‘ഇത്​ ചെസിനുള്ള 
അംഗീകാരം ; ഇത്രയധികം ആളുകൾ എന്നെ അനുമോദിക്കാനെത്തിയതിൽ ഏറെ സന്തോഷം'

നാഗ്​പുർ

വനിതാ ചെസ്​ ലോകകപ്പ്​ ജേതാവായ ദിവ്യ ദേശ്​മുഖിന്​ ജന്മനാട്ടിൽ വൻ വരവേൽപ്പ്​. കഴിഞ്ഞ ദിവസമാണ്​ ദിവ്യ നാഗ്​പുരിൽ എത്തിയത്​. വിമാനത്താവളത്തിൽ നൂറുകണക്കിനാളുകൾ സ്വീകരിക്കാനെത്തിയിരുന്നു. ‘ഇത്രയധികം ആളുകൾ എന്നെ അനുമോദിക്കാനെത്തിയതിൽ ഏറെ സന്തോഷം. ചെസിനുള്ള അംഗീകാരമായാണ്​ ഞാൻ ഇതിനെ കാണുന്നത്​’ ദിവ്യ പറഞ്ഞു.

ജോർജിയയിലെ ബാതുമിയിലായിരുന്നു ലോകകപ്പ്​. കിരീടം​ നേടുന്ന ആദ്യ ഇന്ത്യക്കാരിയാണ്​. ഫൈനലിൽ ഇന്ത്യയുടെതന്നെ കൊണേരു ഹമ്പിയെ തോൽപ്പിക്കുകയായിരുന്നു. ടൈബ്രേക്കിലൂടെയായിരുന്നു ജയം. ലോകകപ്പ്​ വേദിയിൽ ഇറങ്ങുമ്പോൾ ഗ്രാൻഡ് മാസ്​റ്റർ നോം ആയിരുന്നു ലക്ഷ്യം. എന്നാൽ ഗ്രാൻഡ്​ മാസ്റ്റർ പദവിക്കൊപ്പം കിരീടവുമായാണ്​ തിരിച്ചെത്തിയത്​.

‘ഏറെ സന്തോഷമാണ്​ ഇ‍ൗ നിമിഷത്തിൽ. എന്റെ അച്ഛനും അമ്മയുമാണ്​ ഇ‍ൗ നേട്ടത്തിനുള്ള പ്രധാന കാരണക്കാർ. അവരുടെ പിന്തുണയില്ലെങ്കിൽ ഞാൻ എവിടെയുമെത്തുമായിരുന്നില്ല. എന്റെ സഹോദ​രി, പരിശീലകർ എന്നിവർക്കും നന്ദി പറയുന്നു‘–ദിവ്യ പ്രതികരിച്ചു. അമ്മ നമ്രതയ്​ക്കൊപ്പമാണ്​ ദിവ്യ എത്തിച്ചേർന്നത്​.

ആദ്യകാല പരിശീലകനായിരുന്ന രാഹുൽ ജോഷിക്കാണ്​ ദിവ്യ നേട്ടം സമർപ്പിച്ചത്​. 2020ൽ നാൽപ്പതാം വയസ്സിലായിരുന്നു രാഹുലിന്റെ മരണം. ‘ഞാനൊരു ഗ്രാൻഡ്​ മാസ്​റ്റർ ആകണമെന്ന്​ ഏറ്റവും കൂടുതൽ ആഗ്രഹിച്ചത്​ രാഹുൽ സാറായിരുന്നു. ഇ‍ൗ പുരസ്​കാരം അദ്ദേഹത്തിനുള്ളതാണ്​– ദിവ്യ പറഞ്ഞു.

ലോകകപ്പിനുള്ള ഒരുക്കം കടുത്തതായിരുന്നുവെന്നും പത്തൊമ്പതുകാരി വ്യക്തമാക്കി.

‘‘ ഇ‍ൗ ടൂർണമെന്റിനായി എന്നെ ഏറ്റവും കൂടുതൽ സഹായിച്ചത്​ സാബ ബലോഹ്​ ആണ്​. ഹംഗറിക്കാരനാണ്​ അദ്ദേഹം. ഒരുപക്ഷേ, എന്നെക്കാൾ കൂടുതൽ കഷ്ടപ്പെട്ടത്​ ബലോഹ്​ ആയിരിക്കും. ഇത്രയും മികച്ച രീതിയിൽ തയ്യാറെടുപ്പ്​ നടത്താനുള്ള കാരണം ബലോഹ്​ ആണ്​.’

2004ലാണ്​ ബലോഹിന്​ ഗ്രാൻഡ്​ മാസ്​റ്റർ പദവി ലഭിച്ചത്​. 2014 ചെസ്​ ഒളിമ്പ്യാഡിൽ വെള്ളി നേടിയ ഹംഗറി ടീമിൽ അംഗമായിരുന്നു. 2018ലെ ലോക ജൂനിയർ ചെസിൽ രണ്ടാമനായ അഭിമന്യു പുരാണിക്​ സംഘത്തിലുണ്ടായിരുന്നു.

സെപ്​തംബർ രണ്ടിന്​ ഉസ്​ബെക്കിസ്ഥാനിൽ ആരംഭിക്കുന്ന ഗ്രാൻഡ്​ സ്വിസിലാണ്​ ദിവ്യയുടെ അടുത്ത മത്സരം.