ഫാൻ സോണുകൾ, സൗജന്യ സംപ്രേഷണം; മെക്സിക്കോ സിറ്റി ലോകകപ്പിന് ഒരുങ്ങി കഴിഞ്ഞു

മെക്സിക്കോ സിറ്റി: വടക്കേ അമേരിക്കയിലെ ഏറ്റവും ജനസംഖ്യയേറിയ നഗരമായ മെക്സിക്കോ സിറ്റി, സമ്പന്നമായ ചരിത്രവും ആധുനിക സംസ്കാരവും സമന്വയിക്കുന്ന ഊർജ്ജസ്വലമായ ഒരു മഹാനഗരമാണ്. പുരാതന അവശിഷ്ടങ്ങൾ മുതൽ സമകാലിക കലകൾ വരെ സഞ്ചാരികളെ അത്ഭുതപ്പെടുത്തുന്ന ഈ നഗരം, വരാനിരിക്കുന്ന ഫിഫ ലോകകപ്പ് സീസണിൽ ആവേശത്തിന്റെ കൊടുമുടിയിലാകും.

ഏകദേശം 2.31 കോടി ജനങ്ങൾ വസിക്കുന്ന ഈ മെട്രോപൊളിറ്റൻ നഗരത്തിൽ, തിരക്കേറിയ സമയങ്ങളിൽ പ്രത്യേകിച്ച് ലോകകപ്പ് വേദിയായ അസ്റ്റെക്ക സ്റ്റേഡിയത്തിന് സമീപം കടുത്ത ഗതാഗതക്കുരുക്ക് അനുഭവപ്പെടാറുണ്ട്. കൂടാതെ, സമുദ്രനിരപ്പിൽ നിന്ന് 7,300 അടിയിലധികം (2,240 മീറ്റർ) ഉയരത്തിലാണ് ഈ നഗരം സ്ഥിതി ചെയ്യുന്നത് എന്നതിനാൽ, ഇവിടെയെത്തുന്ന സന്ദർശകർക്ക് ഇവിടുത്തെ കാലാവസ്ഥയുമായി പൊരുത്തപ്പെടാൻ അല്പം സമയം വേണ്ടിവന്നേക്കാം.

ഫാൻ സോണുകൾ

ലോകകപ്പ് മത്സരങ്ങൾ പൊതുജനങ്ങൾക്ക് സൗജന്യമായി തത്സമയം കാണുന്നതിനായി മെക്സിക്കോ സിറ്റിയിൽ 18 പൊതുവേദികൾ ഒരുക്കുന്നുണ്ട്. മദ്യവിൽപ്പന പൂർണ്ണമായി നിരോധിച്ചിരിക്കുന്ന ഈ ഫാൻ സോണുകളിൽ വിവിധ സാംസ്കാരിക, കായിക പരിപാടികളും ഉണ്ടായിരിക്കും. ഇതിൽ 7 വേദികൾ ടൂർണമെന്റിന്റെ 39 ദിവസങ്ങളിലും പ്രവർത്തിക്കുകയും ആകെയുള്ള 104 മത്സരങ്ങളും സംപ്രേഷണം ചെയ്യുകയും ചെയ്യും. ബാക്കി 11 വേദികളിൽ മെക്സിക്കൻ ദേശീയ ടീമിന്റെ മത്സരങ്ങളും മറ്റ് പ്രധാന മത്സരങ്ങളുമാകും കാണിക്കുക.

ഗതാഗത സൗകര്യങ്ങൾ

ലോകകപ്പ് സ്റ്റേഡിയത്തിലേക്ക് ഏറ്റവും വേഗത്തിൽ എത്തിച്ചേരാൻ പൊതുഗതാഗത സംവിധാനങ്ങളെ ആശ്രയിക്കുന്നതാണ് ഉചിതം. 'മെട്രോ ലൈൻ 2' വഴി ടാക്സെന്യ സ്റ്റേഷനിലെത്തി, അവിടെ നിന്ന് ലൈറ്റ് റെയിൽ മാർഗ്ഗത്തിലൂടെ എസ്റ്റാഡിയോ അസ്റ്റെക്ക സ്റ്റേഷനിലെത്താം. കൂടാതെ 'മെട്രോ ലൈൻ 3' ഉപയോഗിച്ച് യൂണിവേഴ്സിഡാഡ് സ്റ്റേഷനിലിറങ്ങി ഇലക്ട്രിക് ബസ് വഴിയും സ്റ്റേഡിയത്തിൽ എത്താം. നിശ്ചിത കേന്ദ്രങ്ങളിൽ പാർക്ക്-ആൻഡ്-റൈഡ് സൗകര്യങ്ങളും ലഭ്യമാണ്.

