വേദനയില്ലാത്ത രോഗം: വൈകി തിരിച്ചറിയപ്പെടുന്ന മൂത്രാശയ കാൻസറിന്റെ നിശ്ശബ്ദ ലക്ഷണങ്ങൾ

ശരീരത്തിലെ ഏതൊരു അസ്വാഭാവികതയും നാം പലപ്പോഴും തിരിച്ചറിയുന്നത് വേദന എന്ന ലക്ഷണത്തിലൂടെയാണ്. ശരീരത്തിന്റെ ഒരു അപായ സൂചനയാണ് യഥാർത്ഥത്തിൽ വേദന. എവിടെയോ എന്തോ തകരാറുണ്ടെന്ന് ശരീരം തലച്ചോറിന് നൽകുന്ന മുന്നറിയിപ്പ്. എന്നാൽ യാതൊരുവിധ വേദനയും നൽകാതെ, പൂർണ്ണമായും നിശ്ശബ്ദമായി ശരീരത്തിൽ വളർന്ന് പന്തലിക്കുന്ന ചില മാരകരോഗങ്ങളുണ്ട്. അത്തരത്തിൽ വളരെ വൈകി മാത്രം തിരിച്ചറിയപ്പെടുകയും, എന്നാൽ ജീവന് കടുത്ത ഭീഷണി ഉയർത്തുകയും ചെയ്യുന്ന ഒരു അർബുദമാണ് മൂത്രാശയ കാൻസർ അഥവാ ബ്ലാഡർ കാൻസർ. രോഗലക്ഷണങ്ങൾ പ്രകടമാകാൻ തുടങ്ങുന്ന ആദ്യഘട്ടങ്ങളിൽ യാതൊരുവിധ ശാരീരിക ബുദ്ധിമുട്ടുകളോ വേദനയോ ഇല്ലാത്തതുകൊണ്ട് തന്നെ പലരും ഇതിനെ നിസ്സാരവൽക്കരിച്ച് അവഗണിക്കുകയാണ് പതിവ്. ഈ അശ്രദ്ധയാണ് പിന്നീട് ചികിത്സിച്ചു ഭേദമാക്കാൻ കഴിയാത്തത്ര ഗുരുതരാവസ്ഥയിലേക്ക് രോഗിയെ എത്തിക്കുന്നത്. കൃത്യമായ അവബോധം നൽകുക എന്നത് മാത്രമാണ് ഈ നിശ്ശബ്ദ കൊലയാളിയെ പ്രതിരോധിക്കാനുള്ള ഏക മാർഗ്ഗം.

എന്താണ് മൂത്രാശയ കാൻസർ?

മനുഷ്യശരീരത്തിൽ വൃക്കകൾ അരിച്ചെടുക്കുന്ന മൂത്രം താൽക്കാലികമായി സംഭരിച്ചുവെക്കുന്ന അവയവമാണ് മൂത്രാശയം അഥവാ യൂറിനറി ബ്ലാഡർ. അടിവയറ്റിൽ സ്ഥിതി ചെയ്യുന്ന ഈ അവയവത്തിന്റെ ഉൾഭാഗത്തുള്ള കോശങ്ങളിൽ ഉണ്ടാകുന്ന അനിയന്ത്രിതമായ വളർച്ചയാണ് മൂത്രാശയ കാൻസർ എന്ന് അറിയപ്പെടുന്നത്. യൂറോത്തീലിയൽ കോശങ്ങൾ എന്നറിയപ്പെടുന്ന ഈ ഉൾവരി കോശങ്ങളിലാണ് ഭൂരിഭാഗം മൂത്രാശയ അർബുദങ്ങളും ആരംഭിക്കുന്നത്. തുടക്കത്തിൽ ഈ കോശങ്ങളിൽ മാത്രം ഒതുങ്ങിനിൽക്കുന്ന കാൻസർ, കാലക്രമേണ മൂത്രാശയത്തിന്റെ പേശികളിലേക്കും തുടർന്ന് ശരീരത്തിന്റെ മറ്റ് ഭാഗങ്ങളിലേക്കും പടർന്നു പിടിക്കുന്നു. പേശികളിലേക്ക് പടരുന്നതിന് മുൻപ് തന്നെ രോഗം കണ്ടെത്താൻ കഴിഞ്ഞാൽ പൂർണ്ണമായും ചികിത്സിച്ച് ഭേദമാക്കാൻ കഴിയുന്ന ഒന്നാണിത്. എന്നാൽ നിർഭാഗ്യവശാൽ ബഹുഭൂരിപക്ഷം ആളുകളിലും രോഗം മറ്റ് അവയവങ്ങളിലേക്ക് പടർന്നതിന് ശേഷമാണ് ഇത് കാൻസറാണെന്ന് തന്നെ തിരിച്ചറിയുന്നത്.

