"ഇതൊരു പുതിയ യാഥാർത്ഥ്യം"; പരിക്കുകൾ വിടാതെ പിന്തുടരുന്നതിൽ ആശങ്ക പങ്കുവെച്ച് ജോക്കോവിച്ച്

റോം: രണ്ടു മാസത്തെ ഇടവേളയ്ക്ക് ശേഷം ടെന്നീസ് കോർട്ടിലേക്ക് തിരിച്ചെത്തിയ നോവാക് ജോക്കോവിച്ചിനെ പരിക്കുകളും ശാരീരിക അസ്വസ്ഥതകളും വീണ്ടും വലയ്ക്കുന്നു.

ഇറ്റാലിയൻ ഓപ്പൺ രണ്ടാം റൗണ്ടിൽ 20 കാരനായ ക്രൊയേഷ്യൻ താരം ഡിനോ പ്രിസ്മിച്ചിനോടേറ്റ തോൽവിക്ക് പിന്നാലെ, തന്റെ കരിയർ ഇപ്പോൾ പരിക്കുകളുമായുള്ള നിരന്തര പോരാട്ടമാണെന്ന് 38-കാരനായ ജോക്കോവിച്ച് തുറന്നു സമ്മതിച്ചു.

വലതു തോളിലെ പരിക്കിനെത്തുടർന്ന് മാർച്ചിലെ ഇന്ത്യൻ വെൽസിന് ശേഷം താരം കളിക്കുന്ന ആദ്യ മത്സരമായിരുന്നു ഇത്. കോർട്ടിലിറങ്ങിയ ജോക്കോവിച്ചിന്റെ തോളിൽ വലിയ രീതിയിൽ ബാൻഡേജ് ചുറ്റിയിരുന്നത് പരിക്കിന്റെ ഗൗരവം വ്യക്തമാക്കുന്നതായിരുന്നു.

ആദ്യ സെറ്റ് ആധിപത്യത്തോടെ സ്വന്തമാക്കിയെങ്കിലും, കളിയുടെ മധ്യത്തിൽ തോളിലെ വേദനയും ശാരീരിക തളർച്ചയും താരത്തെ ബാധിച്ചു.

"സത്യം പറഞ്ഞാൽ ഇതൊരു മികച്ച തയ്യാറെടുപ്പല്ല. കഴിഞ്ഞ കുറച്ച് വർഷങ്ങളായി ശാരീരിക പ്രശ്നങ്ങളില്ലാതെ ഒരു ടൂർണമെന്റിന് വരാൻ എനിക്ക് സാധിച്ചിട്ടില്ല.

എപ്പോഴും എന്തെങ്കിലും പരിക്കുകൾ ഉണ്ടാകാറുണ്ട്. ഇത് ഞാൻ നേരിടേണ്ടി വരുന്ന ഒരു പുതിയ യാഥാർത്ഥ്യമാണ്," ജോക്കോവിച്ച് മാധ്യമങ്ങളോട് പറഞ്ഞു. തന്റെ കായികക്ഷമത പഴയ നിലവാരത്തിലല്ലെന്നും ഓരോ മത്സരവും വലിയ വെല്ലുവിളിയാണെന്നും അദ്ദേഹം കൂട്ടിച്ചേർത്തു.

ശാരീരിക ബുദ്ധിമുട്ടുകളെക്കുറിച്ചുള്ള കൂടുതൽ ചോദ്യങ്ങളിൽ നിന്ന് അദ്ദേഹം ഒഴിഞ്ഞുമാറിയെങ്കിലും, ഫ്രഞ്ച് ഓപ്പണിന് രണ്ടാഴ്ച മാത്രം ബാക്കിനിൽക്കെ ജോക്കോവിച്ചിന്റെ ഫിറ്റ്‌നസ് വലിയ ആശങ്കയാണ് ഉയർത്തുന്നത്. ഇറ്റാലിയൻ ഓപ്പണിന്റെ 19 വർഷത്തെ ചരിത്രത്തിൽ ആദ്യമായാണ് താരം ഇത്ര നേരത്തെ പുറത്താകുന്നത്.

മതിയായ ശാരീരികക്ഷമതയില്ലാതെ 25-ാം ഗ്രാൻഡ് സ്ലാം എന്ന റെക്കോർഡ് നേട്ടത്തിലേക്ക് ജോക്കോവിച്ചിന് എത്താൻ സാധിക്കുമോ എന്ന ആകാംക്ഷയിലാണ് ആരാധകർ.