ഷെയ്ൻ വോൺ നൽകിയ 'റോക്ക്സ്റ്റാർ' പട്ടം ഇനി വൈഭവിന്; സൂര്യവംശിയെ വാനോളം പുകഴ്ത്തി രവീന്ദ്ര ജഡേജ

ജയ്‌പൂർ: ഇതിഹാസ താരം ഷെയ്ൻ വോൺ തനിക്ക് നൽകിയ 'റോക്ക്സ്റ്റാർ' എന്ന വിളിപ്പേര് വർഷങ്ങൾക്കിപ്പുറം മറ്റൊരു യുവപ്രതിഭയ്ക്ക് കൈമാറി ഇന്ത്യൻ ഓൾറൗണ്ടർ രവീന്ദ്ര ജഡേജ.

രാജസ്ഥാൻ റോയൽസിന്റെ വിസ്മയ താരം വൈഭവ് സൂര്യവംശിയെയാണ് തന്റെ പിൻഗാമിയായി ജഡേജ വിശേഷിപ്പിച്ചത്. വൈഭവിന്റെ ബാറ്റിംഗ് മികവും മൈതാനത്തെ പക്വതയുമാണ് തന്നെ ഏറെ ആകർഷിച്ചതെന്ന് ജഡേജ വ്യക്തമാക്കി.

2008-ലെ ആദ്യ ഐപിഎൽ സീസണിൽ രാജസ്ഥാൻ റോയൽസിനായി കളിക്കുമ്പോഴാണ് വോൺ ജഡേജയെ ആദ്യമായി 'റോക്ക്സ്റ്റാർ' എന്ന് വിളിച്ചത്.

പ്രമുഖ താരങ്ങൾ നിറഞ്ഞ ടീമിൽ വോൺ തനിക്ക് നൽകിയ ആത്മവിശ്വാസമാണ് തന്റെ കരിയർ മാറ്റിമറിച്ചതെന്ന് ജഡേജ പലപ്പോഴും പറഞ്ഞിട്ടുണ്ട്. ഇപ്പോൾ അതേ പാതയിൽ വൈഭവ് സൂര്യവംശിയെ പിന്തുണച്ചുകൊണ്ട് രംഗത്തെത്തിയിരിക്കുകയാണ് താരം.

ടീമിലെ മറ്റ് യുവതാരങ്ങളിൽ നിന്ന് വൈഭവിനെ വ്യത്യസ്തനാക്കുന്നത് അദ്ദേഹത്തിന്റെ മനക്കരുത്താണെന്ന് ജഡേജ നിരീക്ഷിച്ചു. മികച്ച ബൗളർമാരെ നേരിടുമ്പോൾ വൈഭവ് പുലർത്തുന്ന ശാന്തതയും കൃത്യമായ പ്ലാനിംഗും അത്ഭുതപ്പെടുത്തുന്നതാണെന്ന് അദ്ദേഹം പറഞ്ഞു.

ഒരു സാഹചര്യത്തിലും വൈഭവ് സമ്മർദ്ദത്തിലാകുന്നത് കണ്ടിട്ടില്ലെന്നും, സ്വന്തം ഷോട്ടുകളിൽ പൂർണ്ണ ആത്മവിശ്വാസമുള്ള ഈ പതിനഞ്ചുകാരൻ തന്നെയാണ് ടീമിലെ യഥാർത്ഥ റോക്ക്സ്റ്റാർ എന്നും ജഡേജ കൂട്ടിച്ചേർത്തു.

ഷെയ്ൻ വോൺ ജഡേജയ്ക്ക് നൽകിയ അതേ അംഗീകാരം ഇപ്പോൾ ജഡേജ വൈഭവിന് നൽകുന്നത് ഇന്ത്യൻ ക്രിക്കറ്റിലെ ഒരു തലമുറ മാറ്റമായാണ് വിലയിരുത്തപ്പെടുന്നത്. കേവലം ഒരു പ്രശംസ എന്നതിലുപരി, വോൺ തുടങ്ങിവെച്ച ആ പാരമ്പര്യം വരുംതലമുറയിലേക്ക് കൈമാറുന്ന വേദി കൂടിയായി ജഡേജയുടെ വാക്കുകൾ മാറി.

ബാറ്റിംഗ് വിസ്മയം സൂര്യവംശിയെക്കുറിച്ചുള്ള ജഡേജയുടെ ഈ പരാമർശം ക്രിക്കറ്റ് ആരാധകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്.