ഇതും ചരിത്രം! ഓരോ മത്സരത്തിലും റെക്കോഡുകൾ തിരുത്തുന്ന വൈഭവ്

ഹരാരെ: അന്താരാഷ്ട്ര ക്രിക്കറ്റ് ചരിത്രത്തിൽ പുതിയ അധ്യായം കുറിച്ച് ഇന്ത്യൻ കൗമാര താരം വൈഭവ് സൂര്യവംശി. സിംബാബ്‌വെക്കെതിരായ ഒന്നാം ട്വന്റി-20 മത്സരത്തിൽ അർധസെഞ്ചുറി തികച്ചതോടെ, സീനിയർ അന്താരാഷ്ട്ര ക്രിക്കറ്റിൽ ഫിഫ്റ്റി നേടുന്ന ലോകത്തിലെ ഏറ്റവും പ്രായം കുറഞ്ഞ താരമെന്ന റെക്കോഡ് ഈ 15കാരൻ സ്വന്തമാക്കി.

​15 വയസും 118 ദിവസവും പ്രായമുള്ളപ്പോഴാണ് വൈഭവ് ഈ അപൂർവ നേട്ടത്തിലെത്തിയത്. നേപ്പാൾ താരം കുശാൽ മല്ലയുടെ റെക്കോഡാണ് വൈഭവ് മറികടന്നത്. കുശാലിന് 15 വയസും 340 ദിവസവുമായിരുന്നു റെക്കോഡ് നേടുമ്പോഴുള്ള പ്രായം.

​അന്താരാഷ്ട്ര ക്രിക്കറ്റിൽ ഫിഫ്റ്റി നേടുന്ന ഏറ്റവും പ്രായം കുറഞ്ഞ ഇന്ത്യൻ താരമെന്ന സച്ചിൻ തെൻഡുൽക്കറുടെ 36 വർഷം പഴക്കമുള്ള റെക്കോഡും വൈഭവ് തിരുത്തിക്കുറിച്ചു. 16 വയസും 213 ദിവസവും പ്രായമുള്ളപ്പോഴായിരുന്നു സച്ചിൻ ഈ റെക്കോഡ് നേടിയത്.

​വെറും 18 പന്തുകളിൽ നിന്നാണ് വൈഭവ് തന്റെ കന്നി അന്താരാഷ്ട്ര അർധസെഞ്ചുറി പൂർത്തിയാക്കിയത്. 4 ഫോറുകളും 4 സിക്സറുകളും അടങ്ങുന്നതായിരുന്നു ഈ മാസ്മരിക ഇന്നിങ്സ്. ഐപിഎല്ലിലും അണ്ടർ-19 ലോകകപ്പിലും മിന്നുന്ന പ്രകടനം പുറത്തെടുത്ത വൈഭവ്, ഇപ്പോൾ സീനിയർ ടീമിലും തന്റെ അവിസ്മരണീയമായ സാന്നിധ്യം ഉറപ്പിച്ചിരിക്കുകയാണ്.