കഴിഞ്ഞ 23 വർഷമായി നിങ്ങൾ എന്നെ ഇല്ലാതാക്കാൻ ശ്രമിക്കുന്നു; ക്രിസ്റ്റ്യാനോ റൊണാൾഡോ

ഡാലസ്: തന്റെ കരിയറിലെ അവസാന ലോകകപ്പിനായി കളത്തിലിറങ്ങുന്ന പോർച്ചുഗൽ ഇതിഹാസം ക്രിസ്റ്റ്യാനോ റൊണാൾഡോ, താൻ പഴയ താരമല്ലെന്ന് തുറന്നുസമ്മതിച്ചു.

സ്പെയിനിനെതിരായ പ്രീക്വാർട്ടർ പോരാട്ടത്തിന് മുന്നോടിയായി മാധ്യമങ്ങളോട് സംസാരിക്കുമ്പോഴാണ് 41-കാരനായ റൊണാൾഡോ ഇക്കാര്യം വ്യക്തമാക്കിയത്.

കഴിഞ്ഞ 23 വർഷമായി തന്നെ ഇല്ലാതാക്കാൻ ശ്രമിക്കുന്ന വിമർശകർക്ക് മറുപടിയുമായി താരം രംഗത്തെത്തി.

വിമർശകർക്ക് ചുട്ട മറുപടി

"ഞാൻ പഴയ താരമല്ല എന്നത് സത്യമാണ്, പക്ഷേ ഞാൻ മോശമൊന്നും ചെയ്യുന്നില്ല," റൊണാൾഡോ പറഞ്ഞു.

അമേരിക്കയിൽ നടക്കുന്ന ലോകകപ്പിൽ ഉസ്ബെക്കിസ്ഥാനെതിരായ മത്സരത്തിൽ രണ്ട് ഗോളുകളും, ക്രോയേഷ്യക്കെതിരെ ഒരു ഗോളും താരം നേടിയിരുന്നു.

താൻ എപ്പോൾ വിരമിക്കണം എന്ന് തീരുമാനിക്കേണ്ടത് താനാണ്, അല്ലാതെ മാധ്യമങ്ങളല്ലെന്നും റൊണാൾഡോ വ്യക്തമാക്കി.

"കഴിഞ്ഞ 23 വർഷമായി നിങ്ങൾ എന്നെ ഇല്ലാതാക്കാൻ ശ്രമിക്കുന്നു, പക്ഷേ അതൊന്നും നടക്കാൻ പോകുന്നില്ല, വെറുതെ സമയം കളയരുത്," അദ്ദേഹം കൂട്ടിച്ചേർത്തു.

അനുഭവസമ്പത്തും പക്വതയും

"പ്രായം കൂടുന്തോറും പക്വതയും അനുഭവസമ്പത്തും കൂടുന്നു. 40 വയസ്സിന് ശേഷം നേരിട്ട വിമർശനങ്ങൾ എന്നെ കൂടുതൽ വളർത്തുകയാണ് ചെയ്തത്. അതിന് ഞാൻ നന്ദി പറയുന്നു," താരം പറഞ്ഞു.

നാളെ നടക്കുന്ന സ്പെയിനിനെതിരായ മത്സരത്തിൽ വിജയിക്കാൻ ടീമിന് വലിയ ആത്മവിശ്വാസവും ധൈര്യവും ആവശ്യമാണെന്ന് അഭിപ്രായപ്പെട്ടു.

തന്റെ കരിയറിൽ ഫുട്ബോളിനും ജീവിതത്തിനും വേണ്ടി താൻ എല്ലാം നൽകിയിട്ടുണ്ടെന്നും, എന്തൊക്കെ സംഭവിച്ചാലും സമാധാനത്തോടെ മടങ്ങാൻ തനിക്ക് കഴിയുമെന്നും റൊണാൾഡോ കൂട്ടിച്ചേർത്തു.