നിതീഷ് കുമാർ റെഡ്ഡിക്ക് വീണ്ടും പരിക്ക്; അയർലൻഡ് പര്യടനം നഷ്ടമാകും

മുംബൈ: അയർലൻഡിനെതിരായ ട്വന്റി 20 പരമ്പരയ്ക്കുള്ള ഇന്ത്യൻ ടീമിൽ നിന്ന് ഓൾറൗണ്ടർ നിതീഷ് കുമാർ റെഡ്ഡി പുറത്ത്. തുടയിലെ പേശിക്കേറ്റ പരിക്കാണ് താരത്തിന് വിനയായത്.

ഈ പരിക്ക് വരാനിരിക്കുന്ന ഇംഗ്ലണ്ട് പര്യടനത്തിലും താരത്തിന്റെ പങ്കാളിത്തത്തെ ബാധിച്ചേക്കുമെന്നാണ് ബിസിസിഐ വൃത്തങ്ങൾ നൽകുന്ന സൂചന.

ഹാർദിക് പാണ്ഡ്യ ടീമിൽ ഇല്ലാത്ത സാഹചര്യത്തിൽ ഇന്ത്യയുടെ പ്രധാന പേസ് ബൗളിംഗ് ഓൾറൗണ്ടർ എന്ന നിലയിൽ വലിയ പ്രതീക്ഷയോടെയാണ് നിതീഷിനെ യുകെ പര്യടനത്തിനുള്ള ടീമിൽ ഉൾപ്പെടുത്തിയിരുന്നത്.

അഫ്ഗാനിസ്ഥാനെതിരായ അടുത്തിടെ സമാപിച്ച ഹോം പരമ്പരയ്ക്കിടെയാണ് താരത്തിന് പരിക്കേറ്റത്. ധരംശാലയിൽ നടന്ന മത്സരത്തിലൂടെ ഏകദിനത്തിൽ തന്റെ കന്നി വിക്കറ്റുകൾ താരം സ്വന്തമാക്കിയെങ്കിലും, ലക്നൗവിൽ നടന്ന രണ്ടാം ഏകദിനം പരിക്കുമൂലം നഷ്ടമായി.

ചെന്നൈയിൽ നടന്ന അവസാന ഏകദിനത്തിൽ താരം മടങ്ങിയെത്തിയെങ്കിലും പൂർണ്ണ കായികക്ഷമതയിൽ ബൗൾ ചെയ്യാൻ സാധിച്ചിരുന്നില്ല. ഐപിഎൽ 2025-ലും 2026-ലും ഫിറ്റ്‌നസ് പ്രശ്നങ്ങൾ നിതീഷിന്റെ കരിയറിനെ നിരന്തരം വേട്ടയാടിയിരുന്നു.

ബൗളിംഗ് വേഗതയും വർക്ക്ലോഡും വർദ്ധിപ്പിക്കാൻ തീവ്ര പരിശീലനം നടത്തുന്നതിനിടെയാണ് നിതീഷിന് വീണ്ടും പരിക്കേറ്റത് എന്നത് ടീം മാനേജ്‌മെന്റിനെ ആശങ്കയിലാക്കുന്നുണ്ട്.

നിലവിൽ ബിസിസിഐയുടെ സെന്റർ ഓഫ് എക്സലൻസിലേക്ക് റിപ്പോർട്ട് ചെയ്യാൻ താരത്തോട് നിർദ്ദേശിച്ചിട്ടുണ്ട്. വിദഗ്ദ്ധ പരിശോധനകൾക്ക് ശേഷമേ താരത്തിന് എത്രകാലം കളത്തിന് പുറത്തിരിക്കേണ്ടി വരുമെന്ന കാര്യത്തിൽ വ്യക്തത വരികയുള്ളൂ.