ഭക്ഷണ വൈവിധ്യം

പരമ്പരാഗത സ്ട്രീറ്റ് ഫുഡ് മുതൽ അത്യാധുനിക ഡൈനിംഗ് വരെ ഉൾക്കൊള്ളുന്ന ലോകോത്തരവും വൈവിധ്യമാർന്നതുമായ ഭക്ഷണസംസ്കാരമാണ് മെക്സിക്കോ സിറ്റിയിലുള്ളത്. നഗരത്തിലുടനീളമുള്ള തെരുവ് തട്ടുകടകളിൽ നിന്ന് തനത് രുചിയുള്ള 'സ്ട്രീറ്റ് ടാക്കോസ്' ആസ്വദിക്കാം. അതോടൊപ്പം റോമ, കോണ്ടെസ തുടങ്ങിയ പ്രദേശങ്ങളിൽ മിഷെലിൻ സ്റ്റാർ പദവിയുള്ള പ്രശസ്തമായ ആഡംബര റെസ്റ്റോറന്റുകളും ലഭ്യമാണ്.

സ്റ്റേഡിയം സന്ദർശിക്കുന്നവർക്കുള്ള നിർദ്ദേശങ്ങൾ

ലോകകപ്പിനായി സ്റ്റേഡിയം നവീകരിച്ചിട്ടുണ്ടെങ്കിലും, ഇന്റർനെറ്റ് കണക്റ്റിവിറ്റി പോലുള്ള ചില പ്രശ്നങ്ങൾ ഇപ്പോഴും പൂർണ്ണമായി പരിഹരിക്കപ്പെട്ടിട്ടില്ല. സ്റ്റേഡിയത്തിൽ ഇപ്പോൾ ക്യാഷ് പേയ്‌മെന്റുകൾ സ്വീകരിക്കാത്തതിനാൽ, തടസ്സപ്പെടുന്ന ഇന്റർനെറ്റ് സേവനം ഡിജിറ്റൽ ഇടപാടുകൾക്ക് ബുദ്ധിമുട്ട് സൃഷ്ടിച്ചേക്കാം. കൂടാതെ, സ്റ്റേഡിയത്തിനോട് ചേർന്നുകിടക്കുന്ന സാന്താ ഉർസുല പ്രദേശത്തു മത്സരദിവസങ്ങളിൽ കനത്ത പോലീസ് സുരക്ഷ ഉണ്ടാകുമെങ്കിലും, തിരക്ക് മൂലം ഈ പ്രദേശങ്ങളിലൂടെയുള്ള കാൽനടയാത്ര ഒഴിവാക്കുന്നതാണ് ആരാധകർക്ക് ഏറ്റവും നല്ലത്.

സന്ദർശിക്കേണ്ട പ്രധാന സ്ഥലങ്ങൾ

സോക്കലോ : ലോകത്തിലെ ഏറ്റവും വലിയ നഗര ചതുരങ്ങളിൽ ഒന്നായ ഇത് ഏകദേശം 14 ഏക്കറിലായി പടർന്നുകിടക്കുന്നു. മെട്രോപൊളിറ്റൻ കത്തീഡ്രലും നാഷണൽ പാലസും ഇതിന് ചുറ്റുമുണ്ട്. നൂറ്റാണ്ടുകളായി ജനങ്ങൾ ഒത്തുകൂടുന്ന ഈ പ്രദേശം നഗരത്തിന്റെ ചരിത്രം അടുത്തറിയാൻ മികച്ച ഇടമാണ്.

ചാപുൽടെപെക് പാർക്ക് : മ്യൂസിയങ്ങൾ, മൃഗശാല, മനോഹരമായ തടാകങ്ങൾ എന്നിവയടങ്ങുന്ന ഈ കൂറ്റൻ പാർക്ക് നടത്തത്തിനും വിനോദങ്ങൾക്കും അനുയോജ്യമാണ്. ന്യൂയോർക്കിലെ സെൻട്രൽ പാർക്കിന്റെ ഇരട്ടിയിലധികം വലിപ്പമുള്ള (ഏകദേശം 2,000 ഏക്കർ) പാർക്കാണിത്.

ടിയോട്ടിഹ്വാക്കാൻ : നഗരത്തിന് പുറത്ത് സ്ഥിതി ചെയ്യുന്ന ഈ പുരാതന മെസോഅമേരിക്കൻ നഗരത്തിൽ വിഖ്യാതമായ 'പിരമിഡ് ഓഫ് ദി സൺ', 'പിരമിഡ് ഓഫ് ദി മൂൺ' എന്നിവ കാണാം. ചരിത്രപ്രേമികൾ തീർച്ചയായും സന്ദർശിക്കേണ്ട ഒരിടമാണിത്.