റോയ്‌ കൃഷ്‌ണ കാത്തു ; സൂപ്പർ ലീഗ്‌ കേരള ഫുട്‌ബോളിൽ മലപ്പുറം എഫ്സിക്ക് ജയം

Super League Kerala

മഞ്ചേരി പയ്യനാട് സ്റ്റേഡിയത്തിൽ സൂപ്പർ ലീഗ് കേരള ഫുട്ബോളിൽ തൃശൂർ മാജിക് എഫ്സിക്കെതിരെ പെനൽറ്റിയിലൂടെ ഗോൾ നേടിയ 
മലപ്പുറം എഫ്സി മുന്നേറ്റക്കാരൻ റോയ് കൃഷ്ണയുടെ (നടുവിൽ) ആഹ്ലാദം / ഫോട്ടോ: കെ ഷെമീർ

avatar
ജിജോ ജോർജ്‌

Published on Oct 04, 2025, 12:00 AM | 1 min read


​മഞ്ചേരി (മലപ്പുറം)

സ്വന്തം തട്ടകത്തിൽ മലപ്പുറം എഫ്സിക്ക് ജയത്തുടക്കം. തൃശൂർ മാജിക് എഫ്സിയെ ഒരു ഗോളിന് കീഴടക്കി സൂപ്പർ ലീഗ്‌ കേരള ഫുട്‌ബോളിൽ വരവറിയിച്ചു. 72–ാം മിനിറ്റിൽ സ്‌റ്റാർ സ്ട്രൈക്കർ റോയ് കൃഷ്ണ പെനൽറ്റിയിലൂടെയാണ്‌ ലക്ഷ്യംകണ്ടത്‌. മഞ്ചേരി പയ്യനാട് സ്‌റ്റേഡിയത്തിൽ നിറഞ്ഞ കാണികൾ വിജയം ആഘോഷിച്ചു.


കോർണർ കിക്കാണ്‌ ഗോളിന്‌ വഴിയൊരുക്കിയത്‌. ഐദർ തൊടുത്ത കിക്ക്‌ താഴ്‌ന്നിറങ്ങുന്നതിനിടെ ബോക്‌സിൽ തൃശൂർ താരങ്ങൾ ജോൺ കെന്നഡിയെ വീഴ്‌ത്തി. റഫറി മലപ്പുറത്തിന് അനുകൂലമായി പെനൽറ്റി വിധിച്ചു. കിക്കെടുത്ത റോയ്‌ കൃഷ്ണ അനായാസം പന്ത് വലയിലാക്കി. പകരക്കാരായി ജോൺ കെന്നഡിയും അഖിലും എത്തിയതോടെയാണ്‌ മലപ്പുറം ഉണർന്നത്‌. ലീഡ്‌ നേടിയതോടെ കളിയുടെ നിയന്ത്രണവും ഏറ്റെടുത്തു.


ആദ്യപകുതിയിൽ മികച്ച പ്രകടനം നടത്താൻ ഇരുടീമിനുമായില്ല. ആദ്യ അവസരം തൃശൂരിനായിരുന്നു. കോർണർ കിക്കിൽ ലക്ഷ്യം കാണാനായില്ല. തുടർന്ന്‌ ലെനി റോഡിഗ്രസിന്റെ നീളൻ അടി മലപ്പുറം ഗോൾകീപ്പർ മുഹമ്മദ് അസ്ഹർ കൈയിലൊതുക്കി. അടുത്ത നിമിഷം റോയ് കൃഷ്ണയുടെ മുന്നേറ്റം തൃശൂർ ഗോളി കമാലുദ്ദീൻ കുത്തിയകറ്റി. പന്ത് കിട്ടിയത് മലപ്പുറം നായകൻ ഫസലുറഹ്‌മാന്റെ കാലിൽ. ഫസലുവിന്റെ ഷോട്ട് ബാറിന് മുകളിലൂടെ പറന്നു.


ഇടവേളക്ക്‌ പിരിയുംമുമ്പ്‌ ബോക്‌സിന് പുറത്ത് തൃശൂരിന് അനുകൂലമായ ഫ്രീകിക്ക്. സൂപ്പർതാരം മാർകസ് ജോസഫിന്റെ കിക്ക് പുറത്തേക്ക് പോയി. ആദ്യപകുതിയുടെ പരിക്കുസമയത്ത് പരിക്കേറ്റ ഫസലു റഹ്മാനെ പിൻവലിച്ച് മലപ്പുറം മുഹമ്മദ് റിഷാദിനെ ഇറക്കി.


രണ്ടാം പകുതിയുടെ തുടക്കത്തിൽ അഭിജിത്തിന്റെ മുന്നേറ്റം തൃശൂർ ബോക്‌സ്‌വരെ എത്തിയെങ്കിലും ഫലമുണ്ടായില്ല. പകരക്കാരനായി എത്തിയ ജോൺ കെന്നെഡി ഇടതുപാർശ്വത്തിലൂടെ നടത്തിയ മുന്നേറ്റത്തിനൊടുവിൽ തൊടുത്ത ഷോട്ട് ഗോളി കുത്തിയകറ്റി. കളിയുടെ അവസാന നിമിഷങ്ങളിൽ തൃശൂർ സമനിലക്ക്‌ ശ്രമിച്ചെങ്കിലും ഗോൾ അകന്നുപോയി. ഗോളി അസ്ഹർ പലതവണ മലപ്പുറത്തിന്റെ രക്ഷകനായി. റോയ്‌ കൃഷ്ണയാണ്‌ കളിയിലെ കേമൻ. മലപ്പുറം ടീമിന്റെ ബ്രാൻഡ്‌ അംബാസഡറായ ക്രിക്കറ്റ്‌ താരം സഞ്ജു സാംസൺ സ്‌റ്റേഡിയത്തിലെത്തിയത്‌ കാണികൾക്ക്‌ ആവേശമായി. 14,236 പേർ കളി കാണാനെത്തി. ലീഗിൽ ഇന്ന് കളിയില്ല. നാളെ തിരുവനന്തപുരം കൊമ്പൻസ് സ്വന്തംതട്ടകത്തിൽ കണ്ണൂർ വാരിയേഴ്സിനെ നേരിടും.



deshabhimani section

Related News

View More
0 comments
Sort by

Deshabhimani

Subscribe to our newsletter

Quick Links


Home