'ഇതൊരു സ്വപ്ന സാക്ഷാത്കാരം'; സിംബാബ്‌വെക്കെതിരായ പരമ്പര നേട്ടത്തിന് പിന്നാലെ വൈഭവ് സൂര്യവംശി

ഹരാരെ : സിംബാബ്‌വെക്കെതിരായ ട്വന്റി20 പരമ്പര തൂത്തുവാരിയതിന് പിന്നാലെ തന്റെ സന്തോഷം പങ്കുവെച്ച് ഇന്ത്യൻ യുവതാരം വൈഭവ് സൂര്യവംശി. പ്ലെയർ ഓഫ് ദി മാച്ചും പ്ലെയർ ഓഫ് ദി സീരീസ് പുരസ്കാരവും സ്വന്തമാക്കാൻ കഴിഞ്ഞത് സ്വപ്ന സാക്ഷാത്കാരമാണ് എന്ന് താരം പ്രതികരിച്ചു. ടീം മാനേജ്‌മെന്റിന് താരം നന്ദിയും അറിയിച്ചു.

സിംബാബ്‌വെക്കെതിരായ മൂന്ന് മത്സരങ്ങളുടെ പരമ്പരയിൽ 50.33 ശരാശരിയിൽ 151 റൺസാണ് വൈഭവ് നേടിയത്. ആദ്യ ട്വന്റി20യിൽ 19 പന്തിൽ ഫിഫ്റ്റി നേടിയ താരം, മൂന്നാം മത്സരത്തിൽ 49 പന്തിൽ 81 റൺസ് നേടി ഇന്ത്യയുടെ 3-0 പരമ്പര വിജയത്തിൽ നിർണായക പങ്കുവഹിച്ചു.

വളരെ സന്തോഷം തോന്നുന്നു. ഇതൊരു സ്വപ്ന സാക്ഷാത്കാരമാണ്. ആദ്യമായി പ്ലെയർ ഓഫ് ദി മാച്ച്, പ്ലെയർ ഓഫ് ദി സീരീസ് പുരസ്കാരങ്ങൾ ലഭിക്കുന്നു. നായകനും പരിശീലകനുമടക്കം എല്ലാവരും എനിക്ക് പൂർണ പിന്തുണ നൽകി. ടീമിന് മികച്ച തുടക്കം നൽകാനും, തുടക്കം നന്നായാൽ വലിയ ഇന്നിങ്സ് കളിക്കാനുമാണ് ഞാൻ ശ്രമിച്ചത്. വൈഭവ് പറഞ്ഞു.

അതേസമയം, തനിക്ക് കീഴിലെ ആദ്യ പരമ്പര വിജയം സ്വന്തമാക്കിയതിന്റെ ആശ്വാസത്തിലാണ് ഇന്ത്യൻ ക്യാപ്റ്റൻ ശ്രേയസ് അയ്യർ. യുവതാരങ്ങളുടെ ഭയരഹിതമായ സമീപനവും ഊർജ്ജവുമാണ് വിജയത്തിന് വഴിവെച്ചതെന്ന് ശ്രേയസ് പറഞ്ഞു. ലോക ചാമ്പ്യന്മാരായ ഇന്ത്യക്കെതിരായ മത്സരം തങ്ങളുടെ യുവനിരയ്ക്ക് വലിയ കാര്യങ്ങൾ പഠിക്കാനുള്ള അവസരമാണ് നൽകിയതെന്ന് സിംബാബ്‌വെ നായകൻ സിക്കന്ദർ റാസ വ്യക്തമാക്കി.