ജൊകോ കുതിപ്പ്‌

ന്യൂയോർക്ക്‌

ഇരുപത്തഞ്ചാം ഗ്രാൻഡ്‌ സ്ലാം കിരീടം ലക്ഷ്യമിട്ടിറങ്ങിയ നൊവാക്‌ ജൊകോവിച്ച്‌ യു എസ്‌ ഓപ്പൺ ടെന്നീസിൽ ക്വാർട്ടറിൽ കടന്നു. ജർമനിക്കാരൻ യാൻ ലെന്നാർഡ്‌ സ്‌ട്രഫിനെ നേരിട്ടുള്ള സെറ്റുകൾക്ക്‌ തോൽപ്പിച്ചായിരുന്നു മുന്നേറ്റം (6–3, 6–3, 6–2). മത്സരത്തിനിടെ പരിക്കുകാരണം സെർബിയക്കാരന്‌ രണ്ട്‌ തവണ പരിശോധന വേണ്ടിവന്നു.

വിംബിൾഡൺ സെമിഫൈനൽ തോൽവിക്കുശേഷം ആദ്യ ടൂർണമെന്റിന്‌ ഇറങ്ങിയ ജൊകോ യുഎസ്‌ ഓപ്പണിൽ മികച്ച പ്രകടനത്തോടെയാണ്‌ മുന്നേറുന്നത്‌. അതേസമയം, തുടർച്ചയായ രണ്ടാം മത്സരത്തിലും പരിക്ക്‌ വിഷമിപ്പിച്ചത്‌ ആശങ്കയാണ്‌. ക്വാർട്ടറിൽ അമേരിക്കയുടെ ടെയ്‌ലർ ഫ്രിറ്റ്‌സ്‌ ആണ്‌ എതിരാളി.

രണ്ടാംറാങ്കുകാരൻ കാർലോസ്‌ അൽകാരസും ക്വാർട്ടറിലെത്തി. പ്രീ ക്വാർട്ടറിൽ ഫ്രാൻസിന്റെ റിൻഡെർക്‌നെച്ചിനെ തോൽപ്പിച്ചു (7–6, 6–3, 6–4). ചെക്ക്‌ റിപ്പബ്ലിക്കിന്റെ ജിറി ലെഹെക്കയാണ്‌ ക്വാർട്ടറിലെ എതിരാളി.

വനിതകളിൽ അരീന സബലേങ്ക, ജെസീക പെഗുല എന്നിവർ ക്വാർട്ടറിൽ കടന്നു. പെഗുല അമേരിക്കയുടെതന്നെ ആൻ ലിയെ തോൽപ്പിച്ചു. സബലേങ്ക സ്‌പെയ്‌നിന്റെ ക്രിസ്‌റ്റിന ബുസ്‌കയെയാണ്‌ മറികടന്നത്‌. ക്വാർട്ടറിൽ ചെക്ക്‌ റിപ്പബ്ലിക്കിന്റെ മർക്കേറ്റ വൊൻഡ്ര‍ൗസോവയെ നേരിടും. പെഗുലയ്‌ക്ക്‌ ചെക്കിന്റെ ബാർബറ ക്രെജിക്കോവയാണ്‌ എതിരാളി.