ഫെയ്‌സ്ബുക്കിനും ഇൻസ്റ്റാഗ്രാമിനും വാട്സാപ്പിനും ഇനി 'പ്ലസ്' വരിസംഖ്യ; എഐ അധിഷ്ഠിത പ്ലാനുകളുമായി മെറ്റ

ന്യൂഡൽഹി: സോഷ്യൽ മീഡിയ പ്ലാറ്റ്‌ഫോമുകളായ ഫെയ്‌സ്ബുക്ക്, ഇൻസ്റ്റാഗ്രാം, വാട്സാപ്പ് എന്നിവയ്ക്ക് പ്രത്യേകമായി പണം നൽകി ഉപയോഗിക്കാവുന്ന 'പ്ലസ്' സബ്‌സ്‌ക്രിപ്ഷൻ പ്ലാനുകൾ പ്രഖ്യാപിച്ച് മെറ്റ.

പ്ലാറ്റ്‌ഫോമുകളിലെ സാധാരണ ഫീച്ചറുകൾക്ക് പുറമെ പ്രൊഫൈൽ കസ്റ്റമൈസേഷൻ, മികച്ച അനലിറ്റിക്സ് തുടങ്ങിയ അധിക സൗകര്യങ്ങൾ ആഗ്രഹിക്കുന്നവർക്കായാണ് ഈ പ്രീമിയം സേവനം അവതരിപ്പിച്ചിരിക്കുന്നത്.

'മെറ്റാ വൺ' എന്ന പേരിൽ തങ്ങളുടെ എല്ലാ സബ്‌സ്‌ക്രിപ്ഷൻ ഉൽപന്നങ്ങളെയും ഒറ്റക്കുടക്കീഴിൽ കൊണ്ടുവരാനുള്ള തയാറെടുപ്പിലാണ് കമ്പനി. തിരഞ്ഞെടുത്ത ഉപയോക്താക്കൾക്കായി നിലവിൽ ലഭ്യമാക്കിയിട്ടുള്ള ഇൻസ്റ്റാഗ്രാം പ്ലസ്, ഫെയ്‌സ്ബുക്ക് പ്ലസ് എന്നിവയ്ക്ക് പ്രതിമാസം 3.99 ഡോളർ (ഏകദേശം 350 രൂപ) വീതമാണ് ഈടാക്കുക.

വാട്സാപ്പ് പ്ലസ് സബ്‌സ്‌ക്രിപ്ഷൻ നിരക്ക് പ്രതിമാസം 2.99 ഡോളറാണ് (ഏകദേശം 280 രൂപ). എന്നാൽ ഇന്ത്യയിലെ ഇതിന്റെ കൃത്യമായ പ്ലാൻ നിരക്കുകൾ മെറ്റ ഇതുവരെ ഔദ്യോഗികമായി പുറത്തുവിട്ടിട്ടില്ല.

ഈ പ്ലസ് പ്ലാനുകൾ വഴി കൂടുതൽ സ്റ്റോറി ഇൻസൈറ്റുകൾ, സൂപ്പർ റിയാക്ഷനുകൾ, വിപുലമായ ചാറ്റ് മാനേജ്‌മെന്റ് സൗകര്യങ്ങൾ (ഉദാഹരണത്തിന് വാട്സാപ്പിൽ 20 ചാറ്റുകൾ വരെ പിൻ ചെയ്യാനുള്ള സൗകര്യം) എന്നിവ ഉപയോക്താക്കൾക്ക് ലഭിക്കും.

സാധാരണ പ്ലസ് പ്ലാനുകൾക്ക് പുറമെ, മെറ്റാ എഐ കൂടുതൽ മികച്ച രീതിയിൽ ഉപയോഗിക്കാൻ താല്പര്യപ്പെടുന്നവർക്കായി രണ്ട് എഐ അധിഷ്ഠിത പ്ലാനുകളും കമ്പനി അവതരിപ്പിച്ചു. 'മെറ്റാ വൺ പ്ലസ്', 'മെറ്റാ വൺ പ്രീമിയം' എന്നിങ്ങനെയാണ് ഇവയുടെ പേര്.

മെറ്റാ വൺ പ്ലസ്: പ്രതിമാസം 7.99 ഡോളർ (ഏകദേശം 760 രൂപ), മെറ്റാ വൺ പ്രീമിയം: പ്രതിമാസം 19.99 ഡോളർ (ഏകദേശം 1,920 രൂപ) എന്നിങ്ങനെയാണ് നിരക്ക്.

മെറ്റാ എഐ സാധാരണക്കാർക്ക് തികച്ചും സൌജന്യമായി തുടരുമെങ്കിലും, ഈ പ്രീമിയം പ്ലാനുകൾ എടുക്കുന്നവർക്ക് സങ്കീർണ്ണമായ കമ്പ്യൂട്ടിംഗ് പ്രക്രിയകൾ വളരെ വേഗത്തിൽ ചെയ്യാനും ആഴത്തിലുള്ള ഡീപ് റീസണിങ് നടത്താനും സാധിക്കും.

കൂടാതെ കൂടുതൽ മികച്ച രീതിയിൽ ചിത്രങ്ങളും വീഡിയോകളും നിർമ്മിക്കാനുള്ള ആക്സസും ഇതിലൂടെ ലഭിക്കും. മെറ്റായുടെ എഐ സ്മാർട്ട് ഗ്ലാസുകൾ ഉപയോഗിക്കുന്നവർക്കും ഈ പ്ലാനുകൾ കൂടുതൽ പ്രയോജനം ചെയ്യും.

അടുത്ത മാസം മുതൽ സിംഗപ്പൂർ, ഗ്വാട്ടിമാല, ബൊളീവിയ തുടങ്ങിയ രാജ്യങ്ങളിൽ ഈ എഐ പ്ലാനുകളുടെ പരീക്ഷണം ആരംഭിക്കുമെന്ന് മെറ്റ വ്യക്തമാക്കി.