print edition കാലിക്കറ്റ് സെമിയിൽ ; മലപ്പുറം എഫ്സിയെ 3–1ന് തോൽപ്പിച്ചു

football

മലപ്പുറം എഫ് സിക്കെതിരെ ഗോൾനേടിയ കാലിക്കറ്റ് എഫ്സിയുടെ ജോനാഥൻ നഹുവൽ പെരേരയുടെ ആഹ്ലാദം / ഫോട്ടോ: ജഗത് ലാൽ

വെബ് ഡെസ്ക്

Published on Nov 25, 2025, 03:54 AM | 1 min read

കോഴിക്കോട്

കാലിക്കറ്റ്‌ എഫ്‌സി സൂപ്പർ ലീഗ് കേരള ഫുട്‌ബോളിൽ സെമിയിലെത്തുന്ന ആദ്യ ടീമായി.

മലപ്പുറം എഫ്സിയെ ഒന്നിനെതിരെ മൂന്ന് ഗോളിന്‌ കീഴടക്കിയാണ്‌ സെമി ഉറപ്പിച്ചത്. ജൊനാഥൻ പെരേര, മുഹമ്മദ് അജ്സൽ, ഫെഡറിക്കോ ബുവാസോ എന്നിവർ കാലിക്കറ്റിനായി ഗോളടിച്ചു. മലപ്പുറത്തിന്റെ ആശ്വാസ ഗോൾ എയ്‌തോർ അൽഡലിറിന്റേതാണ്‌.


മലപ്പുറത്തിന്റെ ഗനി അഹമ്മദ്‌ നിഗം ചുവപ്പ് കാർഡ് കണ്ട്‌ പുറത്തായി. കാലിക്കറ്റ്‌ എട്ട്‌ കളിയിൽ 17 പോയന്റുമായി ഒന്നാമതാണ്. 10 പോയന്റുള്ള മലപ്പുറം നാലാംസ്ഥാനത്ത്‌.

​പന്ത്രണ്ടാം മിനിറ്റിൽ കാലിക്കറ്റ്‌ മുന്നിലെത്തി. തിരിച്ചുവന്ന പന്ത്‌ പിടിച്ചെടുത്ത് അർജന്റീനക്കാരൻ ജൊനാഥൻ പെരേര നിറയൊഴിച്ചപ്പോൾ മലപ്പുറത്തിന്റെ യുവ ഗോൾകീപ്പർ ജസീമിന്‌ തടയാനായില്ല. ഇടവേളക്ക്‌ പിരിയുംമുമ്പ്‌ ആസിഫിന്റെ ഷോട്ട് ഗോളി തടുത്തിട്ടത്‌ രക്ഷയായി.


പത്ത്‌ പേരായി ചുരുങ്ങിയിട്ടും മലപ്പുറം സമനിലക്കായി കിണഞ്ഞുശ്രമിച്ചു. 80–ാം മിനിറ്റിലായിരുന്നു ആശ്വാസഗോൾ. ഫ്രീകിക്ക് ഗോളാക്കി മാറ്റിയത് പകരക്കാരനായി എത്തിയ നായകൻ എയ്‌തോർ അൽഡലിറാണ്‌. കളി അവസാനിക്കാൻ രണ്ട് മിനിറ്റ് ശേഷിക്കെ മുഹമ്മദ്‌ അജ്സലിന്റെ ഹെഡറിലൂടെ കാലിക്കറ്റ്‌ വീണ്ടും മുന്നിലെത്തി. ലീഗിൽ അജ്സലിന്‌ ആറ് ഗോളായി. പരിക്കുസമയത്ത്‌ ഫെഡറിക്കോ ബുവാസോ വിജയം ഉറപ്പിച്ചു. കോർപറേഷൻ ഇഎംഎസ്‌ സ്‌റ്റേഡിയത്തിൽ 34,173 പേരാണ്‌ മത്സരം കാണാനെത്തിയത്‌. ​മഞ്ചേരിയിൽ നടന്ന ആദ്യപാദത്തിൽ ഇരുടീമുകളും മൂന്ന് ഗോൾ വീതമടിച്ച് സമനിലയിൽ പിരിഞ്ഞിരുന്നു.


​വ്യാഴാഴ്‌ച തൃശൂർ മാജിക് എഫ്സി ഫോഴ്‌സ കൊച്ചിയെ നേരിടും. തൃശൂർ കോർപറേഷൻ സ്‌റ്റേഡിയത്തിൽ രാത്രി 7.30നാണ്‌ കളി.




deshabhimani section

Related News

View More
0 comments
Sort by

Deshabhimani

Subscribe to our newsletter

Quick Links


Home