രുചിയും ഗന്ധവും നഷ്ടപ്പെടുന്നുവോ, കരുതണം പാര്‍ക്കിൻസൺസ് രോഗത്തെ

ലോകത്ത് ഏറ്റവും വേഗത്തിൽ വ്യാപിക്കുന്ന നാഡീസംബന്ധമായ അസുഖമാണ് പാർക്കിൻസൺസ്. ലോകമെമ്പാടും ഒരു കോടിയിലധികം ആളുകൾ ഈ രോഗവുമായി ജീവിക്കുന്നു. ഓസ്ട്രേലിയയിൽ മാത്രം ഒന്നരലക്ഷം ആളുകൾക്ക് ഈ രോഗമുണ്ടെന്നാണ് കണക്ക്. അവിടെ മാത്രം ദിവസവും 50പേർക്ക് പുതുതായി പാർക്കിൻസൺസ് സ്ഥിരീകരിക്കുന്നുണ്ട്.

2020നും 2050നും ഇടയിൽ പാർക്കിൻസൺസ് ബാധിതരുടെ എണ്ണം മൂന്നിരട്ടിയിലധികം വർദ്ധിക്കുമെന്നാണ് പ്രവചനം. രോഗികളിൽ മാത്രമല്ല അവരുടെ കുടുംബങ്ങളിലും ഈ അസുഖം ചെലുത്തുന്ന സ്വാധീനം വലുതാണ്. ഓസ്ട്രേലിയൻ സമ്പദ് വ്യസ്ഥയ്ക്ക് പ്രതിവർഷം 10ബില്യൺ ഓസ്ട്രേലിയൻ ഡോളറിലധികം നഷ്ടം ഉണ്ടാക്കുന്നു. ഈ രോഗത്തെക്കുറിച്ച് ഇനിയും വ്യക്തമാകാത്ത നിരവധി കാര്യങ്ങളുണ്ട്.

ഓസ്ട്രേലിയയിൽ പാർക്കിൻസൺസ് രോഗമുള്ള ഏകദേശം 11,000പേരിൽ പുതുതായി നടത്തിയ വിപുലമായ പഠനം,രോഗലക്ഷണങ്ങൾ,അപകട ഘടകങ്ങൾ,പുരുഷന്മാരെയും സ്ത്രീകളെയും രോഗം എങ്ങനെ വ്യത്യസ്തമായി ബാധിക്കുന്നു എന്നിവയെക്കുറിച്ച് നിർണായകമായ ഉൾക്കാഴ്ചകൾ നൽകുന്നു.

എന്താണ് പാർക്കിൻസൺസ് രോഗം

തലച്ചോറിലെ 'സബ്സ്റ്റാൻഷ്യ നൈഗ്ര'എന്ന ഭാഗത്ത് ഡോപാമൈൻ എന്ന രാസ സന്ദേശവാഹകൻ ഉത്പാദിപ്പിക്കുന്ന കോശങ്ങൾ നശിക്കാൻ തുടങ്ങുന്ന ഒരു രോഗമാണിത്. ഇത് സാധാരണയായി ഒരു ചലന വൈകല്യമായി കണക്കാക്കപ്പെടുന്നു. വിശ്രമവേളയിലുള്ള വിറയൽ,ചലനങ്ങളുടെ മന്ദത,പേശികളുടെ കാഠിന്യം,ബാലൻസ് പ്രശ്നങ്ങൾ എന്നിവയാണ് സാധാരണ ലക്ഷണങ്ങൾ.

എന്നാൽ ചലനവുമായി നേരിട്ട് ബന്ധമില്ലാത്ത മറ്റ് ലക്ഷണങ്ങളും പാർക്കിൻസൺസിനുണ്ട്. മാനസികാവസ്ഥയിലെ മാറ്റങ്ങൾ

ഓർമ്മക്കുറവ്,ചിന്താശേഷിയിലെ കുറവ്, ഉറക്ക തകരാറുകൾ, മലബന്ധം,ര ക്തസമ്മർദ്ദത്തിലെ ഏറ്റക്കുറച്ചിലുകൾ തുടങ്ങിയ ഓട്ടോണമിക് നാഡീവ്യൂഹത്തിലെ തകരാറുകൾ. ഇവയെ പലപ്പോഴും പാർക്കിൻസൺസിന്റെ 'അദൃശ്യ'ലക്ഷണങ്ങൾ എന്ന് വിളിക്കുന്നു.ഇവ പലപ്പോഴും ചലന ലക്ഷണങ്ങളേക്കാൾ ജീവിതത്തെ മോശമായി ബാധിക്കുന്നു.

