എന്നെ രൂപപ്പെടുത്തിയത് മുത്തശ്ശി; ജീവിതം ഓർത്തെടുത്ത് വിനീഷ്യസ് ജൂനിയർ

ഹൂസ്റ്റൺ: തന്റെ വ്യക്തിപരമായ ജീവിതത്തെക്കുറിച്ചും, മുത്തശ്ശിയുമായുള്ള വൈകാരിക ബന്ധത്തെക്കുറിച്ചും, ഫുട്ബോളിലെ വംശീയാധിക്ഷേപത്തിനെതിരെയുള്ള തന്റെ തുടർച്ചയായ പോരാട്ടങ്ങളെക്കുറിച്ചും മനസ്സ് തുറന്ന് ബ്രസീലിയൻ താരം വിനീഷ്യസ് ജൂനിയർ. ഗ്ലോബോ ടിവിക്ക് നൽകിയ അഭിമുഖത്തിലാണ് താരം മനസ് തുറന്നത്.

മുത്തശ്ശിയും ബാല്യകാലവും

തന്റെ വളർച്ചയിൽ നിർണ്ണായക പങ്കുവഹിച്ചത് മുത്തശ്ശിയാണെന്ന് താരം അഭിമുഖത്തിൽ വ്യക്തമാക്കി. "മുത്തശ്ശി എന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തിയാണ്. 16 വയസ്സുവരെ ഞാൻ അവരോടൊപ്പമാണ് താമസിച്ചിരുന്നത്. എനിക്ക് സംസാരിക്കാൻ തുടങ്ങിയ കാലം മുതൽ അവരുടെ ശബ്ദം ഞാൻ തിരിച്ചറിഞ്ഞിരുന്നു," വിനീഷ്യസ് പറഞ്ഞു.

പിതാവ് എപ്പോഴും ദൂരസ്ഥലത്തായിരുന്നതിനാൽ താനും മാതാവും സഹോദരങ്ങളും മുത്തശ്ശിക്കൊപ്പമായിരുന്നു കഴിഞ്ഞിരുന്നത്. വളരെ ചെറിയൊരു വീട്ടിൽ മുത്തശ്ശിക്കൊപ്പം കിടന്നുറങ്ങിയ കാലം താരം ഓർത്തെടുത്തു. "എന്റെ ജീവിതത്തെ സ്വാധീനിച്ച വ്യക്തിയാണവർ. അവരെക്കുറിച്ച് പറയാൻ വാക്കുകളില്ല," വിനീഷ്യസ് വികാരാധീനനായി.

കളിക്കളത്തിന് പുറത്തെ ദൗത്യം

കളിക്കളത്തിലെ നേട്ടങ്ങളേക്കാൾ വലുതാണ് കളിക്കളത്തിന് പുറത്ത് താൻ നടത്തുന്ന പ്രവർത്തനങ്ങളെന്ന് താരം പറഞ്ഞു. "കളിക്കളത്തിന് പുറത്തുള്ള ഇത്തരം നേട്ടങ്ങളാണ് കൂടുതൽ പ്രധാനം, കാരണം എനിക്ക് കൂടുതൽ ആളുകളെ സഹായിക്കാൻ ഇതിലൂടെ സാധിക്കുന്നു," വിനീഷ്യസ് കൂട്ടിച്ചേർത്തു.

വംശീയാധിക്ഷേപത്തിനെതിരെ ശബ്ദമില്ലാത്ത കറുത്ത വർഗ്ഗക്കാർക്ക് വേണ്ടി നിലകൊള്ളാനും, അടുത്ത തലമുറയ്ക്ക് ഇത്തരം വിവേചനങ്ങൾ അനുഭവപ്പെടാതിരിക്കാൻ മാറ്റങ്ങൾ കൊണ്ടുവരാനും താൻ ആഗ്രഹിക്കുന്നുവെന്ന് താരം വ്യക്തമാക്കി.

ലോകകപ്പ് സ്വപ്നവും ബ്രസീലിന്റെ കുതിപ്പും

ബ്രസീലിനെ ലോകകപ്പിൽ പ്രതിനിധാനം ചെയ്യാൻ കഴിഞ്ഞതിൽ താൻ ഏറെ അഭിമാനിക്കുന്നു. ഇത് തന്റെ രണ്ടാമത്തെ ലോകകപ്പാണ്. വർഷങ്ങളോളം നീണ്ട പോരാട്ടങ്ങൾക്ക് ശേഷമാണ് താൻ ഇവിടെ എത്തിയത് വിനീഷ്യസ് പറഞ്ഞു. നിലവിലെ ലോകകപ്പിൽ ഇതിനകം നാല് ഗോളുകൾ നേടിയ വിനീഷ്യസ്, ബ്രസീലിനായി ടൂർണമെന്റിൽ ഏറ്റവും കൂടുതൽ ഗോൾ നേടുന്ന താരമാണ്.

ജൂൺ 29-ന് നടക്കുന്ന റൗണ്ട് ഓഫ് 32 മത്സരത്തിൽ ജപ്പാനെയാണ് ബ്രസീൽ നേരിടുന്നത്. 1982 മുതൽ തുടർച്ചയായി 12 തവണ ഗ്രൂപ്പ് ചാമ്പ്യന്മാരായി മുന്നേറുന്ന ബ്രസീലിന്റെ 44 വർഷത്തെ ലോകകപ്പ് ആധിപത്യം ഈ ടൂർണമെന്റിലും തുടരുകയാണ്.