നിശ്ശബ്ദമായ ആദ്യ ലക്ഷണങ്ങൾ

മൂത്രാശയ കാൻസറിന്റെ ഏറ്റവും പ്രധാനപ്പെട്ടതും എന്നാൽ ഏറ്റവും കൂടുതൽ ആളുകൾ അവഗണിക്കുന്നതുമായ ലക്ഷണം വേദനയില്ലാതെ മൂത്രത്തിൽ രക്തം കാണുന്നതാണ്. വൈദ്യശാസ്ത്രത്തിൽ ഇതിനെ 'പെയിൻലെസ്സ് ഹെമറ്റൂറിയ' എന്ന് വിളിക്കുന്നു. മൂത്രത്തിന് ഇളം ചുവപ്പ്, പിങ്ക് അല്ലെങ്കിൽ കടും ചുവപ്പ് നിറം വരികയോ രക്തക്കട്ടകൾ മൂത്രത്തിലൂടെ പോവുകയോ ചെയ്യുന്നത് ഇതിന്റെ പ്രധാന ലക്ഷണമാണ്. എന്നാൽ പലപ്പോഴും ഇത് സ്ഥിരമായി ഉണ്ടാകണമെന്നില്ല. ഒന്നോ രണ്ടോ തവണ മൂത്രത്തിൽ രക്തം കണ്ടതിന് ശേഷം പിന്നീട് ആഴ്ചകളോളമോ മാസങ്ങളോളമോ സാധാരണ ഗതിയിൽ തന്നെ മൂത്രമൊഴിക്കാൻ കഴിഞ്ഞേക്കാം. വേദന ഒട്ടും ഇല്ലാത്തതിനാലും പിന്നീട് രക്തം കാണാത്തതിനാലും ഇത് തനിയെ ഭേദമായ ഒരു നിസ്സാര പ്രശ്നമാണെന്ന് രോഗി സ്വയം തെറ്റിദ്ധരിക്കുന്നു. ഈ ഒരു തെറ്റിദ്ധാരണയാണ് കാൻസറിന് ശരീരത്തിൽ വളരാനുള്ള സമയം നൽകുന്നത്. മൂത്രത്തിൽ നേരിയ തോതിൽ എപ്പോഴെങ്കിലും രക്തം കാണുകയാണെങ്കിൽ അത് തീർച്ചയായും ഒരു വിദഗ്ദ്ധ ഡോക്ടറെ കണ്ട് പരിശോധിക്കേണ്ടതാണ്.

രോഗബാധയെന്ന് തെറ്റിദ്ധരിക്കപ്പെടുന്ന ലക്ഷണങ്ങൾ

മൂത്രത്തിൽ രക്തം കാണുന്നതിന് പുറമെ മറ്റ് ചില ലക്ഷണങ്ങളും മൂത്രാശയ കാൻസറിന്റേതായി പ്രകടമാകാറുണ്ട്. ഇടയ്ക്കിടെ മൂത്രമൊഴിക്കാൻ തോന്നുക, മൂത്രമൊഴിക്കണമെന്ന് തോന്നിയാൽ ഒട്ടും പിടിച്ചു നിർത്താൻ കഴിയാത്ത അവസ്ഥയുണ്ടാകുക, മൂത്രമൊഴിക്കുമ്പോൾ നേരിയ പുകച്ചിലോ അസ്വസ്ഥതയോ അനുഭവപ്പെടുക, മൂത്രമൊഴിച്ചു കഴിഞ്ഞാലും പൂർണ്ണമായും പോയില്ലെന്ന തോന്നലുണ്ടാകുക എന്നിവയെല്ലാം ഇതിൽപ്പെടുന്നു. എന്നാൽ ഈ ലക്ഷണങ്ങളെല്ലാം സാധാരണയായി കണ്ടുവരുന്ന മൂത്രാശയ അണുബാധയുമായി (യൂറിനറി ട്രാക്റ്റ് ഇൻഫെക്ഷൻ) വളരെ സാമ്യമുള്ളവയാണ്. അതുകൊണ്ട് തന്നെ പ്രായമുള്ള പുരുഷന്മാർ ഇതിനെ പ്രോസ്റ്റേറ്റ് ഗ്രന്ഥിയുടെ പ്രശ്നമായും, സ്ത്രീകൾ സാധാരണ അണുബാധയായും സ്വയം വിലയിരുത്തി വേദനസംഹാരികളോ ആന്റിബയോട്ടിക്കുകളോ കഴിച്ച് താൽക്കാലിക ആശ്വാസം കണ്ടെത്തുന്നു. ഡോക്ടർമാരുടെ നിർദ്ദേശമില്ലാതെയുള്ള ഇത്തരം ചികിത്സകൾ യഥാർത്ഥ രോഗം കണ്ടുപിടിക്കുന്നത് വീണ്ടും വൈകിപ്പിക്കുന്നു.

