അജിത് അഗർക്കാരെ മാറ്റിയേക്കും; ലക്ഷ്മൺ പരിഗണനയിൽ

ന്യൂഡൽഹി: ബിസിസിഐ സെലക്ഷൻ കമ്മിറ്റി ചെയർമാൻ അജിത് അഗാർക്കറുടെ പകരക്കാരനായി മുൻ ഇന്ത്യൻ താരം വിവിഎസ് ലക്ഷ്മണിന്റെ പേര് പരിഗണിക്കുന്നതായി റിപ്പോർട്ട്.

ബംഗളൂരുവിലെ ബിസിസിഐ സെന്റർ ഓഫ് എക്സലൻസിന്റെ മേധാവിയായ ലക്ഷ്മണിനെ ചീഫ് സെലക്ടർ സ്ഥാനത്തേക്ക് കൊണ്ടുവരാനാണ് ബോർഡിലെ ഉന്നതർ ആലോചിക്കുന്നതെന്നാണ് റിപ്പോർട്ടുകൾ.

2027 ലെ ഏകദിന ലോകകപ്പ് വരെ അഗാർക്കർ തന്നെ ചീഫ് സെലക്ടറായി തുടരുമെന്നായിരുന്നു നേരത്തെ പ്രതീക്ഷിച്ചിരുന്നത്. എന്നാൽ ഇന്ത്യൻ ഏകദിന ടീമിലെ രോഹിത് ശർമയുടെ ഭാവിയെ ചുറ്റിപ്പറ്റിയുള്ള വിവാദങ്ങൾക്കുശേഷം സാഹചര്യങ്ങൾ മാറിയെന്നാണ് സൂചന.

ഇംഗ്ലണ്ടിനെതിരായ ഏകദിന പരമ്പര രോഹിതിന്റെ അവസാന പരമ്പരയാകുമെന്ന് റിപ്പോർട്ടുകൾ പുറത്തുവന്നിരുന്നു. അഗാർക്കറുടെ നേതൃത്വത്തിലുള്ള സെലക്ഷൻ കമ്മിറ്റി, രോഹിതിനെ തുടർന്നുള്ള മത്സരങ്ങളിൽ നിന്ന് ഒഴിവാക്കുന്നതുമായി ബന്ധപ്പെട്ട് ഗൗതം ഗംഭീറിന്റെ നേതൃത്വത്തിലുള്ള ടീം മാനേജ്മെന്റുമായി ചർച്ച നടത്തിയതായും റിപ്പോർട്ടുകളുണ്ടായിരുന്നു.

എന്നാൽ ലോർഡ്സിൽ നടന്ന ഇംഗ്ലണ്ടിനെതിരായ മൂന്നാം ഏകദിനത്തിൽ രോഹിത് ശർമ സെഞ്ച്വറി നേടിയതോടെ സാഹചര്യം മാറി. മത്സരത്തിന് മുമ്പ് പുറത്തുവന്ന റിപ്പോർട്ടുകൾക്ക് പിന്നാലെ നേടിയ ഈ പ്രകടനം സെലക്ടർമാരെയും ടീം മാനേജ്മെന്റിനെയും സമ്മർദ്ദത്തിലാക്കി.

ഇതിനിടെ, ബിസിസിഐ സെക്രട്ടറി ദേവജിത് സൈകിയ രോഹിതിന്റെ ഭാവിയെക്കുറിച്ച് പ്രസ്താവന നടത്തി. ടീമിന്റെ പദ്ധതികളിൽ ഉൾപ്പെട്ടിരിക്കുന്നിടത്തോളം കാലം രോഹിത് ഇന്ത്യൻ ഏകദിന ടീമിന്റെ ഭാഗമായിരിക്കുമെന്ന് അദ്ദേഹം വ്യക്തമാക്കിയിരുന്നു.

"രോഹിത് ഇന്ത്യൻ ഏകദിന ടീമിലെ സ്ഥിരാംഗമാണ്. ടീമിന്റെ പദ്ധതികളിൽ ഉൾപ്പെട്ടിരിക്കുന്നിടത്തോളം കാലം അദ്ദേഹം രാജ്യത്തിനായി കളിക്കുന്നത് തുടരും. ലോർഡ്സിലെ മത്സരം അദ്ദേഹത്തിന്റെ അവസാന ഏകദിനമല്ല," സൈകിയ പറഞ്ഞു. അതേസമയം, 2027ലെ ഏകദിന ലോകകപ്പിൽ രോഹിത് ശർമയെ ഉൾപ്പെടുത്താൻ ടീം മാനേജ്മെന്റിന് താൽപര്യമില്ലെന്ന റിപ്പോർട്ടുകളും പുറത്തുവന്നിട്ടുണ്ട്.

ഇതിനുപുറമെ, അയർലൻഡിലും ഇംഗ്ലണ്ടിലും നേരിട്ട തിരിച്ചടികളെക്കുറിച്ചുള്ള റിവ്യൂ യോഗം നടത്താതെ ടീം ശ്രീലങ്കൻ പര്യടനത്തിന് പുറപ്പെട്ടതും ബോർഡിനുള്ളിൽ അതൃപ്തി വർധിപ്പിച്ചിട്ടുണ്ട്. ഇതോടെയാണ് അഗാർക്കർക്ക് പകരം ലക്ഷ്മണെ ചുമതലയേൽപ്പിക്കാൻ ബിസിസിഐ നീക്കം ശക്തമാക്കിയത്.