ഗ്ലെൻ ഫിലിപ്‌സ് നിറഞ്ഞാടി; ഇന്ത്യക്കെതിരെ കിവീസിന് മികച്ച സ്കോർ

ക്രൈസ്‌റ്റ്‌ചർച്ച്‌: അർധസെഞ്ചുറിയുമായി ഗ്ലെൻ ഫിലിപ്‌സ് (82) നിറഞ്ഞാടിയപ്പോൾ ഇന്ത്യക്കെതിരായ ആദ്യ ട്വന്റി20 മത്സരത്തിൽ കൂറ്റൻ വിജയലക്ഷ്യം കുറിച്ച് ന്യ‍ൂസിലൻഡ്‌. ടോസ് നഷ്ടപ്പെട്ട് ആദ്യം ബാറ്റ് ചെയ്ത കിവീസ് നിശ്ചിത ഓവറിൽ നാല് വിക്കറ്റ് നഷ്ടത്തിൽ 225 റൺസാണ് എടുത്തത്.

ഒപ്പണർ ടിം സെയ്‌ഫെർടും (24) ഫിൻ അല്ലെനും (45) ചേർന്ന് മികച്ച തുടക്കമാണ് ന്യൂസിലൻഡിന് നൽകിയത്. ടിം സെയ്‌ഫെർട് പുറത്തായതിന് പിന്നാലെയെത്തിയ ഡാരിൽ മിച്ചെൽ (28) വേ​ഗം മടങ്ങി. തുടർന്ന് കളത്തിലെത്തിയ ഗ്ലെൻ ഫിലിപ്‌സ് ടീമിനെ മുന്നോട്ട് നയിക്കുകയായിരുന്നു. 40 പന്തിൽ എട്ട് ഫോറും മൂന്ന് സിക്സുമാണ് താരം നേടിയത്.

ഇന്ത്യക്കായി അർഷ്‌ദീപ്‌ സിങ്‌, അക്‌സർ പട്ടേൽ, മായങ്ക് യാദവ് എന്നിവർ ഒരോ വിക്കറ്റ് നേടി. നാല്‌ വർഷത്തെ ഇടവേളയ്‌ക്കുശേഷം കളത്തിലെത്തിയ പേസർ ഭുവനേശ്വർ കുമാരിന് വിക്കറ്റ് നേടാൻ കഴിഞ്ഞില്ല.

ലോകകപ്പ്‌ ഫൈനലിനുശേഷം ആദ്യമായാണ്‌ ഇന്ത്യയും ന്യൂസിലൻഡും മുഖാമുഖമെത്തുന്നത്‌. അഹമ്മദാബാദിൽ നടന്ന ഫൈനലിൽ 96 റൺസിനാണ് ഇന്ത്യ ജേതാക്കളായത്.