സിൽഹെറ്റിൽ റൺമല തീർത്ത് ബംഗ്ലാദേശ്; പാകിസ്ഥാന് ജയിക്കാൻ 437 റൺസ്

സിൽഹെറ്റ്: പാകിസ്ഥാനെതിരായ ഒന്നാം ടെസ്റ്റ് മത്സരത്തിന്റെ മൂന്നാം ദിനത്തിൽ മുൻ നായകൻ മുഷ്ഫിഖുർ റഹീമിന്റെ തകർപ്പൻ സെഞ്ച്വറിയുടെ പിൻബലത്തിൽ ബംഗ്ലാദേശിന് വൻ മേധാവിത്വം.

സിൽഹെറ്റ് അന്താരാഷ്ട്ര ക്രിക്കറ്റ് സ്റ്റേഡിയത്തിൽ നടക്കുന്ന മത്സരത്തിൽ മുഷ്ഫിഖുറിന്റെ 14-ാം ടെസ്റ്റ് സെഞ്ച്വറിയും ലിറ്റൺ ദാസ്, മഹ്മൂദുൽ ഹസൻ ജോയ് എന്നിവരുടെ അർദ്ധ സെഞ്ച്വറികളും തുണയായതോടെ രണ്ടാം ഇന്നിങ്സിൽ ബംഗ്ലാദേശ് പാകിസ്ഥാന് മുന്നിൽ 437 റൺസിന്റെ കൂറ്റൻ വിജയലക്ഷ്യമാണ് ഉയർത്തിയത്.

കൂറ്റൻ ലക്ഷ്യം പിന്തുടർന്ന് മറുപടി ബാറ്റിങ്ങിനിറങ്ങിയ പാകിസ്ഥാൻ മൂന്നാം ദിനം കളി നിർത്തുമ്പോൾ രണ്ട് ഓവറിൽ വിക്കറ്റൊന്നും നഷ്ടപ്പെടാതെ റണ്ണൊന്നുമെടുക്കാത്ത നിലയിലാണ്. മോശം വെളിച്ചം കാരണം മൂന്നാം ദിനത്തിലെ കളി അമ്പയർമാർ നേരത്തെ അവസാനിപ്പിക്കുകയായിരുന്നു.

മത്സരത്തിൽ വ്യക്തമായ ലീഡ് ഉറപ്പാക്കാൻ മികച്ചൊരു ബാറ്റിങ് പ്രകടനം അത്യാവശ്യമായിരുന്ന നിർണ്ണായക ഘട്ടത്തിലാണ് മുഷ്ഫിഖുർ റഹീം ബംഗ്ലാദേശിന്റെ രക്ഷകനായത്. 233 പന്തുകൾ നേരിട്ട് 12 ഫോറുകളും ഒരു സിക്സറുമടക്കം അത്യുജ്വല ഇന്നിങ്സ് കാഴ്ചവെച്ച മുഷ്ഫിഖുർ, അഞ്ചാം വിക്കറ്റിൽ ലിറ്റൺ ദാസിനൊപ്പം 123 റൺസിന്റെയും ഏഴാം വിക്കറ്റിൽ തൈജുൽ ഇസ്ലാമിനൊപ്പം 77 റൺസിന്റെയും സുപ്രധാന കൂട്ടുകെട്ടുകൾ പടുത്തുയർത്തി.

കരിയറിൽ ഒരു ടെസ്റ്റിന്റെ രണ്ടാം ഇന്നിങ്സിൽ മുഷ്ഫിഖുർ നേടുന്ന മൂന്നാമത്തെ സെഞ്ച്വറിയാണിത്. മൂന്നാം ദിനം കളി അവസാനിക്കാൻ 35 മിനിറ്റോളം ബാക്കിനിൽക്കെ 103-ാം ഓവറിൽ ബംഗ്ലാദേശിന്റെ അവസാന വിക്കറ്റായാണ് താരം പുറത്തായത്.

തുടക്കത്തിൽ ബംഗ്ലാദേശ് നായകൻ നജ്മുൽ ഹുസൈൻ ഷാന്റോയെ (15) പുറത്താക്കി പാക് പേസർ ഖുറം ഷഹ്സാദ് ഭീഷണി ഉയർത്തിയെങ്കിലും ഒന്നാം ഇന്നിങ്സിലെ സെഞ്ച്വറി തിളക്കവുമായി എത്തിയ ലിറ്റൺ ദാസ് ഇത്തവണയും മികച്ച ഫോമിലായിരുന്നു.

റണ്ണൗട്ട് ചാൻസിൽ രക്ഷപ്പെട്ട ലിറ്റൺ 92 പന്തിൽ 69 റൺസ് നേടി. ഈ പ്രകടനത്തോടെ ഒരു ടെസ്റ്റ് മത്സരത്തിൽ സെഞ്ച്വറിയും അർദ്ധ സെഞ്ച്വറിയും മൂന്ന് തവണ നേടുന്ന ആദ്യ ബംഗ്ലാദേശ് വിക്കറ്റ് കീപ്പർ ബാറ്ററെന്ന റെക്കോർഡും ലിറ്റൺ സ്വന്തമാക്കി.

മറുപടി ബാറ്റിങ്ങിനിറങ്ങിയ പാക് ഓപ്പണർമാരായ അബ്ദുള്ള ഫസലിനും അസാൻ അവൈസിനും രണ്ട് ഓവർ മാത്രമാണ് ക്രീസിൽ നേരിടേണ്ടി വന്നത്. തങ്ങളുടെ ഓവറുകളിൽ തസ്കിൻ അഹമ്മദും ഷൊരീഫുൽ ഇസ്ലാമും പാക് ഓപ്പണർമാരെ കടുത്ത രീതിയിൽ പരീക്ഷിച്ചെങ്കിലും വിക്കറ്റ് നഷ്ടമില്ലാതെ പാകിസ്ഥാൻ മൂന്നാം ദിവസത്തെ കളി അതിജീവിച്ചു.

രണ്ട് ദിവസത്തെ കളി ബാക്കിനിൽക്കെ കൈവശമുള്ള 10 വിക്കറ്റുകൾ ഉപയോഗിച്ച് 437 റൺസ് എടുക്കുക എന്ന അസാധ്യ ലക്ഷ്യമാണ് പാകിസ്ഥാന് മുന്നിലുള്ളത്. അതേസമയം വരും ദിവസങ്ങളിൽ പാക് നിരയെ കശക്കിയെറിഞ്ഞ് ചരിത്ര വിജയം നേടാമെന്ന പ്രതീക്ഷയിലാണ് ബംഗ്ലാദേശ്.