രോഗം മൂർച്ഛിക്കുമ്പോഴുള്ള അപകടസൂചനകൾ

രോഗം മൂത്രാശയത്തിന്റെ അതിരുകൾ ഭേദിച്ച് മറ്റ് അവയവങ്ങളിലേക്ക് പടരുന്ന അവസ്ഥയിലാണ് പലപ്പോഴും വേദനയോ മറ്റ് ഗുരുതരമായ ലക്ഷണങ്ങളോ പ്രകടമാകുന്നത്. നടുവിന്റെ ഒരു വശത്തായി അനുഭവപ്പെടുന്ന കടുത്ത വേദന ഇതിന്റെ ഒരു പ്രധാന ലക്ഷണമാണ്. കാൻസർ മുഴകൾ വളർന്ന് വൃക്കകളിൽ നിന്നുള്ള മൂത്രപ്രവാഹത്തെ തടസ്സപ്പെടുത്തുമ്പോഴാണ് ഈ വേദന ഉണ്ടാകുന്നത്. ഇതിനുപുറമെ പെൽവിക് ഭാഗത്ത് അനുഭവപ്പെടുന്ന വേദന, കാരണമില്ലാതെ പെട്ടെന്ന് ശരീരഭാരം കുറയുക, കടുത്ത ക്ഷീണം അനുഭവപ്പെടുക, കാലുകളിൽ നീര് വരിക, എല്ലുകളിൽ വേദന അനുഭവപ്പെടുക എന്നിവയെല്ലാം അർബുദം ശരീരത്തിന്റെ മറ്റ് ഭാഗങ്ങളിലേക്ക് പടർന്നു എന്നതിന്റെ സൂചനകളാണ്. ഈ ഘട്ടത്തിൽ ചികിത്സ ആരംഭിക്കുന്നത് പലപ്പോഴും ഫലപ്രദമാകണമെന്നില്ല.

പ്രധാന കാരണങ്ങളും അപകട സാധ്യതകളും

മൂത്രാശയ കാൻസറിന് കാരണമാകുന്ന ഘടകങ്ങളിൽ ഏറ്റവും മുൻപന്തിയിൽ നിൽക്കുന്നത് പുകവലിയാണ്. പുകവലിക്കുമ്പോൾ ശരീരത്തിൽ പ്രവേശിക്കുന്ന മാരകമായ രാസവസ്തുക്കൾ രക്തത്തിൽ കലരുകയും, വൃക്കകൾ ഈ രക്തം ശുദ്ധീകരിക്കുമ്പോൾ ഈ രാസവസ്തുക്കൾ മൂത്രത്തിലൂടെ പുറന്തള്ളപ്പെടുകയും ചെയ്യുന്നു. ഇങ്ങനെ പുറന്തള്ളപ്പെടുന്ന മൂത്രം മണിക്കൂറുകളോളം മൂത്രാശയത്തിൽ കെട്ടിക്കിടക്കുമ്പോൾ അതിലെ കാർസിനോജനുകൾ മൂത്രാശയ ഭിത്തികളിലെ കോശങ്ങളെ നശിപ്പിക്കുകയും അവ കാൻസർ കോശങ്ങളായി മാറാൻ കാരണമാവുകയും ചെയ്യുന്നു. പുകവലിക്കാത്തവരെ അപേക്ഷിച്ച് പുകവലിക്കുന്നവർക്ക് മൂത്രാശയ കാൻസർ വരാനുള്ള സാധ്യത മൂന്നിരട്ടി കൂടുതലാണ്.

പുകവലിക്ക് പുറമെ ചില പ്രത്യേക തൊഴിൽ സാഹചര്യങ്ങളും ഈ കാൻസറിന് കാരണമാകാറുണ്ട്. പെയിന്റ്, റബ്ബർ, തുകൽ, തുണിത്തരങ്ങൾ എന്നിവ നിർമ്മിക്കുന്ന ഫാക്ടറികളിൽ ജോലി ചെയ്യുന്നവരിൽ സ്ഥിരമായി രാസവസ്തുക്കളുമായി സമ്പർക്കം പുലർത്തുന്നത് മൂത്രാശയ കാൻസർ സാധ്യത വർദ്ധിപ്പിക്കുന്നു. കൂടാതെ പ്രായം വർദ്ധിക്കുന്നതും ഒരു പ്രധാന ഘടകമാണ്. ഭൂരിഭാഗം മൂത്രാശയ കാൻസർ കേസുകളും അൻപത്തിയഞ്ച് വയസ്സിന് മുകളിലുള്ളവരിലാണ് കണ്ടുവരുന്നത്. സ്ത്രീകളെ അപേക്ഷിച്ച് പുരുഷന്മാരിലാണ് ഈ കാൻസർ കൂടുതലായി കണ്ടുവരുന്നതെങ്കിലും, സ്ത്രീകളിൽ ഇത് പലപ്പോഴും വൈകി മാത്രം കണ്ടുപിടിക്കപ്പെടുന്നതിനാൽ കൂടുതൽ അപകടകരമായി മാറാറുണ്ട്.

