അഞ്ചാം ടെസ്റ്റിലും ഇന്ത്യയ്ക്ക് ടോസ് നഷ്ടം: ബുമ്രയും പന്തും പുറത്ത്

ഓവൽ: ഇംഗ്ലണ്ടിനെതിരായ അഞ്ചാം ക്രിക്കറ്റ് ടെസ്റ്റിലും ഇന്ത്യയ്ക്ക് ടോസ് നഷ്ടം. ടോസ് നേടിയ ഇം​ഗ്ലണ്ട് ഇന്ത്യയെ ബാറ്റിങ്ങിനയച്ചു. പരമ്പരയിൽ ഇംഗ്ലണ്ട് 2-1ന് മുന്നിലാണ്. ഇതോടെ ഇന്ത്യയ്‌ക്ക് മത്സരത്തിൽ വിജയം അനിവാര്യമാണ്. മറിച്ചായാൽ പരമ്പര നഷ്ടമാവും.

അതേസമയം, മാഞ്ചസ്​റ്റർ ടെസ്​റ്റിൽ പൊരുതി നേടിയ സമനില ഇന്ത്യൻ ടീമിന്റെ മനോഭാവം മാറ്റിയിട്ടുണ്ട്​. തുടർന്നുണ്ടായ വിവാദങ്ങളും കളിയുടെ അന്തരീക്ഷത്തെ ചൂടുപിടിപ്പിച്ചു. രണ്ട്​ കളി തോറ്റെങ്കിലും പ്രകടനത്തിൽ ഇന്ത്യക്ക്​ നിരാശപ്പെടാനില്ല. പതിനൊന്ന്​ സെഞ്ചുറികളാണ്​ ഇന്ത്യൻ ബാറ്റർമാരുടെ പേരിൽ. റണ്ണടിക്കാരിൽ ആദ്യ നാലു​പേരും ഇന്ത്യക്കാരാണ്​. ക്യാപ്​റ്റൻ ശുഭ്​മാൻ ഗിൽ മൂന്ന്​ സെഞ്ചുറികൾ ഉൾപ്പെടെ 722 റണ്ണുമായി മുന്നിലുണ്ട്​. മറുവശത്ത്​ ഇംഗ്ലീഷുകാർ ആകെ ഏഴ്​ സെഞ്ചുറികളാണ്​ നേടിയത്​.

മാറ്റങ്ങളോടെയാണ് ഇരുടീമുകളും അവസാന ടെസ്റ്റിനിറങ്ങുന്നത്. ജസ്പ്രീത് ബുമ്ര, ഋഷഭ് പന്ത്, ഷാർദൂൽ ഠാക്കൂർ എന്നിവർ പുറത്തായപ്പോൾ കരുൺ നായർ, പ്രസിദ്ധ് കൃഷ്ണ, ധ്രുവ് ജുറേൽ എന്നിവർ ടീമിൽ ഇടംപിടിച്ചു. തോളിന് പരിക്കേറ്റ ക്യാപ്റ്റൻ ബെൻ സ്റ്റോക്സ് ഇല്ലാതെയാണ് ഇം​ഗ്ലണ്ട് ഇറങ്ങുന്നത്.