കെകെആർ കൈവിട്ട നിധി; പഞ്ചാബിന്റെ ഭാഗ്യനക്ഷത്രം

കൊൽക്കത്ത: 2024 ഐപിഎല്ലിൽ കൊൽക്കത്ത നൈറ്റ് റൈഡേഴ്‌സിനെ കിരീടത്തിലേക്ക് നയിച്ച നായകൻ ശ്രേയസ് അയ്യറെ നിലനിർത്താൻ കഴിയാതെ പോയത് ആ ടീം ചെയ്ത വലിയൊരു പിഴവായാണ് ക്രിക്കറ്റ് ലോകം വിലയിരുത്തുന്നത്.

ഈ സീസണിൽ ഇരു ടീമുകളും നേർക്കുനേർ വരുമ്പോൾ, കൊൽക്കത്തയുടെ ആ വലിയ നഷ്ടം പഞ്ചാബ് കിങ്സിന്റെ വൻ നേട്ടമായി മാറിയിരിക്കുകയാണ്. 2025-ൽ പഞ്ചാബിനെ ഫൈനലിലെത്തിച്ച ശ്രേയസ്, 2026-ലും ടീമിനെ മികച്ച വിജയങ്ങളോടെ മുന്നിൽ നിന്ന് നയിക്കുന്നു.

ബാറ്റിങ്ങിലും നായകമികവിലും ഒരുപോലെ തിളങ്ങുന്ന ശ്രേയസ് അയ്യർ, ഈ സീസണിൽ ഗുജറാത്തിനെതിരെയും ചെന്നൈയ്ക്കെതിരെയും പഞ്ചാബിനെ വിജയത്തിലേക്ക് നയിച്ചു. ചെന്നൈയ്‌ക്കെതിരായ മത്സരത്തിൽ 172.41 സ്ട്രൈക്ക് റേറ്റിൽ 50 റൺസ് നേടിയ അദ്ദേഹത്തിന്റെ പ്രകടനം ഏറെ ശ്രദ്ധേയമായിരുന്നു.

മറുവശത്ത്, പുതിയ നായകൻ അജിങ്ക്യ രഹാനെയ്ക്ക് കീഴിലിറങ്ങിയ കൊൽക്കത്തയ്ക്ക് മധ്യനിരയിലെ തകർച്ചയും സ്ഥിരതയില്ലായ്മയും വലിയ തിരിച്ചടിയാവുകയാണ്. കഴിഞ്ഞ രണ്ട് സീസണുകളിലും കൊൽക്കത്തയുടെ മധ്യനിര ബാറ്റർമാരുടെ ശരാശരിയും സ്ട്രൈക്ക് റേറ്റും ലീഗിലെ തന്നെ ഏറ്റവും കുറഞ്ഞ നിലയിലാണ്.

ഐപിഎൽ ചരിത്രത്തിൽ മൂന്ന് വ്യത്യസ്ത ടീമുകളെ (ഡൽഹി ക്യാപിറ്റൽസ്, കെകെആർ, പഞ്ചാബ് കിങ്‌സ് ) ഫൈനലിലെത്തിച്ച ഏക നായകൻ എന്ന അപൂർവ്വ റെക്കോർഡും ഇപ്പോൾ ശ്രേയസിന് സ്വന്തമാണ്. 60 ശതമാനത്തിലധികം വിജയശരാശരിയുള്ള അദ്ദേഹത്തിന്റെ ക്യാപ്റ്റൻസി റെക്കോർഡ് എംഎസ് ധോണി, രോഹിത് ശർമ്മ എന്നിവരേക്കാൾ മികച്ചതാണ്.

സ്പിന്നിനെ നേരിടുന്നതിലെ മികവിനൊപ്പം തന്റെ ഷോർട്ട് ബോൾ ദൗർബല്യം പരിഹരിച്ചതും താരത്തെ കൂടുതൽ അപകടകാരിയാക്കുന്നു. കഴിഞ്ഞ സീസണിൽ 604 റൺസാണ് അദ്ദേഹം അടിച്ചുകൂട്ടിയത്.

ദീർഘകാലാടിസ്ഥാനത്തിൽ ഒരു നായകനെ തിരഞ്ഞുകൊണ്ടിരുന്ന പഞ്ചാബിന് ശ്രേയസ് അയ്യരുടെ വരവ് വലിയ ആശ്വാസമാണ് നൽകിയത്. ഇന്ന് ഈഡൻ ഗാർഡൻസിൽ താൻ മുൻപ് നയിച്ച ടീമിനെതിരെ അദ്ദേഹം ഇറങ്ങുമ്പോൾ ആരാധകർക്കിടയിൽ ഒരു ചോദ്യം ബാക്കിയാവുന്നു

ശ്രേയസിനെ കൊൽക്കത്ത കൈവിടില്ലായിരുന്നുവെങ്കിൽ അവരുടെ അവസ്ഥ ഇന്ന് മറ്റൊന്നാകുമായിരുന്നില്ലേ? കെകെആറിന്റെ വീഴ്ചയും പഞ്ചാബിന്റെ കുതിപ്പും തമ്മിലുള്ള പ്രധാന വ്യത്യാസമായി ഇന്ന് ക്രിക്കറ്റ് വിദഗ്ധർ കാണുന്നത് ശ്രേയസ് അയ്യർ എന്ന മികച്ച ലീഡറുടെ സാന്നിധ്യമാണ്.