നേരത്തെയുള്ള തിരിച്ചറിയലും ചികിത്സാ രീതികളും

ഏതൊരു അർബുദത്തെയും പോലെ മൂത്രാശയ കാൻസറും നേരത്തെ കണ്ടെത്തിയാൽ പൂർണ്ണമായും ചികിത്സിച്ചു ഭേദമാക്കാം. വേദനയില്ലാത്ത രക്തസ്രാവം ഉണ്ടായാൽ ഉടനടി ഒരു യൂറോളജിസ്റ്റിനെ സമീപിക്കുകയാണ് ചെയ്യേണ്ടത്. മൂത്ര പരിശോധനയിലൂടെ കാൻസർ കോശങ്ങളുടെ സാന്നിധ്യം കണ്ടെത്താൻ കഴിയും. ഇതിനുപുറമെ അൾട്രാസൗണ്ട് സ്കാനിംഗ്, സിടി യൂറോഗ്രാം എന്നിവയിലൂടെ മൂത്രാശയത്തിലെ മുഴകൾ തിരിച്ചറിയാം. ക്യാമറ ഘടിപ്പിച്ച ചെറിയ ട്യൂബ് മൂത്രനാളിയിലൂടെ കടത്തിവിട്ട് മൂത്രാശയത്തിന്റെ ഉൾഭാഗം നേരിട്ട് പരിശോധിക്കുന്ന സിസ്റ്റോസ്കോപ്പി എന്ന പരിശോധനയാണ് രോഗം സ്ഥിരീകരിക്കുന്നതിനുള്ള ഏറ്റവും മികച്ച മാർഗ്ഗം. ഈ പരിശോധനയിലൂടെ കാൻസർ കോശങ്ങളുടെ സാമ്പിളുകൾ ശേഖരിച്ച് ബയോപ്സിക്ക് അയക്കാൻ സാധിക്കും. രോഗത്തിന്റെ തീവ്രതയും കാൻസർ ഏത് ഘട്ടത്തിലാണെന്നും മനസ്സിലാക്കിയ ശേഷമാണ് ചികിത്സ തീരുമാനിക്കുന്നത്. സർജറിയിലൂടെ മുഴകൾ നീക്കം ചെയ്യുന്നതും, കീമോതെറാപ്പി, ഇമ്മ്യൂണോതെറാപ്പി റേഡിയേഷൻ എന്നിവയുമാണ് നിലവിലെ പ്രധാന ചികിത്സാ രീതികൾ.

ഒരു തവണ വന്നാൽ വീണ്ടും വരാൻ ഏറ്റവുമധികം സാധ്യതയുള്ള അർബുദങ്ങളിലൊന്നാണ് മൂത്രാശയ കാൻസർ. അതിനാൽ ചികിത്സ കഴിഞ്ഞാലും കൃത്യമായ ഇടവേളകളിൽ പരിശോധനകൾ തുടരേണ്ടത് അത്യന്താപേക്ഷിതമാണ്. ശരീരത്തിൽ പ്രകടമാകുന്ന, വിശേഷിച്ച് വേദനയില്ലാത്ത ലക്ഷണങ്ങളെ ഒരിക്കലും അവഗണിക്കരുത്. രക്തസ്രാവം വേദനയില്ലാത്തതാണെങ്കിൽ അത് കൂടുതൽ ഗൗരവമുള്ളതാണെന്ന യാഥാർത്ഥ്യം നാം തിരിച്ചറിയണം. കൃത്യമായ അവബോധവും സമയബന്ധിതമായ പരിശോധനകളും ചികിത്സയും വഴി മൂത്രാശയ കാൻസർ എന്ന നിശ്ശബ്ദ കൊലയാളിയെ നമുക്ക് പരാജയപ്പെടുത്താൻ സാധിക്കും.

ഡോ. മുഹമ്മദ് ഷാഫി .കെ

സീനിയർ മെഡിക്കൽ ഓങ്കോളജി

ആസ്റ്റർ മിംസ് കാസറഗോഡ്