ഗൗരിയുടെ യാത്രയും കഥകളും

ഒരിക്കലും മടുക്കാതെ യാത്ര ചെയ്യണം, പറഞ്ഞുതീരാത്ത കഥകൾ പറയണം, പഴമകളിലെ പെരുമകളറിയണം, പുതുരുചികളറിയണം. ഇതാണ്‌ ഗൗരിയുടെ കഥ. കണ്ടുമടുക്കാത്ത കാഴ്‌ചകളുടെ കഥ പറയാൻ ആലപ്പുഴ സ്വദേശിയും ഗവേഷകയുമായ എൻ ഗൗരി ഇൻസ്റ്റഗ്രാമിൽ തുടങ്ങിയ ‘ഗൗരിയുടെ കഥകൾ’ തേടിയെത്തുന്നവർ അനവധിയാണ്‌. ഈ കഥകൾ പറയാനായി ഗൗരി നടത്തുന്ന യാത്രകൾക്കും പ്രത്യേകതകളുണ്ട്‌. ഇന്ത്യയൊട്ടാകെ ഒറ്റയ്ക്ക്‌ യാത്ര ചെയ്യുകയും കാഴ്‌ചകൾ പകർത്തി കാണിക്കുകയും ചെയ്യുക എന്നതിനപ്പുറം ഓരോ നാടിന്റെയും കഥ തന്നെയാണ്‌ ഗൗരി പറയുന്നത്‌.

അച്ഛൻ നൽകിയ ചിറകിലേറി

യാത്രകളോടും രുചികളോടും അഭിനിവേശമുണ്ടായിരുന്ന അച്ഛനാണ്‌ ഗൗരിയെന്ന സഞ്ചാരിയുടെ വഴികാട്ടി. യാത്ര പോയശേഷം ഓരോ സ്ഥലങ്ങളെപ്പറ്റിയും അച്ഛൻ പി രവികുമാർ പറയാറുണ്ടായിരുന്ന കഥകളിൽനിന്നുമാണ്‌ യാത്രയോടുള്ള പ്രണയം തുടങ്ങുന്നത്‌. അച്ഛന്റെ മരണശേഷം വല്ലാത്ത ശൂന്യത അനുഭവപ്പെട്ടു. അതിൽനിന്ന്‌ പുറത്തുകടക്കാനുള്ള വഴിയായി ഗൗരി തെരഞ്ഞെടുത്തത്‌ യാത്ര തന്നെയായിരുന്നു. പിന്നെ അതൊരു ശീലമായി. വാരാണസി, കൊൽക്കത്ത തുടങ്ങിയ സ്ഥലങ്ങളിലെല്ലാം നിരവധി തവണ ഗൗരി യാത്ര ചെയ്‌തിട്ടുണ്ട്‌. ചൈന, ഇൻഡോനേഷ്യ, നേപ്പാൾ തുടങ്ങിയ രാജ്യങ്ങളും സന്ദർശിച്ചിട്ടുണ്ട്‌.

നാടിന്റെ കഥകൾ തേടി

ഏതെങ്കിലും സ്ഥലത്ത്‌ പോയി, അവിടെ വിനോദസഞ്ചാരികൾ സ്ഥിരം പോകുന്ന സ്ഥലങ്ങളോ, പ്രകൃതിഭംഗിയോ ആസ്വദിച്ച്‌ മടങ്ങുന്ന രീതിയല്ല ഗൗരിയുടേത്‌. ഓരോ നാടിന്റെയും ചരിത്രവും അവയുടെ കഥകളും തേടിയിറങ്ങും. മനുഷ്യരോട്‌ സംസാരിക്കുക, അവരുടെ ജീവിതം അറിയുക, അവരുടെ രുചികൾ തേടുക, അവരിലൂടെ നാടിനെ തൊട്ടറിയുക. ഇതിനിടയിൽ അവ സമൂഹമാധ്യമങ്ങളിൽ പങ്കുവയ്ക്കാനും തുടങ്ങി. സാധാരണയായി കാണുന്ന ട്രാവൽ വ്‌ലോഗുകളിൽനിന്നെല്ലാം വ്യത്യസ്‌തമായി ഓരോ നാടിനെയും, അതിന്റെ സംസ്‌കാരത്തെയും ചരിത്രത്തെയും പൗരാണികതയുമെല്ലാം ആഴത്തിൽ രേഖപ്പെടുത്തുകയാണ്‌ ഗൗരി ചെയ്യുന്നത്‌. കൊൽക്കത്തയിലെ വിപ്ലവ പ്രസ്ഥാനമായ അനുശീലൻ സമിതിയുടെ ചരിത്രം പേറുന്ന പാരാമൗണ്ട്‌ സർബത്ത്‌സ്‌, സോനാഗച്ചിയിലെ ലൈംഗികതൊഴിലാളികളുടെ ജീവിതം, വാരാണസിലെ ചുടലപറമ്പുകളിലെ പറയാത്ത കഥകൾ തുടങ്ങിയവയൊക്കെ ഗൗരി പങ്കുവച്ചിട്ടുണ്ട്‌. കാഴ്‌ചക്കാർക്ക്‌ വേണ്ട കാര്യങ്ങൾ നൽകി റീച്ച് കൂട്ടാനുള്ള ശ്രമമല്ല, മറിച്ച്‌ തനിക്ക്‌ തൃപ്‌തി നൽകുന്ന കാര്യങ്ങൾ, അനുഭവിച്ചറിഞ്ഞ കാര്യങ്ങൾമാത്രം പങ്കുവയ്ക്കുക എന്ന രീതിയാണ്‌ ഈ പെൺകുട്ടിയുടേത്‌.

