കോഹ്‌ലിയെ ഡൽഹി വേണ്ടെന്ന് വെച്ചത് എന്തുകൊണ്ട്? വർഷങ്ങൾക്ക് ശേഷം വെളിപ്പെടുത്തലുമായി സെവാഗ്

മുംബൈ: ആദ്യ ഐപിഎൽ സീസണിൽ യുവതാരമായിരുന്ന വിരാട് കോഹ്‌ലിയെ ടീമിലെടുക്കാതെ ഡൽഹി ഡെയർഡെവിൾസ് (ഇന്നത്തെ ഡൽഹി ക്യാപിറ്റൽസ്) ഒഴിവാക്കിയതിന്റെ കാരണം വെളിപ്പെടുത്തി മുൻ ഇന്ത്യൻ ഓപ്പണർ വീരേന്ദർ സെവാഗ്.

ടീമിലെ ബാറ്റിംഗ് നിരയിലെ ആധിക്യവും മികച്ച ബൗളർമാരുടെ കുറവുമാണ് അന്ന് കോഹ്‌ലിക്ക് പകരം പ്രദീപ് സാങ്വാനെ തിരഞ്ഞെടുക്കാൻ ഡൽഹിയെ പ്രേരിപ്പിച്ചതെന്ന് സെവാഗ് പറഞ്ഞു. ജിയോ സ്റ്റാർ പ്ലാറ്റ്‌ഫോമിൽ സംസാരിക്കുകയായിരുന്നു അദ്ദേഹം.

2008-ൽ ഡൽഹി ടീമിൽ ടോപ്പ് ഓർഡർ ബാറ്റർമാരുടെ വലിയ നിര തന്നെയുണ്ടായിരുന്നുവെന്ന് സെവാഗ് ഓർത്തെടുത്തു. ഗൗതം ഗംഭീറും സെവാഗും ഓപ്പണർമാരായിരുന്നപ്പോൾ ശിഖർ ധവാൻ, തിലകരത്‌നെ ദിൽഷൻ എന്നിവർക്ക് യഥാക്രമം മൂന്നും അഞ്ചും സ്ഥാനങ്ങളിൽ ബാറ്റ് ചെയ്യേണ്ടി വന്നു.

നാലാം നമ്പറിൽ മനോജ് തിവാരി കൂടി എത്തിയതോടെ മുൻനിര ബാറ്റർമാരെ ടീമിൽ ഉൾപ്പെടുത്താൻ ഇടമില്ലാത്ത സാഹചര്യമായിരുന്നുവെന്നും അദ്ദേഹം വ്യക്തമാക്കി.അക്കാലത്ത് വിരാട് കോഹ്‌ലിയും മൂന്നാം നമ്പറിലോ നാലാം നമ്പറിലോ ബാറ്റ് ചെയ്യുന്ന താരമായിരുന്നു.

എന്നാൽ ടീമിന്റെ സന്തുലിതാവസ്ഥ നിലനിർത്താൻ ഒരു ബൗളറെ അത്യാവശ്യമായതിനാലാണ് കോഹ്‌ലിയെ ഒഴിവാക്കി ഇടംകൈയ്യൻ പേസർ പ്രദീപ് സാങ്വാനെ ടീമിലെടുത്തതെന്ന് സെവാഗ് പറഞ്ഞു. വിരാട് കോഹ്‌ലിക്ക് ബാറ്റിംഗ് ഓർഡറിൽ സ്ഥാനം നൽകാൻ സാധിക്കില്ലെന്ന തിരിച്ചറിവാണ് അന്ന് മാനേജ്‌മെന്റ് ഇത്തരമൊരു തീരുമാനമെടുക്കാൻ കാരണമായത്.

അന്ന് 12 ലക്ഷം രൂപയ്ക്ക് റോയൽ ചലഞ്ചേഴ്‌സ് ബാംഗ്ലൂർ സ്വന്തമാക്കിയ കോഹ്‌ലി പിന്നീട് ഐപിഎൽ ചരിത്രത്തിലെ തന്നെ ഏറ്റവും വലിയ ഇതിഹാസമായി മാറി. നിലവിൽ 272 മത്സരങ്ങളിൽ നിന്നായി എട്ട് സെഞ്ചുറികളടക്കം 8889 റൺസുമായി ടൂർണമെന്റിലെ എക്കാലത്തെയും ഉയർന്ന റൺവേട്ടക്കാരനാണ് വിരാട്. ഐപിഎൽ 2026 സീസണിലും അഞ്ച് മത്സരങ്ങളിൽ നിന്ന് 228 റൺസുമായി താരം മികച്ച ഫോം തുടരുകയാണ്.