വിജയപ്പന്ത്

ഓവൽ: അതിവേഗമോ പേടിപ്പെടുത്തുന്ന ആകാരമോ ഇല്ല. ആൾക്കൂട്ടത്തിന്റെ കൈയടികളില്ല. പരാതികളും പരിഭവങ്ങളും അവകാശ വാദങ്ങളുമില്ല. ഹൈദരാബാദുകാരനായ പേസ്​ ബ‍ൗളർ മുഹമ്മദ്​ സിറാജിന്​ ഇന്ത്യൻ ക്രിക്കറ്റിൽ അർഹിച്ച അംഗീകാരം കിട്ടുന്നില്ലെന്ന്​ പറഞ്ഞത്​ ബ‍ൗളിങ്​ പരിശീലകൻ മോണി മോർക്കലാണ്​. ക്യാപ്​റ്റൻ ആവശ്യപ്പെടുന്ന ഏത്​ സമയത്തും എത്ര സ്​പെല്ലും എറിയാൻ മടിയില്ലാത്ത ബ‍ൗളർ​. ഇംഗ്ലണ്ടിനെതിരായ പരമ്പരയിൽ 1113 പന്തുകളാണ്​ മുപ്പത്തൊന്നുകാരൻ എറിഞ്ഞത്​. അഞ്ച്​ കളിയിൽ 23​ വിക്കറ്റ്. പരമ്പരയിലെ മികച്ച വിക്കറ്റ്​ വേട്ടക്കാരനെന്ന ബഹുമതിയും സ്വന്തം.

ഓവലിൽ പലപ്പോഴും ഹൃദയംകൊണ്ട്​ പന്തെറിയുന്നപോലെ തോന്നി. ഓരോ പന്തും എതിരാളിയുടെ വിക്കറ്റ്​ തകർക്കാൻ ശ‍ൗര്യമുള്ളതായിരുന്നു.​ കളിയുടെ കയറ്റിറക്കങ്ങൾ ആ മുഖത്തുനോക്കിയാലറിയാം. നിരാശപ്പെടുകയും സന്തോഷിക്കുകയും ചെയ്​ത നിമിഷങ്ങൾ. തോറ്റിരുന്നെങ്കിൽ ക്രൂശിക്കാനുള്ള കാരണങ്ങൾ കണ്ടുപിടിക്കപ്പെടുമായിരുന്നു. സമൂഹമാധ്യമങ്ങളിൽ ആക്രമിക്കപ്പെടുമായിരുന്നു. ഒന്നാം ഇന്നിങ്​സിൽ ഇംഗ്ലണ്ട്​ വലിയ സ്​കോറിലേക്ക്​ നീങ്ങുന്നതിനെ തടയാനായി. നാല്​ വിക്കറ്റുമായി ഇന്ത്യയുടെ തിരിച്ചുവരവിന്​ വഴിമരുന്നിട്ടു. അപകടകാരികളായ ജോ റൂട്ടിന്റെയും ഹാരി ബ്രൂക്കിന്റെയും വിക്കറ്റുകൾ അതിൽ ഉൾപ്പെടും.

അടിച്ചെടുക്കുകയെന്ന ഏക മന്ത്രവുമായി എത്തിയ ഇംഗ്ലണ്ടിനുമുന്നിൽ 374 റണ്ണായിരുന്നു ലക്ഷ്യം. രണ്ട്​ ദിനം ബാക്കി. മൂന്നാംദിനം അവസാന പന്തിൽ സാക് ക്രോളിയെ ബ‍ൗൾഡാക്കിയായിരുന്നു സിറാജിന്റെ അടുത്ത തുടക്കം. നാലാംദിനം ക്യാപ്​റ്റൻ ഒല്ലീ പോപ്പിനെ മടക്കി. കാര്യങ്ങൾ ഇന്ത്യയുടെ വഴിക്കുവരികയായിരുന്നു. അതിനിടെയാണ്​ അബദ്ധം പിണഞ്ഞത്​. മുപ്പത്തഞ്ചാമത്തെ ഓവറിലെ ആദ്യപന്ത്. ​ പ്രസിദ്ധിനെ ബ്രൂക്ക്​ ഉയർത്തിയടിക്കുന്നു. പന്ത്​ ലോങ്​ ലെഗിലേക്ക്​. സിറാജ്​ പന്ത്​ പിടിച്ചെടുത്തു. രണ്ടടി പിന്നോട്ട്​. കാല്​ വരയിൽ തൊട്ടു. ബ‍ൗണ്ടറി വര കടന്ന്​, തൊപ്പികൊണ്ട്​ മുഖംമറച്ചു. കണ്ണടച്ചുനിന്ന സിറാജിന്റെ മുഖത്ത്​ നോക്കി ഒരു ഇംഗ്ലീഷ്​ ആരാധകൻ കൈയടിച്ചു. സ്​റ്റേഡിയത്തിലെ വലിയ സ്​ക്രീനിൽ വര ചവിട്ടു
ന്ന രംഗം വീണ്ടും കാണിക്കുമ്പോൾ ആർത്തുകൂ
വി. വിളറിയ സിറാജിന്റെ മുഖം വീണ്ടും കാണിച്ചു.