പുതിയ പഠനം എന്താണ് പറയുന്നത്

ക്യൂഎംആർ ബെർഗോഫർ മെഡിക്കൽ റിസർച്ച് ഇൻസ്റ്റിറ്റ്യൂട്ടിന്റെ നേതൃത്വത്തിൽ നടന്ന ഓസ്ട്രേലിയൻ പാർക്കിൻസൺസ് ജനറ്റിക്സ് പഠനത്തിന്റെ ഭാഗമായി ശേഖരിച്ച ഡാറ്റയാണ് പുതിയ പഠനത്തിൽ ഉപയോഗിച്ചത്. 10,929ഓസ്ട്രേലിയക്കാരെ ഈ പഠനത്തിനായി സർവേ ചെയ്യുകയും അവരുടെ ഉമിനീരിന്റെ സാമ്പിളുകൾ ശേഖരിക്കുകയും ചെയ്തു.ഓസ്ട്രേലിയയിൽ ഇതുവരെ പഠനവിധേയമാക്കിയതിൽ വച്ച് ഏറ്റവും വലിയ പാർക്കിൻസൺസ് രോഗികളുടെ കൂട്ടമാണിത്.

പ്രധാന കണ്ടെത്തലുകൾ

1.ചലനേതര ലക്ഷണങ്ങൾ സാധാരണമാണ്: ഗന്ധം നഷ്ടപ്പെടൽ (52%),ഓർമ്മക്കുറവ് (65%),വേദന (66%) തലകറക്കം (66%) എന്നിവ സാധാരണമാണെന്ന് പഠനം വ്യക്തമാക്കി. 96%പേർക്കും ഉറക്കമില്ലായ്മ,പകൽ മയക്കം തുടങ്ങിയ ഉറക്ക തകരാറുകൾ ഉണ്ടായിരുന്നു.

2.അപകട ഘടകങ്ങളെക്കുറിച്ച് വ്യക്തത: പ്രായമാണ് പാർക്കിൻസൺസിന്റെ പ്രധാന അപകട ഘടകം.രോഗലക്ഷണങ്ങൾ ആരംഭിക്കുന്നതിന്റെ ശരാശരി പ്രായം 64ഉം രോഗനിർണയത്തിന്റെ ശരാശരി പ്രായം 68ഉം ആണെന്ന് പുതിയ പഠനം കണ്ടെത്തി.

3.ജീനുകളും പരിസ്ഥിതിയും പ്രധാനമാണ്: നാലിൽ ഒരാൾക്ക് (25%) പാർക്കിൻസൺസിന്റെ കുടുംബ ചരിത്രമുണ്ടായിരുന്നു. എന്നാൽ 10-15% കേസുകൾ മാത്രമേ നിർദ്ദിഷ്ട ജീൻ മ്യൂട്ടേഷനുകൾ മൂലമുണ്ടാകുന്നുള്ളൂ. കീടനാശിനി എക്സ്പോഷർ,തലയ്ക്കേറ്റ ക്ഷതം തുടങ്ങിയ ഒന്നിലധികം പാരിസ്ഥിതിക ഘടകങ്ങളും പാർക്കിൻസൺസ് സാധ്യത വർദ്ധിപ്പിക്കുന്നു. 36%പേർക്ക് കീടനാശിനി എക്സ്പോഷർ ഉണ്ടായിരുന്നു. 16%പേർക്ക് മുമ്പ് തലയ്ക്ക് പരിക്കേറ്റ ചരിത്രമുണ്ടായിരുന്നു. 33%പേർ അപകടകരമായ തൊഴിൽ മേഖലകളിൽ (കൃഷി,പെട്രോകെമിക്കൽസ്,ലോഹ സംസ്കരണം)ജോലി ചെയ്തിരുന്നു. ഇത്തരം എക്സ്പോഷറുകൾ പുരുഷന്മാരിൽ സ്ത്രീകളേക്കാൾ വളരെ കൂടുതലായിരുന്നു.

