വിശ്വമഹാവേദിയിൽ റെക്കോഡുകളെഴുതുന്ന പത്താം നമ്പർ

വിശ്വമഹാവേദിയിൽ ഒരിക്കൽക്കൂടി അർജന്റീനയുടെ പത്താം നമ്പർ ജേഴ്സി വിസ്മയം തീർത്തിരിക്കുന്നു. അൾജീരിയയ്‌ക്കെതിരായ മത്സരത്തിൽ അർജന്റീന അനായാസ വിജയം നേടിയപ്പോൾ, ഫുട്ബോൾ ലോകം ചർച്ച ചെയ്യുന്നത് ആ വിജയത്തെക്കുറിച്ച് മാത്രമല്ല, മറിച്ച് ലയണൽ മെസ്സി എന്ന ഒറ്റയാൾ പടുത്തുയർത്തിയ റെക്കോർഡുകളെ കുറിച്ച് കൂടിയാണ്. അൾജീരിയയ്‌ക്കെതിരെ ഹാട്രിക് നേടിയതോടെ ലോകകപ്പിൽ ഏറ്റവും കൂടുതൽ ഗോൾ നേടിയ താരം എന്ന ജർമൻ താരം മിറോസ്ലാവ് ക്ലോസിന്റെ റെക്കോർഡിനൊപ്പം മെസ്സി എത്തി. 16 ഗോളുകളാണ് ഇരുവരുടേയും നേട്ടം.

ആറ് ഫിഫ ലോകകപ്പ് ടൂർണമെന്റുകളിൽ പങ്കെടുക്കുന്ന ഫുട്ബോൾ ചരിത്രത്തിലെ ആദ്യ കളിക്കാരനായി ലയണൽ മെസ്സി മാറി. 2006ൽ കൗമാരക്കാരനായാണ് മെസ്സി ലോകകപ്പിൽ അരങ്ങേറിയത്. ലോകകപ്പിൽ ഹാട്രിക് നേടുന്ന ഏറ്റവും പ്രായം കൂടിയ കളിക്കാരനായി 38കാരനായ മെസ്സി മാറി. 2018-ൽ ക്രിസ്റ്റ്യാനോ റൊണാൾഡോ സ്ഥാപിച്ച റെക്കോർഡാണ് മറികടന്നത്. അർജന്റീനയുടെ ഏറ്റവും പ്രായം കുറഞ്ഞ ലോകകപ്പ് ഗോൾ സ്കോററും മെസ്സിയായിരുന്നു.

തുടർച്ചയായി അഞ്ച് ലോകകപ്പ് മത്സരങ്ങളിൽ ഗോൾ നേടുന്ന ആദ്യ കളിക്കാരനാണ് മെസ്സി. 2022ലെ അവസാന മത്സരങ്ങളും 2026ലെ ആദ്യ മത്സരവും ഉൾപ്പെടെയാണിത്. കൻസാസ് സിറ്റി സ്റ്റേഡിയത്തിൽ അൾജീരിയയ്‌ക്കെതിരെ നടന്ന മത്സരം അന്താരാഷ്ട്ര ഫുട്ബോളിൽ മെസ്സിയുടെ 200-ാം മത്സരമായിരുന്നു. ക്രിസ്റ്റ്യാനോ റൊണാൾഡോ, കുവൈത്തിന്റെ ബദർ അൽ-മുതാവ എന്നിവർക്ക് ശേഷം ഈ നേട്ടത്തിലെത്തുന്ന മൂന്നാമത്തെ താരമാണ് മെസ്സി.

മെസ്സിയുടെ കരിയറിലെ ആദ്യ ലോകകപ്പ് ഹാട്രിക് ആയിരുന്നു ഇത്. ഇതോടെ അദ്ദേഹത്തിന്റെ അന്താരാഷ്ട്ര ഗോളുകളുടെ എണ്ണം 120 ആയി. മത്സരത്തിൽ അർജന്റീന 3-0 നാണ് വിജയിച്ചത്. ഇന്റർ മിയാമി താരമായ മെസ്സി 2026 എംഎൽഎസ് (MLS) സീസണിൽ 16 മത്സരങ്ങളിൽ നിന്ന് 13 ഗോളുകളുമായി മികച്ച ഫോമിലാണ്. 2022 ഖത്തർ ലോകകപ്പ് ചാമ്പ്യന്മാരായ അർജന്റീന 2026 ലോകകപ്പിലെ തങ്ങളുടെ ആദ്യ മത്സരത്തിൽ മികച്ച വിജയത്തോടെ കിരീടത്തിലേക്കുള്ള യാത്ര ആരംഭിച്ചു.

ജൂൺ 22 തിങ്കളാഴ്ച ഡാലസിൽ വെച്ച് അർജന്റീന ഓസ്ട്രിയയെയും, ജൂൺ 27ന് ഗ്രൂപ്പ് ഘട്ടത്തിലെ അവസാന മത്സരത്തിൽ ജോർദാനെയും നേരിടും. മെസ്സിക്ക് ഇത്തവണ കിരീടം നിലനിർത്താൻ കഴിഞ്ഞാൽ, ആ നേട്ടം കൈവരിക്കുന്ന ആദ്യ അർജന്റീനിയൻ ക്യാപ്റ്റനായി അദ്ദേഹം മാറും ഇത് ഡീഗോ മറഡോണയ്ക്ക് പോലും സാധിക്കാത്ത നേട്ടമാണ്.

കോംഗോയ്‌ക്കെതിരെ കളിച്ചാൽ പോർച്ചുഗലിന്റെ റൊണാൾഡോയും മെക്സിക്കൻ ഗോൾകീപ്പർ ഒച്ചോവയും ആറ് ലോകകപ്പുകൾ കളിക്കുക എന്ന മെസ്സിയുടെ റെക്കോർഡിനൊപ്പമെത്തും.