56 മിനിറ്റ്, 53 പന്തുകൾ ഓവൽ ത്രില്ലർ

ഓവൽ: മങ്ങിയ ആകാശം. മേഘങ്ങൾ പെയ്യാനായി കാത്തുനിൽക്കുന്നപോലെ. ഓവലിൽ തണുത്ത കാറ്റ്​ വീശി. കാണികൾ നിറഞ്ഞു. കളിക്കാർ നിരന്നു. വലിയ സ്​ക്രീനിൽ തെളിഞ്ഞു ‘ഇംഗ്ലണ്ടിന്​ ജയിക്കാൻ ​35 റൺ,​ ഇന്ത്യക്ക് നാല്​ വിക്കറ്റ്​​’. ഓരോ പന്തിലും ആകാംക്ഷ. ഓരോ റണ്ണിനും നെഞ്ചിടിപ്പ്​. 56 മിനിറ്റ്​. 53 പന്തുകൾ. ഉദ്വേഗ നിമിഷങ്ങൾ​. പ്രായശ്​ചിത്തമെന്നോ വീണ്ടെടുപ്പെന്നോ പറയാനാകാത്ത മുഹമ്മദ്​ സിറാജിന്റെ അക്ഷീണമായ പ്രയത്​നമായിരുന്നു അതിൽ ഒന്നാമത്​. പിന്നെ ഒറ്റക്കൈയിൽ ബാറ്റുമായി ഇറങ്ങിയ ക്രിസ്​ വോക്​സിന്റെ പോരാട്ടവീര്യവും.

ഒടുവിൽ ആറ്​ റണ്ണിന്റെ അതിമനോഹര ജയം ഇന്ത്യ കുറിച്ചു. 374 റൺ ലക്ഷ്യവുമായി ഇറങ്ങിയ ഇംഗ്ലണ്ടിന്​ അവസാനദിനം നാല്​ വിക്കറ്റ്​ ശേഷിക്കെ വേണ്ടത്​ 35 റൺ​. സിറാജിന്റെ അഞ്ച്​ വിക്കറ്റ്​ പ്രകടനത്തിൽ ആതിഥേയർ തകർന്നു. നാലെണ്ണവുമായി പ്രസിദ്ധ്​ കൃഷ്​ണയും തിളങ്ങി. അഞ്ചാംദിനം 8.5 ഓവറിൽ ഇംഗ്ലണ്ടിന്റെ ശേഷിച്ച വിക്കറ്റുകൾ നഷ്ടമായി. സ്​കോർ: ഇന്ത്യ 224, 396; ഇംഗ്ലണ്ട്​ 247, 367. ജയത്തോടെ ടെൻഡുൽക്കർ–ആൻഡേഴ്​സൺ ട്രോഫി ഇരു ടീമുകളും പങ്കിട്ടു. 2–2നാണ്​ പരമ്പര അവസാനിച്ചത്​.

ഒരിക്കലും പ്രതീക്ഷിച്ചതല്ല ഇംഗ്ലണ്ട്​ ഇതുപോലൊരു ആന്റി ക്ലൈമാക്​സ്​. സെഞ്ചുറികളുമായി ഹാരി ബ്രൂ‍ക്കും ജോ റ‍ൂട്ടും കളംവാണപ്പോൾ നാലാംദിനംതന്നെ അനായാസ ജയം​ കണക്കുകൂട്ടി​. മൂന്നിന്​ 301 റണ്ണെന്ന നിലയിലായിരുന്നു ആതിഥേയർ. ഏഴ്​ വിക്കറ്റ്​ കൈയിലിരിക്കെ 73 റൺമാത്രം പിന്നിൽ. ചായക്ക്​ പിരിഞ്ഞ്​ തിരിച്ചെത്തിയ ഇന്ത്യൻ പേസർമാർ ഭാവം മാറിയാണെത്തിയത്​. അപ്പോഴേക്കും മഴ പെയ്​തതിനാൽ കളി അവസാനിപ്പിച്ചു. ​

ജാമി സ്​മിത്തും ജാമി ഒവർട്ടണും വിജയപ്രതീക്ഷയുമായാണ്​ ക്രീസിലെത്തിയത്​. പ്രസിദ്ധ്​ തലേദിനത്തെ ഓവർ പൂർത്തിയാക്കാൻ തയ്യാറെടുത്തു. ആദ്യപന്ത്​ ഒവർട്ടൺ ബ‍ൗണ്ടറി പായിച്ചു. അടുത്ത പന്തും -േഫാറായി. ലക്ഷ്യം 27 റണ്ണായി ചുരുങ്ങി. അടുത്ത ഓവർ സിറാജിന്റേത്​. ആദ്യ രണ്ട്​ പന്തും സ്​മിത്തിന്റെ (2) ബാറ്റിനരികെ മൂളിപ്പറന്നു. മൂന്നാമത്തേത്​ ബാറ്റിൽതട്ടി വിക്കറ്റ്​ കീപ്പർ ധ്രുവ്​ ജുറെലിന്റെ കൈകളിൽ. ഇന്ത്യ ജയം മണത്തു. അടുത്ത പന്തിൽ ഗസ്​ അറ്റ്​കിൻസൺ നൽകിയ അവസരം കെ എൽ രാഹുലിന്​ കൈയിലൊതുക്കാനായില്ല. അവസാന പന്തിൽ രണ്ട്​ റൺ കൂടി. ലക്ഷ്യം 25.

അറ്റ്​കിൻസൺ പതുക്കെ താളംകണ്ടെത്തി. പ്രസിദ്ധിന്റെ ഓവറിൽ നാല്​ റൺകൂടി കിട്ടി. ഇംഗ്ലണ്ട്​ അടുത്തു. സിറാജ്​ ഓരോ പന്തിലും അപകടം വിതച്ചു. ഒവർട്ടണെ (9) വിക്കറ്റിനുമുന്നിൽ കുരുക്കി ഗർജിച്ചു. സമവാക്യം 20 റണ്ണും രണ്ട്​ വിക്കറ്റുമായി. രണ്ടോവർ അറ്റ്​കിൻസണൊപ്പം ജോഷ്​ ടങ്​ അതിജീവിച്ചു. പ്രസിദ്ധിന്റെ അടുത്ത ഓവറിന്റെ അവസാന പന്തിൽ ടങ്ങിന്റെ (0) വിക്കറ്റ് തെറിച്ചു.

ഒറ്റക്കൈയിൽ ബാറ്റുമായി വോക്​സ്​ എത്തി. സിറാജിന്റെ അടുത്ത ഓവറിന്റെ ആദ്യ പന്ത്​ സിക്​സർ പറത്തി അറ്റ്​കിൻസൺ ഭയപ്പെടുത്തി. ആ പന്ത്​ വരയ്​ക്കരികെ​ ആകാശ്​ ദീപിന്റെ കൈയിലൂടെ ഉ‍ൗർന്നുപോകുകയായിരുന്നു. ലക്ഷ്യം 11 റണ്ണായി കുറഞ്ഞു. ഓവറിലെ അവസാന പന്തിൽ ഒരു ബൈ കിട്ടി. അടുത്ത ഓവറിൽ മൂന്ന്​. സിറാജ്​ വീണ്ടും പന്തെറിയാനെത്തുമ്പോൾ ഏഴ്​ റണ്ണ്​ അരികെയായിരുന്നു ഇംഗ്ലണ്ട്. പക്ഷേ, സിറാജിന്റെ യോർക്കർ അറ്റ്​കിൻസനെ തീർത്തു. ഇന്ത്യ ആർത്തു.