"അവർ പറഞ്ഞത് തെറ്റാണെന്ന് തെളിയിക്കണമായിരുന്നു"; പരിഹാസങ്ങളെ ബാറ്റ് കൊണ്ട് നേരിട്ട് ശ്രേയസ് അയ്യർ

മുംബൈ: തന്റെ ബാറ്റിംഗിലെ പ്രധാന പോരായ്മയായി ചൂണ്ടിക്കാണിക്കപ്പെട്ടിരുന്ന ഷോർട്ട് ബോൾ ദൗർബല്യത്തെ അതിജീവിച്ചതിനെക്കുറിച്ച് മനസ്സ് തുറന്ന് പഞ്ചാബ് കിംഗ്സ് നായകൻ ശ്രേയസ് അയ്യർ. തനിക്ക് ഷോർട്ട് ബോളുകൾ നേരിടാൻ അറിയില്ലെന്ന് പരിഹസിച്ചവർ തെറ്റാണെന്ന് തെളിയിക്കുക എന്നത് വലിയൊരു ലക്ഷ്യമായിരുന്നുവെന്ന് അയ്യർ പറഞ്ഞു. ഐപിഎൽ 2026 സീസണിൽ പഞ്ചാബ് കിംഗ്സിനായി തകർപ്പൻ പ്രകടനം നടത്തുന്നതിനിടെയാണ് താരം തന്റെ കഠിനാധ്വാനത്തെക്കുറിച്ച് വ്യക്തമാക്കിയത്.

തന്റെ ദൗർബല്യങ്ങളെക്കുറിച്ചുള്ള ചർച്ചകൾ തന്നെ തളർത്തുകയല്ല, മറിച്ച് കൂടുതൽ കരുത്തനാക്കുകയാണ് ചെയ്തതെന്ന് അയ്യർ വ്യക്തമാക്കി. "എല്ലാവർക്കും ഓരോ അഭിപ്രായമുണ്ടാകാം, എന്നാൽ മൈതാനത്ത് പോയി കളിക്കേണ്ടത് ഞാനാണ്. ഷോർട്ട് ബോളുകൾ എനിക്ക് വെല്ലുവിളിയാണെന്ന് പലരും പറഞ്ഞു നടന്നു. ആ വെല്ലുവിളി ഏറ്റെടുത്ത് പരീശീലനം തുടരുകയും ഇപ്പോൾ അത് ആത്മവിശ്വാസത്തോടെ നേരിടാൻ സാധിക്കുകയും ചെയ്യുന്നുണ്ട്. അവർ തെറ്റാണെന്ന് തെളിയിക്കാൻ എനിക്ക് സാധിച്ചു," ശ്രേയസ് അയ്യർ പറഞ്ഞു.

ഈ സീസണിൽ പഞ്ചാബ് കിംഗ്സിനെ മുന്നിൽ നിന്ന് നയിക്കുന്ന അയ്യർ, നിർണ്ണായക മത്സരങ്ങളിൽ ഷോർട്ട് ബോളുകളെ ഫലപ്രദമായി നേരിട്ട് റൺസ് കണ്ടെത്തുന്നത് ശ്രദ്ധേയമാണ്. ബൗളർമാർ തന്നെ കുടുക്കാൻ എറിയുന്ന ഷോർട്ട് പിച്ചുകൾ ഇപ്പോൾ ബൗണ്ടറികളാക്കി മാറ്റാൻ അദ്ദേഹത്തിന് സാധിക്കുന്നുണ്ട്. നെറ്റ്സിലെ കഠിനമായ പരിശീലനവും കൃത്യമായ തയ്യാറെടുപ്പുകളുമാണ് തന്റെ ബാറ്റിംഗിൽ ഈ മാറ്റം കൊണ്ടുവന്നതെന്ന് അദ്ദേഹം കൂട്ടിച്ചേർത്തു.

നിലവിൽ പോയിന്റ് പട്ടികയിൽ ടീമിനെ മുൻനിരയിൽ എത്തിക്കാനുള്ള ശ്രമത്തിലാണ് അയ്യർ. ബാറ്റിംഗിലെ പോരായ്മകൾ പരിഹരിച്ചതോടെ കൂടുതൽ കരുത്തനായി മാറിയ താരം, വരാനിരിക്കുന്ന മത്സരങ്ങളിലും ഇതേ ഫോം തുടരാനാകുമെന്ന പ്രതീക്ഷയിലാണ്. ടീം മാനേജ്‌മെന്റും സഹതാരങ്ങളും നൽകുന്ന പിന്തുണ തന്റെ ആത്മവിശ്വാസം വർദ്ധിപ്പിച്ചതായും അദ്ദേഹം സൂചിപ്പിച്ചു.