സൂപ്പർ കപ്പിൽ
പിഎസ്‌ജി

റോം

കളി അവസാനിക്കാൻ ആറ്‌ മിനിറ്റ്‌ മാത്രം ശേഷിക്കുമ്പോഴും രണ്ട്‌ ഗോളിന്‌ പിന്നിട്ടുനിന്ന പിഎസ്‌ജി തിരിച്ചടിച്ച്‌ യുവേഫ സൂപ്പർ കപ്പ്‌ ഫുട്‌ബോളിൽ ചാമ്പ്യനായി. ഇംഗ്ലീഷ്‌ ക്ലബ്‌ ടോട്ടനം ഹോട്‌സ്‌പറിനെയാണ്‌ കീഴടക്കിയത്‌. നിശ്‌ചിത സമയത്ത്‌ ഇരു ടീമുകളും 2–2ന്‌ പിരിഞ്ഞു. ഷൂട്ട‍ൗട്ടിൽ 4–3നായിരുന്നു ജയം.

ഇറ്റലിയിലെ ഉഡിനെയിൽ നടന്ന കളിയിൽ ടോട്ടനത്തിനായിരുന്നു മേധാവിത്തം. 48 മിനിറ്റിൽ രണ്ട്‌ ഗോളടിച്ച്‌ ജയത്തിനരികെയെത്തിയതാണ്‌. പക്ഷേ, 84–ാം മിനിറ്റിൽ ലീ കാങ്‌ ഇനിന്റെ ഗോളിൽ കാലിടറി. പരിക്കുസമയത്ത്‌ ഗൊൺസാലോ റാമോസ്‌ പിഎസ്‌ജിക്കായി അടിതൊടുത്തതോടെ കളി ഷൂട്ട‍ൗട്ടിലേക്ക്‌ നീങ്ങുകയായിരുന്നു. പിഎസ്‌ജിയുടെ ആദ്യ പെനൽറ്റി വിതീന്യ പാഴാക്കി. അത്‌ മുതലാക്കാൻ ടോട്ടനത്തിന്‌ കഴിഞ്ഞില്ല. മിക്കി വാൻ ഡെനിന്റെ ദുർബല കിക്ക്‌ പിഎസ്‌ജി ഗോൾ കീപ്പർ ലൂകാസ്‌ ഷെവലിയെർ തടഞ്ഞപ്പോൾ മാതിസ്‌ ടെൽ പുറത്തേക്കടിച്ച്‌ കളഞ്ഞു. പിഎസ്‌ജിക്കായി അവസാന കിക്ക്‌ എടുത്ത ന്യൂനോ മെൻഡെസ്‌ ലക്ഷ്യം കണ്ടു. ലൂയിസ്‌ എൻറിക്വെയ്‌ക്ക്‌ കീഴിൽ മറ്റൊരു കിരീടം കൂടി പിഎസ്‌ജിയുടെ പേരിലാകുകയും ചെയ്‌തു.

തോമസ്‌ ഫ്രാങ്ക്‌ എന്ന പരിശീലകന്‌ കീഴിൽ ഇറങ്ങിയ ടോട്ടനം ആദ്യ ഘട്ടം മുതൽ ആക്രമിച്ച്‌ കളിച്ചു. മുന്നേറ്റക്കാരൻ റിച്ചാർലിസൺ രണ്ട്‌ തവണ ഗോളിന്‌ അരികെയെത്തി.

ടീം വിട്ട ജിയാൻല്യൂജി ദൊന്നരുമ്മയ്‌ക്ക്‌ പകരം പിഎസ്‌ജി ക്രോസ്‌ ബാറിന്‌ താഴെയെത്തിയ ഷെവലിയെറിന്‌ കളി അത്ര സുഗമമായില്ല. ടോട്ടനത്തിന്റെ ആദ്യശ്രമംതന്നെ പരീക്ഷണമായി. ജോയോ പലീന്യയുടെ കരുത്തുറ്റ അടി ഷെവലിയെറിന്റെ കൈയിലും ക്രോസ്‌ ബാറിലും തട്ടിത്തെറിച്ചു. ഓടിയെത്തിയ വാൻ ഡി വെൻ അത്‌ വലയിലേക്ക്‌ തൊടുത്തു.

രണ്ടാംപകുതിയുടെ തുടക്കത്തിലാണ്‌ ടോട്ടനം ലീഡ്‌ രണ്ടാക്കി ഉയർത്തിയത്‌. പെഡ്രോ പോറോയുടെ ഫ്രീകിക്ക്‌ പിഎസ്‌ജി ഗോൾ മുഖത്തേക്ക്‌ പറന്നു. പ്രതിരോധം ചിതറിനിൽക്കുന്ന ഘട്ടത്തിൽ സ്വതന്ത്രനായി നിൽക്കുകയായിരുന്ന ക്രിസ്‌റ്റ്യൻ റൊമേറോ ശക്തമായി തലകൊണ്ട്‌ കുത്തി. ഷെവലിയെറിന്‌ പിഴച്ചു. രണ്ട്‌ കൈകൊണ്ടും പന്ത്‌ പിടിച്ചെടുക്കാൻ നോക്കിയെങ്കിലും ഒതുങ്ങിയില്ല. തെറിച്ച്‌ വലയിലേക്ക്‌ ഉരുണ്ടു.

കളിയുടെ അവസാന ഘട്ടത്തിൽ പിഎസ്‌ജി ആക്രമണം ശക്തമാക്കി. ടോട്ടനം ചെറുത്തുനിന്നു. എന്നാൽ നിശ്‌ചിത സമയം അവസാനിക്കാൻ ആറ്‌ മിനിറ്റ്‌ ശേഷിക്കെ ലീ കാങ്‌ ബോക്‌സിന്‌ പുറത്തുനിന്ന്‌ തൊടുത്ത തകർപ്പനടി പിഎസ്‌ജിക്ക്‌ ജീവൻ നൽകുകയായിരുന്നു.

ഗോൾ വഴങ്ങിയതോടെ ടോട്ടനം പ്രതിരോധത്തിന്റെ ഉറപ്പും തകർന്നു. പരിക്കുസമയത്തിന്റെ നാലാം മിനിറ്റിൽ ഉസ്‌മാൻ ഡെംബെലെ വലതുഭാഗത്ത്‌നിന്ന്‌ തൊടുത്ത ഒന്നാന്തരം ക്രോസിൽ റാമോസ്‌ തലവയ്‌ക്കുകയായിരുന്നു.

ഷൂട്ട‍ൗട്ടിൽ പിഎസ്‌ജിക്കായി റാമോസ്‌, ഡെംബലെ‍, ലീ കാങ്‌, മെൻഡെസ്‌ എന്നിവർ ലക്ഷ്യം കണ്ടു. ടോട്ടനത്തിനായി ഡൊമിനിക്‌ സോളങ്കി, റോഡ്രിഗോ ബെന്റാങ്കുർ, പെഡ്രോ പോറോ എന്നിവരും പന്ത്‌ വലയിലെത്തിച്ചു.