പതിനാല് പോയിന്റുമായി മൂന്ന് ടീമുകൾ മുന്നിൽ; ഐപിഎല്ലിൽ മറ്റ് ടീമുകളുടെ പ്ലേ ഓഫ് സാധ്യതകൾ ഇങ്ങനെ

മുംബൈ: മുംബൈ ഇന്ത്യൻസിനെതിരായ ആവേശകരമായ പോരാട്ടത്തിൽ അവസാന പന്തിൽ വിജയം പിടിച്ചെടുത്തതോടെ റോയൽ ചലഞ്ചേഴ്സ് ബെംഗളൂരു ഐപിഎൽ 2026 പോയിന്റ് പട്ടികയിൽ ഒന്നാം സ്ഥാനത്തെത്തി.

രജത് പാട്ടിദാറിന്റെ നേതൃത്വത്തിലിറങ്ങിയ ആർസിബി, മുംബൈ ഉയർത്തിയ വെല്ലുവിളി മറികടന്നതോടെ ടൂർണമെന്റിലെ പ്ലേ ഓഫ് പോരാട്ടം പുതിയ ഘട്ടത്തിലേക്ക് കടന്നു.

ഈ തോൽവിയോടെ മുൻ ചാമ്പ്യന്മാരായ മുംബൈ ഇന്ത്യൻസും ലഖ്‌നൗ സൂപ്പർ ജയന്റ്‌സും പ്ലേ ഓഫ് കാണാതെ പുറത്തായപ്പോൾ, ബാക്കിയുള്ള എട്ട് ടീമുകൾ ആദ്യ നാലിലെത്താനുള്ള കടുത്ത പോരാട്ടത്തിലാണ്. പ്ലേ ഓഫിലേക്ക് എത്താൻ ടീമുകളുടെ സാദ്ധ്യതകൾ എങ്ങനെയെന്ന് പരിശോധിക്കാം.

റോയൽ ചലഞ്ചേഴ്സ് ബെംഗളൂരു

നിലവിലെ ചാമ്പ്യന്മാരായ ആർസിബി, മുംബൈക്കെതിരായ ആവേശജയത്തോടെ 11 മത്സരങ്ങളിൽ നിന്ന് 14 പോയിന്റുമായി പട്ടികയിൽ ഒന്നാമതാണ്. പ്ലേ ഓഫ് ഏകദേശം ഉറപ്പിക്കാൻ ഇവർക്ക് ഒരു വിജയം കൂടി മതിയാകും. എങ്കിലും, പോയിന്റ് പട്ടികയിൽ ആദ്യ രണ്ട് സ്ഥാനങ്ങളിൽ എത്തി 'ക്വാളിഫയർ 1' കളിക്കാനാണ് രജത് പാട്ടിദാറും സംഘവും ലക്ഷ്യമിടുന്നത്. +1.103 എന്ന മികച്ച നെറ്റ് റൺറേറ്റ് ഇവർക്ക് വലിയ ആത്മവിശ്വാസം നൽകുന്നുണ്ട്.

സൺറൈസേഴ്സ് ഹൈദരാബാദ്

പോയിന്റ് പട്ടികയിൽ രണ്ടാം സ്ഥാനത്തുള്ള ഹൈദരാബാദിനും 14 പോയിന്റാണുള്ളത്. പ്ലേ ഓഫ് യോഗ്യത ഉറപ്പാക്കാൻ ശേഷിക്കുന്ന മൂന്ന് മത്സരങ്ങളിൽ രണ്ടെണ്ണം ഇവർക്ക് ജയിക്കേണ്ടതുണ്ട്. മെയ് 22-ന് ആർസിബിക്കെതിരെ നടക്കുന്ന ഇവരുടെ അവസാന ലീഗ് മത്സരം പട്ടികയിലെ ഒന്നാം സ്ഥാനക്കാരെ നിശ്ചയിക്കുന്നതിൽ നിർണ്ണായകമാകും.

ഗുജറാത്ത് ടൈറ്റൻസ്

14 പോയിന്റുമായി മൂന്നാം സ്ഥാനത്താണെങ്കിലും ഗുജറാത്തിന്റെ റൺറേറ്റ് (+0.228) ആർസിബിയെയും ഹൈദരാബാദിനെയും അപേക്ഷിച്ച് കുറവാണ്. അതിനാൽ തന്നെ പ്ലേ ഓഫ് ഉറപ്പിക്കാൻ ഇവർക്ക് ചുരുങ്ങിയത് രണ്ട് വിജയങ്ങൾ കൂടി ആവശ്യമാണ്. മെയ് 12-ന് സൺറൈസേഴ്സുമായി നടക്കുന്ന മത്സരം ജിടിയുടെ ഭാവി തീരുമാനിക്കുന്നതിൽ പ്രധാന പങ്കുവഹിക്കും.

