ഇന്ത്യയ്ക്ക് ആശ്വാസം; കളത്തിലിറങ്ങി ശുഭ്മൻ ഗിൽ, നെറ്റ്സിൽ പരിശീലനം തുടങ്ങി

കൊളംബോ : പരിക്കിനെ തുടർന്ന് സന്നാഹ മത്സരത്തിൽ നിന്ന് വിട്ടുനിന്ന ഇന്ത്യൻ ക്യാപ്റ്റൻ ശുഭ്മൻ ഗിൽ നെറ്റ്സിൽ പരിശീലനം തുടങ്ങി. ശ്രീലങ്കൻ ഇലവനെതിരായ ത്രിദിന സന്നാഹ മത്സരത്തിന്റെ മൂന്നാം ദിനത്തിന് മുന്നോടിയായാണ് ഗിൽ കൊളംബോയിൽ ബാറ്റിങ് പരിശീലനത്തിനിറങ്ങിയത്. പരിശീലനത്തിനിടെ വലതുകൈ വിരലിന് പരുക്കേറ്റതിനെ തുടർന്നാണ് താരത്തിന് സന്നാഹ മത്സരം നഷ്ടമായത്.

കെഎൽ രാഹുലിന്റെ നേതൃത്വത്തിലാണ് ഇന്ത്യ സന്നാഹ മത്സരത്തിനിറങ്ങിയത്. ഓഗസ്റ്റ് 15ന് ഗാളിൽ ആരംഭിക്കുന്ന ഒന്നാം ടെസ്റ്റിന് മുൻപ് ഗിൽ കായികക്ഷമത കൈവരിക്കുന്നത് ടീമിന് ആശ്വാസമാകും. ലങ്കൻ പര്യടനത്തിന് മുന്നോടിയായി നിരവധി പ്രമുഖ താരങ്ങളാണ് പരിക്കിന്റെ പിടിയിലായത്. ജസ്പ്രീത് ബുമ്ര, ഹർഷിത് റാണ, വാഷിംഗ്ടൺ സുന്ദർ, നിതീഷ് കുമാർ റെഡ്ഡി എന്നിവർക്ക് പിന്നാലെ കാൽവിരലിന് പരുക്കേറ്റ സായ് സുദർശനും പരമ്പരയിൽ നിന്ന് പുറത്തായി.

ലോക ടെസ്റ്റ് ചാമ്പ്യൻഷിപ്പിന്റെ ഭാഗമായതിനാൽ ഈ പരമ്പര ഇരുടീമുകൾക്കും നിർണായകമാണ്. നിലവിൽ പോയിന്റ് പട്ടികയിൽ ഇന്ത്യ അഞ്ചാമതും ശ്രീലങ്ക ആറാമതുമാണ്. ഓഗസ്റ്റ് 15ന് ഗാളിൽ ഒന്നാം ടെസ്റ്റും ഓഗസ്റ്റ് 23ന് കൊളംബോയിൽ രണ്ടാം ടെസ്റ്റും ആരംഭിക്കും.