പുതുരുചികൾ, ഭക്ഷണമെന്ന അനുഭൂതി

ഓരോ നാട്ടിലെയും ഭക്ഷണം ആസ്വദിച്ച്‌ കഴിക്കുകയും, ഓരോ ഇടങ്ങളിലും ഒളിച്ചിരിക്കുന്ന രുചിയുടെ അനുഭൂതികളെ കണ്ടെത്തുകയും ചെയ്യാറുണ്ട്‌. മധുരയിലെ പരുത്തിപ്പാൽ, കോഴിക്കോടൻ ഹൽവ, ബാലിയിലെ നാസി ചംപൂർ, കാളിഘട്ടിലെ ചാപ്‌ത രസഗുള, ചെട്ടിനാട്‌ സമയൽ, കൊൽക്കത്ത അനാദിയിലെ മുഗുളായി പെറാട്ട, ഫിഷ്‌ കട്‌ലറ്റ്‌, കാഠ്‌മണ്ഡുവിലെ യൊമാരി തുടങ്ങിയ വിഭവങ്ങൾ പേജിൽ പങ്കുവച്ചിട്ടുണ്ട്‌. കൊൽക്കത്തയിലെ ഇടുങ്ങിയ ഗലികളിലെ രുചിയിടങ്ങളും ക്യാബിൻ റസ്റ്റോറന്റുകളും മധുരയിലെ തെരുവോര കടകളും തേടി പോയിട്ടുണ്ട്‌.

പുതുക്കിപ്പണിയുന്ന യാത്രകൾ

യാത്രകൾ തന്നെ നിരന്തരമായി പുതുക്കി പണിയുന്നത്‌ കൂടിയാണെന്ന്‌ ഗൗരി പറയുന്നു. ഓരോ നാടുകളും ഓരോ സംസ്‌കാരവും തൊട്ടറിയുന്നതിലൂടെ അവ നമ്മുടെ ജീവിതത്തെയും സ്വാധീനിക്കും. ഇതുകൊണ്ട്‌ തന്നെയാണ്‌ യാത്രകൾ ഗൗരിക്ക്‌ അത്രത്തോളം പ്രിയപ്പെട്ടതാകുന്നത്‌. ഒറ്റയ്ക്ക്‌ പുറത്തുപോകാത്ത പെൺകുട്ടിയിൽനിന്ന്‌ ഏതു സാഹചര്യവും നിർഭയം നേരിടാൻ കഴിയുന്നവിധം യാത്രകൾ ഗൗരിയെ മാറ്റിത്തീർത്തു. ഓരോ സ്ഥലത്തെയും കുറിച്ച്‌ ആഴത്തിൽ പഠിച്ച്‌ മാത്രമേ യാത്ര ചെയ്യാറുള്ളൂ. ഒറ്റയ്ക്കുള്ള യാത്രകളായതിനാൽ തന്നെ പരമാവധി മുൻകരുതലുകളും സ്വീകരിക്കാറുണ്ട്‌. പങ്കാളിയായ ഡോ. ഹരിഗോവിന്ദിന്റെയും റിട്ട. കോളേജ്‌ അധ്യാപികയായ അമ്മ നിർമലകുമാരിയുടെയും പൂർണ പിന്തുണയുമുണ്ട്‌. തന്റെ യാത്രകൾ കാണുന്ന ആളുകൾക്കും യാത്ര പോകാനുള്ള പ്രേരണയുണ്ടാവുന്നു എന്നതാണ്‌ വലിയ സന്തോഷമെന്ന്‌ ഗൗരി പറയുന്നു.