പഞ്ചാബ് കിംഗ്സ്

മറ്റ് ടീമുകളെ അപേക്ഷിച്ച് പഞ്ചാബ് കിംഗ്സ് നിലവിൽ മികച്ച നിലയിലാണ്. 10 മത്സരങ്ങളിൽ നിന്ന് 13 പോയിന്റുള്ള ഇവർക്ക് ഇനി നാല് മത്സരങ്ങൾ കൂടി ബാക്കിയുണ്ട്. ഇതിൽ രണ്ടെണ്ണം വിജയിച്ചാൽ 17 പോയിന്റോടെ ഇവർക്ക് പ്ലേ ഓഫ് യോഗ്യത ഉറപ്പിക്കാം. നിലവിലെ ഫോം തുടർന്നാൽ ആദ്യ നാലിൽ പഞ്ചാബ് ഇടംപിടിക്കുമെന്ന് ഉറപ്പാണ്.

ചെന്നൈ സൂപ്പർ കിംഗ്സ്

അഞ്ച് തവണ കിരീടം നേടിയ ചെന്നൈ ഇത്തവണ അല്പം വിയർക്കുന്നുണ്ട്. 12 പോയിന്റുള്ള ഇവർക്ക് പ്ലേ ഓഫ് സാധ്യത നിലനിർത്താൻ ശേഷിക്കുന്ന മൂന്ന് മത്സരങ്ങളിൽ രണ്ടെണ്ണമെങ്കിലും ജയിക്കണം. എന്നാൽ റൺറേറ്റ് കുറവായതിനാൽ (+0.185), സുരക്ഷിതരാകാൻ മൂന്ന് മത്സരങ്ങളും ജയിക്കുക എന്നതാണ് ചെന്നൈയ്ക്ക് മുന്നിലുള്ള പോംവഴി.

രാജസ്ഥാൻ റോയൽസ്

ചെന്നൈയെപ്പോലെ 12 പോയിന്റാണുള്ളതെങ്കിലും റൺറേറ്റിൽ രാജസ്ഥാൻ പിന്നിലാണ്. അവസാന നാല് മത്സരങ്ങളിൽ മൂന്നിലും പരാജയപ്പെട്ടത് സഞ്ജുവിനും സംഘത്തിനും വലിയ തിരിച്ചടിയായി. പ്ലേ ഓഫ് സ്ഥാനത്തിനായി ഇവർക്ക് ചെന്നൈ സൂപ്പർ കിംഗ്സുമായി കടുത്ത പോരാട്ടം തന്നെ നടത്തേണ്ടി വരും.

കൊൽക്കത്ത നൈറ്റ് റൈഡേഴ്സ്

കെകെആറിന്റെ പ്ലേ ഓഫ് സാധ്യതകൾ ഇപ്പോൾ നൂൽപ്പാലത്തിലാണ്. നിലവിൽ 9 പോയിന്റുള്ള കൊൽക്കത്തയ്ക്ക് ശേഷിക്കുന്ന നാല് മത്സരങ്ങളും വിജയിച്ചാൽ മാത്രമേ അവർക്ക് 17 പോയിന്റിലെത്തി യോഗ്യത നേടാൻ കഴിയൂ. ഒരു മത്സരത്തിലെ പരാജയം പോലും കൊൽക്കത്തയെ ടൂർണമെന്റിൽ നിന്ന് പുറത്തേക്കുള്ള വഴി കാണിക്കും.

ഡൽഹി ക്യാപിറ്റൽസ്

പ്ലേയോഫ്‌ സാധ്യതയുള്ള ടീമുകളുടെ പട്ടികയിൽ ഏറ്റവും താഴെയുള്ള ഡൽഹി ക്യാപിറ്റൽസിന് 8 പോയിന്റാണുള്ളത്. ഇനി അത്ഭുതങ്ങൾ സംഭവിച്ചാൽ മാത്രമേ അവർക്ക് മുന്നേറാൻ കഴിയൂ. എല്ലാ മത്സരങ്ങളും വലിയ മാർജിനിൽ ജയിക്കുകയും മറ്റ് ടീമുകളുടെ ഫലങ്ങൾ അനുകൂലമാവുകയും ചെയ്താൽ മാത്രമേ ഇവർക്ക് നേരിയ സാധ്യതയെങ്കിലും ഉള്ളൂ. -1.154 എന്ന മോശം റൺറേറ്റ് ഇവർക്ക് വലിയ പ്രതിസന്ധിയാണ്.

മുംബൈ ഇന്ത്യൻസും ലഖ്‌നൗവും

ആർസിബി മുംബൈയെ തോൽപ്പിച്ചതോടെ മുംബൈ ഇന്ത്യൻസും ലഖ്‌നൗ സൂപ്പർ ജയന്റ്‌സും ഐപിഎൽ 2026 പ്ലേ ഓഫ് പോരാട്ടത്തിൽ നിന്ന് ഔദ്യോഗികമായി പുറത്തായി. ഇനി ഇവർ കളിക്കുന്ന മത്സരങ്ങൾ മറ്റ് ടീമുകളുടെ പ്ലേ ഓഫ് സാധ്യതകളെ ബാധിക്കുമെങ്കിലും ഇവർക്ക് സെമിയിൽ എത്താൻ സാധിക്കില്ല.