റൊണാൾഡോയില്ലാതെ പോർച്ചുഗൽ; ഡെൻമാർക്കിനെ 4-2 തകർത്തു

കോപൻഹേഗ്‌: ക്രിസ്റ്റ്യാനോ റൊണാൾഡോയില്ലാതെ വിജയം തുടർന്ന് പോർച്ചുഗൽ. യുവേഫ നേഷൻസ് ലീഗിൽ ആതിഥേയരായ ഡെൻമാർക്കിനെതിരെ 4-2ന്റെ തകർപ്പൻ വിജയമാണ് ടീം നേടിയത്. പരിശീലകൻ ഹോർഗെ ഹെസ്യൂസും തമ്മിലുള്ള തർക്കങ്ങളെത്തുടർന്ന് ക്യാപ്റ്റൻ ക്രിസ്റ്റ്യാനോയും ടീം വിട്ട ശേഷമുള്ള ആദ്യ മത്സരത്തിൽ പോർച്ചു​ഗൽ മികവ് പുലർത്തി. ജാവോ കാന്‍സെലോ, ഗോൺസാലോ റാമോസ്, വിറ്റിൻഹ, ജോയോ ഫെലിക്സ് എന്നിവർ പോർച്ചു​ഗലിനായി ​ഗോൾ നേടി. ഡെന്മാർക്കിനായി മിഗ്വൽ ഡാംസ്ഗാർഡും റാസ്മസ് ഹൊയ്‌ലൻഡും ​​ഗോൾ കണ്ടെത്തി.

ക്യാപ്റ്റനില്ലാതെ കളത്തിലിറങ്ങിയ പോർച്ചു​ഗൽ തുടക്കം മുതൽ ആക്രമിച്ചാണ് കളിച്ചത്. 13-ാം മിനിറ്റിൽ ജാവോ കാന്‍സെലോയിലൂടെ ടീം ലീഡ് പിടിച്ചു. മിഗ്വൽ ഡാംസ്ഗാർഡിലൂടെ ഡെൻമാർക്ക് സമനില പിടിച്ചെങ്കിലും രണ്ട് മിനിറ്റിനുള്ളിൽ റാമോസിലൂടെ പോർച്ചു​ഗൽ ലീഡ് തിരിച്ചു പിടിച്ചു. രണ്ടാം പകുതിയുടെ തുടക്കത്തിൽ തന്നെ ​ഗോൾ നേടി വീണ്ടും ഡെൻമാർക്ക് കളിയിലേക്ക് തിരിച്ചു വന്നു. എന്നാൽ വിറ്റിൻഹയും ജോയോ ഫെലിക്സും ലക്ഷ്യം കണ്ടതോടെ ആതിഥേയർക്ക് മറുപടിയുണ്ടായില്ല. വിജയത്തോടെ ഗ്രൂപ്പ് ഡി-യിൽ കളിച്ച മൂന്ന് മത്സരങ്ങളും ജയിച്ച് പോർച്ചുഗൽ ഒന്നാം സ്ഥാനത്ത് തുടരുകയാണ്.

മത്സരത്തിന് മുമ്പ് കോച്ച്‌ ഹോർഗെ ഹെസ്യൂസുമായുള്ള ഭിന്നതയെത്തുടർന്നാണ് ക്രിസ്റ്റ്യാനോ പരിശീലന ക്യാമ്പ്‌ വിട്ടത്. നേഷൻസ്‌ ലീഗ്‌ ഫുട്‌ബോളിൽ നോർവെയ്‌ക്കെതിരായ മത്സരത്തിൽ പകരക്കാരുടെ നിരയിലുണ്ടായിട്ടും നാൽപ്പത്തൊന്നുകാരൻ കളിച്ചില്ല. ഡെൻമാർക്കിനെതിരെയും സ്ഥാനം ബെഞ്ചിലാകുമെന്ന് കോച്ച് വെളിപ്പെടുത്തിയതിന് പിന്നാലെയാണ് താരം ക്യാമ്പ് വിട്ടത്.