19 റണ്ണിൽനിന്ന്​ ജീവൻ കിട്ടിയ ബ്ര‍ൂക്ക്​ 111ലാണ്​ അവസാനിപ്പിച്ചത്​. കളി പൂർണമായും കൈവിട്ട​ നിമിഷത്തിലാണ്​ അഞ്ചാംദിനം​ സ്വപ്​ന സമാനമായ പ്രകടനം നടത്തിയത്​. ഒടുവിൽ ഗസ്​ അറ്റ്​കിൻസന്റെ കുറ്റി നിലംപതിച്ചപ്പോൾ സിറാജ്​ ഓവലിൽനിറഞ്ഞു.​ 30.1 ഓവറിൽ 104 റൺ വഴങ്ങി​ അഞ്ച്​ വിക്കറ്റ്​. ഇന്ത്യൻ പേസ്​നിരയുടെ മുഖമായ ജസ്​പ്രീത്​ ബുമ്രയുടെ അഭാവത്തിൽ സിറാജിനായിരുന്നു ബ‍ൗളിങ്​ വിഭാഗത്തിന്റെ ചുമതല. താരതമ്യേന തുടക്കക്കാരായ പ്രസിദ്ധിനും ആകാശിനും പരിമിതികളുണ്ടായിരുന്നു. ബുമ്രയുടെ നിഴലിൽനിന്നാണ്​ ഇപ്പോൾ തെളിഞ്ഞിരിക്കുന്നത്​.

പിച്ചിൽ കുത്തിയാൽ അപ്രതീക്ഷിതമായി ഏത്​ ഭാഗത്തേക്കും സ്വിങ്​ ചെയ്യുന്ന ‘വോബിൾ സീം’ ആണ്​ പ്രധാന ആയുധം. ലെങ്​തിൽ എപ്പോഴും കൃത്യത പാലിച്ചു. കഠിനാധ്വാനമായിരുന്നു കൈമുതൽ. ലോർഡ്​സ്​ ടെസ്​റ്റ്​ ഇപ്പോഴും വേദനയായി അവശേഷിക്കുന്നു. ഷോയ്ബ്​​ ബഷീറിന്റെ പന്ത്​ ബാറ്റിൽ തട്ടി സ്​റ്റമ്പിലേക്ക്​ വീണപ്പോൾ 22 റണ്ണിനായിരുന്നു ഇന്ത്യയുടെ തോൽവി. സിറാജിന്റെ ഹൃദയം മുറിഞ്ഞു. ‘അന്ന്​ ജഡ്ഡു ഭായ്​ (ജഡേജ) പറഞ്ഞു. ബാറ്റ്​ നേരെ പിടിക്കുക. പന്ത്​ മധ്യത്തിൽ കൊള്ളിക്കുക. അച്ഛന്റെ കഠിനാധ്വാനം ഓർക്കുക. പിന്നെ പന്ത്​ നേരിടുക. പക്ഷേ, എനിക്ക്​ പിടിച്ചുനിൽക്കാനായില്ല’– സിറാജിന്റെ വാക്കുകൾ. ആ പരാജിത ചിത്രംകൂ‍ടിയാണ്​ ഓവലിൽ സിറാജ്​ മായ്​ച്ചുകളഞ്ഞത്​.