ഇരട്ടഗോളുമായി മെസി; ന്യൂയോർക്ക് സിറ്റി തകർത്ത് മയാമി

മയാമി: മേജർ ലീഗ്‌ സോക്കറിൽ വീണ്ടും മെസി മാജിക്. ഇരട്ട​ഗോളും ഒരു അസിസ്റ്റുമായി ലയണൽ മെസി തിളങ്ങിയതോടെ ന്യൂയോർക്ക് സിറ്റിയെ മറുപടിയില്ലാത്ത നാലു​ഗോളിനാണ് ഇൻ്റർ മയാമി പരാജയപ്പെടുത്തിയത്. വിജയത്തോടെ എംഎൽഎസ് പ്ലേ ഓഫിന് അടുത്തെത്താനും ടീമിന് സാധിച്ചു.

ആദ്യപകുതി അവസാനിക്കാനിരിക്കെയാണ് ടീം ആദ്യ ​ഗോൾ നേടിയത്. 43-ാം മിനിറ്റിൽ ബാൽട്ടസർ റോഡ്രിഗസിലൂടെയാണ് ഇന്റർ മയാമി ലീഡ് നേടിയത്. മെസി നൽകിയ പാസിൽ നിന്നായിരുന്നു ​ഗോൾ. കളിയുടെ രണ്ടാം പകുതിയിലും ന്യൂയോർക്ക് സിറ്റിയെ കാഴ്ചക്കാരാക്കി മയാമി മുന്നേറ്റം തുടർന്നു. 74-ാം മിനിറ്റിൽ മെസി കളിയിലെ ആദ്യ ​ഗോൾ കണ്ടെത്തി. സെർജിയോ ബുസ്കെറ്റ്സിന്റെ പാസ് മെസി ​ഗോളാക്കി മാറ്റുകയായിരുന്നു.

83-ാം മിനിറ്റിൽ ലഭിച്ച പെനാൽറ്റി ഗോളാക്കി ലൂയിസ് സുവാരസ് ഇന്റർ മയാമിയുടെ സ്‌കോർ ഉയർത്തി. മൂന്ന് മിനിറ്റുകൾക്ക് ശേഷം മെസി തന്റെ രണ്ടാം ഗോളും കണ്ടെത്തി.