ചാമ്പ്യൻസ് ലീഗ്: റയലിന് അനായാസ ജയം; യുണൈറ്റഡിനെ ​ഗോളിൽ മുക്കി കോമോ; ബയേണിന് സമനില

മാഡ്രിഡ്: ചാമ്പ്യൻസ് ലീ​ഗിൽ മുൻ ചാമ്പ്യന്മാരായ റയൽ മാഡ്രിഡിന് അനായാസ ജയം. ജർമൻ ക്ലബ്ബായ ആർബി ലെയ്‌പ്‌സിഗിനെ 4-1നാണ് റയൽ തകർത്തത്. മറ്റൊരു മത്സരത്തിൽ സീരി എ ക്ലബ്ബായ കോമോ മാഞ്ചസ്റ്റർ യുണൈറ്റഡിനെ 4-1ന് തകർത്തു. കരുത്തരായ ബയേൺ മ്യൂണികും അഴ്‌സണലും (2-2) സമനിലയിൽ പിരിഞ്ഞു.

ആർബി ലെയ്‌പ്‌സിഗിനെതിരായ മത്സരത്തിൽ ബെർഡാണോ സിൽവയിലൂടെയാണ് റയൽ ​ഗോളടി തുടങ്ങിയത്. 44-ാം മിനിറ്റിലായിരുന്നു ആദ്യ​ഗോൾ. രണ്ടാം പകുതിയിൽ അർദ ഗുലർ (52) ടീം ലീഡ് ഉയർത്തി. പിന്നീട് കിലിയൻ എംബാപ്പെ (83), യാൻ ഡിയോമാണ്ടെ (87) എന്നിവർ കൂടി ലക്ഷ്യം കണ്ടു. ലെയ്‌പ്‌സിഗിനായി ഗോമിസ് (85) ​ഗോൾ നേടി.

ചരിത്രത്തിലെ ഏറ്റവും ദാരുണമായ തോൽവികളിലൊന്നാണ് കോമോയ്ക്കെതിരെ യുണൈറ്റഡ് ഏറ്റുവാങ്ങിയത്. അർജന്റീനൻ താരം നിക്കോ പാസ് ഇരട്ട ഗോളുകളുമായി തിളങ്ങി. ഒരു ​ഗോളിന് വഴിയൊരുക്കുകയും ചെയ്തു. കളിയുടെ രണ്ടാം മിനിറ്റിലും 57-ാം മിനിറ്റിലുമാണ് നിക്കോ പാസ് ടീമിനായി ​ഗോൾ നേടിയത്. 49-ാം മിനിറ്റിൽ തസോസ് ദൂവികാസും 76-ാം മിനിറ്റിൽ യാക്കോബോ റാമോണും ​ഗോൾ കണ്ടെത്തി.

ആവേശം നിറഞ്ഞ മത്സരത്തിൽ ബയേൺ മ്യൂണിക്കും അഴ്സണലും രണ്ട് ഗോൾ വീതമാണ് നേടിയത്.25-ാം മിനിറ്റിൽ എസെയിലൂടെ അഴ്സണൽ ആദ്യം ലീഡ് നേടി. 35-ാം മിനിറ്റിൽ ഡേവിസിലൂടെ ബയേൺ സമനില പിടിച്ചു. രണ്ടാം പകുതിയിൽ പെനാൽറ്റിയിലൂടെ ഹാരി കെയ്ൻ (61) ബയേണിനെ മുന്നിലെത്തിച്ചെങ്കിലും റൈസ് (82) തകർപ്പൻ ഗോളിലൂടെ അഴ്സണൽ സമനില പിടിച്ചെടുക്കുകയായിരുന്നു.