വനിതാ ഇൻവിറ്റേഷൻ ട്വന്റി 20; കേരളത്തിന് തോൽവി

ഭുവനേശ്വർ: ഒഡീഷ ക്രിക്കറ്റ് അസോസിയേഷൻ സംഘടിപ്പിക്കുന്ന വനിതാ ഇൻവിറ്റേഷൻ ട്വന്റി 20 ചാമ്പ്യൻഷിപ്പിൽ കേരളത്തിന് തോൽവി. ബംഗാൾ ആറ് വിക്കറ്റിനാണ് കേരളത്തെ തോൽപ്പിച്ചത്. ആദ്യം ബാറ്റ് ചെയ്ത കേരളം 20 ഓവറിൽ ആറ് വിക്കറ്റ് നഷ്ടത്തിൽ 138 റൺസെടുത്തു. മറുപടി ബാറ്റിങ്ങിന് ഇറങ്ങിയ ബംഗാൾ 18.4 ഓവറിൽ നാല് വിക്കറ്റ് നഷ്ടത്തിൽ ലക്ഷ്യത്തിലെത്തി.

ടോസ് നേടി ബാറ്റിങ് തെരഞ്ഞെടുത്ത കേരളത്തിന് ഓപ്പണർ കിരൺ നവ്ഗിരെയുടെ തകർപ്പൻ ഇന്നിങ്സ് മികച്ച തുടക്കം നൽകി. 21 പന്തുകളിൽ മൂന്ന് ഫോറും ആറ് സിക്സുമടക്കം കിരൺ 53 റൺസ് നേടി. എന്നാൽ തുടക്കത്തിൽ തന്നെ ക്യാപ്റ്റൻ ടി ഷാനിയും (7) അക്ഷയയും (4) പുറത്തായത് ടീമിന് തിരിച്ചടിയായി. മധ്യനിരയിൽ ദൃശ്യയും (15), സജന സജീവനും (2) ഫോമിലേക്ക് ഉയർന്നതുമില്ല. ദിവ്യ ഗണേഷും നജ്ല സിഎംസിയും ചേർന്നുള്ള കൂട്ടുകെട്ടാണ് കേരളത്തിന്റെ സ്കോർ 138ൽ എത്തിച്ചത്. ദിവ്യ 19 പന്തുകളിൽ നിന്ന് 30 റൺസും നജ്ല 30 പന്തുകളിൽ നിന്ന് 23 റൺസും നേടി. ബംഗാളിന് വേണ്ടി ബിദിഷ ദേ രണ്ട് വിക്കറ്റ് വീഴ്ത്തി.

മറുപടി ബാറ്റിങ്ങിന് ഇറങ്ങിയ ബംഗാളിന് ഓപ്പണർമാർ നൽകിയ മികച്ച തുടക്കം മുതൽക്കൂട്ടായി. ബ്രിഷ്ടി മാജി 48 റൺസും സുജാത ദേ 25 റൺസും റൺസ് നേടി. മധ്യ ഓവറുകളിൽ തുടരെ രണ്ട് വിക്കറ്റുകൾ നഷ്ടപ്പെട്ടതും ഒരാൾ പരിക്കേറ്റ് ക്രീസ് വിട്ടതും ബംഗാളിനെ സമ്മർദ്ദത്തിലാക്കി. എന്നാൽ ബ്രിഷ്ടി മാജിയും മിത പോളും ചേർന്ന 43 റൺസ് കൂട്ടുകെട്ട് മത്സരം ബംഗാളിന് അനുകൂലമാക്കി. എട്ട് പന്തുകൾ ബാക്കി നില്ക്കെ ബംഗാൾ ലക്ഷ്യത്തിലെത്തി. മിത പോൾ 39 റൺസെടുത്തു. കേരളത്തിന് വേണ്ടി സജന സജീവൻ, നിയ നസ്നീൻ, ടി ഷാനി എന്നിവർ ഓരോ വിക്കറ്റ് വീതം വീഴ്ത്തി.