നിരോധനം മറിടകന്ന് ടിക് ടോക് വീണ്ടും വരുമോ, ചൈന യുഎസ് ധാരണയായി

സാമൂഹികമാധ്യമമായ ടിക്‌ടോക് സംബന്ധിച്ച വ്യാപാര തർക്കത്തിൽ ചൈനയുമായി പ്രാഥമിക കരാറുണ്ടാക്കിയതായി യുഎസ്. ഇതു പ്രകാരം ടിക്‌ടോക് യുഎസ് നിയന്ത്രിത ഉടമസ്ഥതയിലേക്കു മാറുമെന്ന് ട്രഷറി സെക്രട്ടറി സ്കോട്ട് ബെസന്റ് അറിയിച്ചു.

ചൈനീസ് കമ്പനിയായ ബൈറ്റ്ഡാൻസിന്റെ ഉടമസ്ഥതയിലുള്ള ടിക്‌ടോക് യുഎസ് കമ്പനിക്ക് വിൽക്കുന്നതിന് ചർച്ചകളിൽ ധാരണയായി. വിൽപ്പന നടന്നില്ലെങ്കിൽ ടിക്‌ടോക് നിരോധിക്കുമെന്നായിരുന്നു ട്രംപിന്റെ ഭീഷണി.

ടിക്‌ടോക്കിന്റെ കാര്യത്തിൽ കരാർ രൂപരേഖയായെന്ന വിവരം ‘ട്രൂത്ത് സോഷ്യലി’ലൂടെ ട്രംപ്‌ തന്നെയാണ് ആദ്യം അറിയിച്ചത്.

മഡ്രിഡിലെ ചർച്ചയിൽ യുഎസ് പ്രതിനിധിസംഘത്തെ നയിച്ച ട്രഷറി സെക്രട്ടറി സ്കോട്ട് ബെസന്റ്, ചൈനീസ് വൈസ് പ്രീമിയർ ഹി ലൈഫെങ്ങുമായി തിങ്കളാഴ്ച നടത്തിയ ചർച്ചയിലാണ് ടിക്‌ടോക്കിന്റെ കാര്യത്തിൽ ധാരണയായത്. ട്രംപും ഷിയും വെള്ളിയാഴ്ച കൂടിക്കാഴ്ച നടത്തുന്നതായും അറിയിച്ചു.

ഇന്ത്യയിലെ സുരക്ഷാ കടമ്പ കടന്നു

രാജ്യസുരക്ഷയുടെ പ്രശ്നം ഉയർത്തിയാണ് യുഎസ് ടിക്‌ടോക് നിരോധിക്കാൻ ഒരുമ്പെട്ടത്. ചൈനയുമായി ഉണ്ടായ പ്രശ്നത്തോടെ ഇന്ത്യയിലും ഇത് നിരോധിച്ചിരിക്കയാണ്. അമേരിക്കൻ ഉടമസ്ഥതയിലേക്ക് മാറുന്നതോടെ ഈ  സോഷ്യൽ മീഡിയ ഭീമനുള്ള ഇന്ത്യൻ വിപണി വീണ്ടും തുറക്കുന്നതും സ്വാഭാവികമായും അജണ്ടയിലെത്തും. നിരോധനത്തിന് കാരണമായ സുരക്ഷാ പ്രശ്നങ്ങൾ പരിഹരിക്കപ്പെട്ട സാഹചര്യമാണ് ഉണ്ടാവുന്നത്.

ഇന്ത്യയ്ക്ക് പുറത്തുള്ള ഇന്ത്യൻ ലേബലുകളുടെയും കലാകാരന്മാരുടെയും മാർക്കറ്റിംഗ്, പ്രൊമോഷണൽ പദ്ധതികളുടെ അവിഭാജ്യ ഘടകമായി ആപ്പ് തുടരുന്നുണ്ട്. 2020 ജൂണിൽ രാജ്യത്ത് പ്രവർത്തനം അവസാനിപ്പിച്ചതിന് ശേഷം ടിക് ടോക് തിരിച്ചു വരുന്നതായി പലതവണ ചർച്ചകൾ ഉയർന്നിരുന്നു. ദേശീയ സുരക്ഷാ ആശങ്കകൾ ചൂണ്ടിക്കാട്ടിയാണ് സർക്കാർ ടിക് ടോക്കിനെയും ഷെയറിറ്റ്, കാംസ്‌കാനർ എന്നിവയുൾപ്പെടെ 58 ചൈനീസ് ആപ്പുകളെയും (Section 69A of the IT Act) ആദ്യം നിരോധിച്ചത്.

ഇപ്പോൾ ഇന്ത്യയിലെ ചില ഉപയോക്താക്കൾക്ക് പ്ലാറ്റ്‌ഫോമിന്റെ വെബ്‌സൈറ്റ് ആക്‌സസ് ചെയ്യാൻ കഴിയുന്നതായി റിപ്പോർട് ചെയ്യപ്പെട്ടു. ഇത് തിരിച്ചുവരവിന് സാധ്യതയുണ്ടെന്ന വ്യാപകമായ ഊഹാപോഹങ്ങൾക്ക് കാരണമായി. എന്നാൽ ഗൂഗിൾ പ്ലേ സ്റ്റോറിലും ആപ്പ് സ്റ്റോറിലും ആപ്പ് ലഭ്യമല്ല. തിരിച്ചുവരവ് സംബന്ധിച്ച് കമ്പനിയിൽ നിന്ന് ഒരു പ്രസ്താവനയും ഇല്ല. നിരോധനവും തുടരുകയാണ്.

2021 ഓഗസ്റ്റിൽ കമ്പനി വിട്ട ബൈറ്റ്ഡാൻസിന്റെ നിയമ മേധാവി ഗൗതം വോറ ഈ വർഷം ആദ്യം ബൈറ്റ്ഡാൻസിൽ ദക്ഷിണേഷ്യ, മിഡിൽ ഈസ്റ്റിലെ പ്രാദേശിക കൗൺസിലിന്റെ നിയമ മേധാവിയായി തിരിച്ചെത്തിയിരുന്നു. ഇന്ത്യയിൽ ആപ്പ് വീണ്ടും ആരംഭിച്ചാലും, ഇൻസ്റ്റാഗ്രാം (റീൽസ്), യൂട്യൂബ് (ഷോർട്ട്സ്), സ്നാപ്ചാറ്റ്, ചിംഗാരി, ഷെയർചാറ്റ്, എംഎക്സ് തകാടക്, മോജ്, ജോഷ് തുടങ്ങിയ ആപ്പുകളിൽ നിന്ന് കടുത്ത മത്സരം നേരിടേണ്ടിവരും.