിപ്പിച്ചും എല്ലാ വിദ്യാർഥികളെയും ചേർത്തുപിടിക്കുന്ന സമീപനമാണ്‌ ഇടതുപക്ഷ വിദ്യാർഥി യൂണിയനുകൾ സ്വീകരിച്ചുപോന്നത്‌. ജെഎൻയുവിന്റെ ആ ഇടതുപക്ഷ പാരമ്പര്യം കോട്ടം വരാതെ കാക്കും. ഒപ്പം സർവകലാശാലയെ തകർക്കാനുള്ള സംഘപരിവാറിന്റെ ഭരണപരവും രാഷ്‌ട്രീയവുമായ എല്ലാ ശ്രമങ്ങളെയും ചെറുത്തുതോൽപ്പിക്കും.
പഠനവും പോരാട്ടവും
പഠിക്കുക പോരാടുക എന്ന മുദ്രാവാക്യം നെഞ്ചേറ്റിയാണ്‌ രാജ്യതലസ്ഥാനത്തെ വിദ്യാർഥി സമൂഹത്തെ ഗോപിക നയിക്കുന്നത്‌. ജനിച്ചുവളർന്നത്‌ ഇരിങ്ങാലക്കുടയിലെ നെടുന്പാളിലെ കുടുംബ വീട്ടിലാണെങ്കിലും സ്‌കൂൾ വിദ്യാഭ്യാസമെല്ലാം ബഹ്‌റൈനിലായിരുന്നു. പ്ലസ്‌ടു വിദ്യാഭ്യാസത്തിനുശേഷം ഡൽഹി മിരാൻഡ ഹൗസ് കോളേജിൽ സോഷ്യോളജിയിൽ ബിഎ ഓണേഴ്‌സ്‌ നേടി. ജെഎൻയുവിൽനിന്ന്‌ സോഷ്യോളജിയിൽ സ്വർണമെഡലോടെയാണ്‌ ബിരുദാനന്തര ബിരുദം നേടുന്നത്‌. പ-ഠനത്തിലെ മികവിനൊപ്പം കലാരംഗത്തും ഗോപിക കഴിവുതെളിയിച്ചിട്ടുണ്ട്‌. നല്ലൊരു ചിത്രകാരി കൂടിയാണ്‌ ഗോപിക. പ്രശസ്‌ത മാഗസിനായ മന്ത്‌ലി റിവ്യൂ ഉൾപ്പെടെയുള്ള പ്രസിദ്ധീകരണങ്ങൾക്കുവേണ്ടി വരച്ചിട്ടുണ്ട്‌. ഡൽഹിയിലെ ‘യങ്‌ സോഷ്യലിസ്‌റ്റ്‌ ആർടിസ്‌റ്റ്‌സ്‌’ എന്ന ഇടതുപക്ഷ സാംസ്‌കാരിക കൂട്ടായ്‌മയുടെ സജീവപ്രവർത്തക കൂടിയാണ്‌. മിരാൻഡ ഹൗസ് കോളേജിൽ പഠിക്കുമ്പോഴാണ്‌ എസ്‌എഫ്‌ഐയിൽ പ്രവർത്തിച്ചുതുടങ്ങിയത്‌. 2023–24 കാലയളവിൽ ജെഎൻയു വിദ്യാർഥി യൂണിയനിൽ ക‍ൗൺസിലറുമായിരുന്നു. നിലവിൽ എസ്എഫ്ഐ യൂണിറ്റ്‌ സെക്രട്ടറിയറ്റ്‌ അംഗമാണ്‌. അച്ഛൻ കെ ജി ബാബുവും അമ്മ ജുമയും ബഹ്‌റൈനിലാണ്‌. ഇരട്ട സഹോദരി കെ ദേവിക ബാബു പുണെ ഇന്ത്യൻ ഇൻസ്‌റ്റിറ്റ്യൂട്ട്‌ ഓഫ്‌ സയൻസ്‌ എഡ്യൂക്കേഷൻ ആൻഡ്‌ റിസർച്ചിൽ ഗവേഷകയാണ്‌. പഠനത്തോടൊപ്പം രാഷ്‌ട്രീയവും പോരാട്ടവും തുടരുകയാണ്‌ ഗോപിക.
Tags
Related News
Dont Miss it
0 comments