ഡിഫൻഡിങ് ചാമ്പ്യന്മാരല്ല, വീണ്ടും കിരീടം നേടാൻ ഇറങ്ങിയവർ; ലഖ്‌നൗവിനോട് തോറ്റെങ്കിലും ആത്മവിശ്വാസത്തിൽ രജത് പാട്ടിദാർ

ലഖ്‌നൗ: റോയൽ ചലഞ്ചേഴ്‌സ് ബംഗളൂരു ഈ സീസണിൽ കളിക്കുന്നത് ഡിഫൻഡിങ് ചാമ്പ്യന്മാരെന്ന നിലയിലല്ലെന്നും മറിച്ച് വീണ്ടും കിരീടം നേടുക എന്ന ലക്ഷ്യത്തോടെയാണെന്നും നായകൻ രജത് പാട്ടിദാർ.

വ്യാഴാഴ്ച ലഖ്‌നൗ സൂപ്പർ ജയന്റ്‌സിനോട് ഒമ്പത് റൺസിന് പരാജയപ്പെട്ടതിന് പിന്നാലെ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. 2025-ൽ കിരീടം നേടിയ സീസണിലുടനീളം ആകെ നാല് മത്സരങ്ങൾ മാത്രം തോറ്റ ആർസിബിക്ക്, ഈ സീസൺ പകുതി പിന്നിടുമ്പോൾ തന്നെ നാല് തോൽവികൾ പിണഞ്ഞിരിക്കുകയാണ്.

കിരീടം നിലനിർത്താനുള്ള സമ്മർദ്ദമുണ്ടോ എന്ന ചോദ്യത്തിന് മറുപടിയായി, കഴിഞ്ഞ സീസണിലെ നേട്ടങ്ങൾ ചരിത്രമാണെന്നും പുതിയ സീസണിൽ പുതിയൊരു ടീമായാണ് തങ്ങൾ കളത്തിലിറങ്ങുന്നതെന്നും പാട്ടിദാർ വ്യക്തമാക്കി.

പ്രതിരോധത്തിലൂന്നിയ കളിയല്ല, മറിച്ച് ആക്രമണോത്സുകമായ ക്രിക്കറ്റാണ് ടീം ലക്ഷ്യമിടുന്നത്. നിലവിൽ ആറ് വിജയങ്ങളുമായി പോയിന്റ് പട്ടികയിൽ മൂന്നാം സ്ഥാനത്തുള്ള ആർസിബി പ്ലേഓഫ് റേസിൽ ശക്തമായി തന്നെയുണ്ട്.

ലഖ്‌നൗവിനെതിരായ മത്സരത്തിൽ 210 റൺസ് എന്ന കൂറ്റൻ ലക്ഷ്യം പിന്തുടർന്ന ആർസിബിക്ക് പവർപ്ലേയിലെയും മധ്യ ഓവറുകളിലെയും മെല്ലെപ്പോക്കാണ് തിരിച്ചടിയായത്.

പവർപ്ലേയിൽ രണ്ട് വിക്കറ്റ് നഷ്ടത്തിൽ 45 റൺസ് മാത്രമാണ് ടീമിന് നേടാനായത്. മധ്യ ഓവറുകളിൽ 29 റൺസിനിടെ മൂന്ന് വിക്കറ്റുകൾ കൂടി നഷ്ടമായതോടെ ടീം പ്രതിരോധത്തിലായി. എങ്കിലും രണ്ട് മികച്ച ഷോട്ടുകൾ കൂടി ലഭിച്ചിരുന്നെങ്കിൽ മത്സരഫലം മാറുമായിരുന്നുവെന്ന് പാട്ടിദാർ അഭിപ്രായപ്പെട്ടു.

മിച്ചൽ മാർഷിന്റെ തകർപ്പൻ ബാറ്റിംഗാണ് ലഖ്‌നൗവിനെ കൂറ്റൻ സ്‌കോറിലെത്തിച്ചതെന്ന് പാട്ടിദാർ പറഞ്ഞു. എങ്കിലും മഴയെത്തുടർന്ന് കളി തടസ്സപ്പെട്ടത് തങ്ങളുടെ ബൗളർമാർക്ക് തന്ത്രങ്ങൾ മാറ്റാൻ സഹായിച്ചുവെന്നും കളി തിരികെ പിടിക്കാൻ അത് സാധ്യമാക്കിയെന്നും അദ്ദേഹം കൂട്ടിച്ചേർത്തു.

രജത് പാട്ടിദാർ (61), ടിം ഡേവിഡ് (40) എന്നിവർ പൊരുതിയെങ്കിലും അവസാന ഓവറിൽ 20 റൺസ് വിജയലക്ഷ്യം മറികടക്കാൻ ആർസിബിക്കായില്ല. ശേഷിക്കുന്ന മത്സരങ്ങളിലും ആരാധകരുടെ വലിയ പിന്തുണ ടീമിന് കരുത്താകുമെന്നും അദ്ദേഹം പ്രത്യാശ പ്രകടിപ്പിച്ചു.