4.ലിംഗ വ്യത്യാസങ്ങൾ: പുരുഷന്മാരിലാണ് രോഗം 1.5 മടങ്ങ് കൂടുതലായി കണ്ടുവരുന്നത്. പുതിയ പഠനത്തിൽ പങ്കെടുത്തവരിൽ 63% പുരുഷന്മാരായിരുന്നു.പുരുഷന്മാരിലും സ്ത്രീകളിലും പാർക്കിൻസൺസ് വ്യത്യസ്തമായാണ് കാണപ്പെടുന്നത്. രോഗലക്ഷണങ്ങൾ ആരംഭിക്കുമ്പോൾ സ്ത്രീകൾ പുരുഷന്മാരേക്കാൾ പ്രായം കുറഞ്ഞവരായിരുന്നു (63.7വയസ്സ്, 64.4വയസ്സ്).

സ്ത്രീകളിൽ വേദന (70% - 63%),വീഴ്ചകൾ (45% - 41%)എന്നിവ കൂടുതലായിരുന്നു. പുരുഷന്മാരിൽ ഓർമ്മക്കുറവ് (67% - 61%),ആവേശകരമായ പെരുമാറ്റങ്ങൾ (പ്രത്യേകിച്ച് ലൈംഗിക പെരുമാറ്റം - 56% - 19%) എന്നിവ കൂടുതലായിരുന്നു.

ഇപ്പോഴും അറിയാത്തത് എന്തൊക്കെ

വലിയ തോതിലുള്ള ഈ പഠനം വിലപ്പെട്ട വിവരങ്ങൾ നൽകുന്നും ,ഇത് ജനസംഖ്യയുടെ ഒരു ചെറിയ ഭാഗം മാത്രമാണ് പ്രതിനിധീകരിക്കുന്നത്. പങ്കെടുത്തവരിൽ 93%പേർക്കും യൂറോപ്യൻ വംശജരായിരുന്നു. അതിനാൽ ഈ സാമ്പിൾ പാർക്കിൻസൺസ് രോഗത്തെ പൂർണമായി പ്രതിനിധീകരിക്കുന്നുണ്ടാകണമെന്നില്ല. രോഗലക്ഷണങ്ങളെക്കുറിച്ചുള്ള വിവരങ്ങൾ പങ്കെടുത്തവരുടെ സ്വയം റിപ്പോർട്ടുകളെ ആശ്രയിച്ചാണ്,അവ ആത്മനിഷ്ഠമാകാം.

പാർക്കിൻസൺസുമായി ബന്ധപ്പെട്ട അപകട ഘടകങ്ങളെക്കുറിച്ചും ആളുകൾ അനുഭവിക്കുന്ന രോഗലക്ഷണങ്ങളെക്കുറിച്ചും മനസ്സിലാക്കാൻ ഇത്തരം പഠനങ്ങൾ സഹായിക്കുന്നു. പാർക്കിൻസൺസ് ഓരോ വ്യക്തിയിലും വ്യത്യസ്തമായാണ് പ്രകടമാകുന്നത്. എല്ലാവർക്കും ഒരേ ലക്ഷണങ്ങൾ ഒരേ അളവിൽ ഉണ്ടാകണമെന്നില്ല. അതുപോലെ,കാലക്രമേണ രോഗത്തിന്റെ പുരോഗതിയും വ്യത്യാസപ്പെട്ടിരിക്കുന്നു. ഇതിനെ സ്വാധീനിക്കുന്ന ഘടകങ്ങളെക്കുറിച്ച് നന്നായി മനസ്സിലാക്കുന്നത്,ആർക്കൊക്കെ രോഗസാധ്യത കൂടുതലാണെന്ന് നേരത്തെ കണ്ടെത്തുന്നതിനും രോഗത്തെ കൂടുതൽ വ്യക്തിഗതമായി കൈകാര്യം ചെയ്യുന്നതിനും സഹായിക്കും.