നിയമങ്ങൾ അതിർത്തി തിരിക്കും, പന്ത് മനുഷ്യരെ ഒന്നിപ്പിക്കും; ഏഥൻസിൽ അഭയാർത്ഥികളുടെ 'മിനി ലോകകപ്പ് '

ഏഥൻസ്: ലോകകപ്പ് ആവേശത്തിലേക്ക് അമേരിക്കയും കാനഡയും മെക്സിക്കോയും ഉറ്റുനോക്കുമ്പോൾ, യഥാർത്ഥ ലോകകപ്പ് മാന്ത്രികതയ്ക്ക് സാക്ഷ്യം വഹിച്ചിരിക്കുകയാണ് ഗ്രീസിന്റെ തലസ്ഥാനമായ ഏഥൻസ്.

കോടികൾ മുടക്കി നിർമ്മിച്ച അത്യാധുനിക സ്റ്റേഡിയങ്ങളോ ലക്ഷ്വറി സ്യൂട്ടുകളോ ഇല്ലാതെ, നഗരഹൃദയത്തിലെ സാധാരണ ഗ്രൗണ്ടുകളിലാണ് ഈ മെഗാ ടൂർണമെന്റ് അരങ്ങേറിയത്.

ഗ്രീസിലെത്തിയ കുടിയേറ്റക്കാരും അഭയാർത്ഥികളും പ്രാദേശിക കളിക്കാരും അണിനിരന്ന ഈ ടൂർണമെന്റ്, കമ്പിവേലികൾക്ക് അപ്പുറത്തുനിന്നുള്ള കാണികളുടെ ആർപ്പുവിളികളാലും സംഗീതത്താലും മുഖരിതമായിരുന്നു.

യഥാർത്ഥ ഫിഫ ലോകകപ്പിലേക്ക് യോഗ്യത നേടാൻ അൽബേനിയ, അഫ്ഗാനിസ്ഥാൻ, കാമറൂൺ, ഗിനിയ, മാലി, നൈജീരിയ, സുഡാൻ എന്നീ രാജ്യങ്ങൾക്ക് കഴിഞ്ഞിട്ടില്ലെങ്കിലും, ആ നാടുകളിൽ നിന്നുള്ള അമച്വർ കളിക്കാർ ഏഥൻസിലെ മൈതാനങ്ങളിൽ തങ്ങളുടെ ഏറ്റവും മികച്ച കളി പുറത്തെടുത്തു.

വരാനിരിക്കുന്ന ജൂൺ മാസം മുതൽ യൂറോപ്യൻ യൂണിയൻ കുടിയേറ്റക്കാർക്കെതിരെ കൂടുതൽ കർശനമായ നിയമങ്ങൾ നടപ്പിലാക്കാൻ ഒരുങ്ങുന്ന സാഹചര്യത്തിൽ, ഈ ടൂർണമെന്റ് അവർക്ക് കളിചിരികളുടെയും സന്തോഷത്തിന്റെയും സ്വന്തം ഐഡന്റിറ്റി ആഘോഷിക്കലിന്റെയും വേദിയായി മാറി.

ഐവറി കോസ്റ്റിന്റെയും കോംഗോയുടെയും പതാകകൾ വീശിയും ആഫ്രിക്കൻ പോപ്പ് മ്യൂസിക്കിന്റെ താളത്തിനൊപ്പം നൃത്തം വെച്ചും ആരാധകർ കളി ആഘോഷമാക്കി. ഐവറി കോസ്റ്റുകാരനായ മൂസ സംഗാരെയാണ് മൂന്ന് വർഷങ്ങൾക്ക് മുൻപ് 'കിപ്സെലി മുണ്ടിയൽ' എന്ന പേരിൽ ഈ ടൂർണമെന്റ് ആരംഭിച്ചത്.

കുടിയേറ്റക്കാരെക്കുറിച്ചുള്ള ഭീതിയും അവിശ്വാസവും മാറ്റിയെടുക്കാൻ ഫുട്ബോളിനെ ഒരു ആയുധമാക്കുകയായിരുന്നു അദ്ദേഹം. "ആളുകൾക്ക് പലപ്പോഴും കുടിയേറ്റക്കാരെ ഭയമാണ്, എന്നാൽ ആ ചിന്താഗതി മാറ്റാനാണ് ഞങ്ങൾ ആഗ്രഹിക്കുന്നത്.

അവരുമായി ഇടപഴകുമ്പോൾ ആളുകളുടെ മനസ്സിലെ തെറ്റിദ്ധാരണകൾ മാറും. ഞങ്ങളെ സംബന്ധിച്ചിടത്തോളം ഇത് ഗ്രീസിലെ ഒരു മിനി ലോകകപ്പാണ്," മൂസ സംഗാരെ പറഞ്ഞു.

ജൂൺ 11-നാണ് ലോകമെമ്പാടുമുള്ള ഫുട്ബോൾ പ്രേമികൾ കാത്തിരിക്കുന്ന അഞ്ച് ആഴ്ച നീളുന്ന ഫിഫ ലോകകപ്പ് ആരംഭിക്കുന്നത്. തൊട്ടടുത്ത ദിവസം, അതായത് ജൂൺ 12-നാണ് കുടിയേറ്റക്കാർക്കെതിരെയുള്ള യൂറോപ്യൻ യൂണിയന്റെ കർശനമായ അതിർത്തി നിയന്ത്രണങ്ങളും വേഗത്തിലുള്ള നാടുകടത്തൽ നിയമങ്ങളും പ്രാബല്യത്തിൽ വരുന്നത്.

ഈ കടുത്ത രാഷ്ട്രീയ സാഹചര്യങ്ങൾക്കിടയിലും ഏഥൻസിലെ മൈതാനങ്ങൾ സൗഹൃദത്തിന്റെ പുതിയ ചരിത്രമെഴുതി. ഏഥൻസിലെ റെസ്റ്റോറന്റ് അടുക്കളകളിലും ഹോട്ടലുകളിലും നിർമ്മാണ മേഖലകളിലും ഫുഡ് ഡെലിവറി ജോലികളിലും കഠിനാധ്വാനം ചെയ്യുന്നവരാണ് ഇവിടുത്തെ ഭൂരിഭാഗം കളിക്കാരും. അവർക്ക് തങ്ങളുടെ ദൈനംദിന ജീവിതത്തിലെ കഷ്ടപ്പാടുകൾ മറക്കാനുള്ള വലിയൊരു ആശ്വാസമായിരുന്നു ഈ ടൂർണമെന്റ്.

ആകെ 21 ടീമുകൾ പങ്കെടുത്ത ആവേശകരമായ മത്സരങ്ങളിൽ പുരുഷന്മാരുടെ വിഭാഗത്തിൽ നൈജീരിയ കിരീടം ചൂടിയപ്പോൾ, വനിതാ വിഭാഗത്തിൽ ഗ്രീസിലെ പ്രാദേശിക ക്ലബ്ബായ ഫോസ്റ്റിറാസ് ജേതാക്കളായി.

വ്യത്യസ്ത സംസ്കാരങ്ങളെയും രാജ്യങ്ങളെയും ആദരിക്കാനും പരസ്പരം ബഹുമാനിക്കാനും പഠിപ്പിക്കുന്നതാണ് ഈ ടൂർണമെന്റെന്ന് ഫൈനൽ നിയന്ത്രിച്ച മുഖ്യ റഫറി ചര വോഗിയാറ്റ്സിഡാക്കി അഭിപ്രായപ്പെട്ടു.