ഗംഭീറിന്റെ ശുപാർശ; ഇന്ത്യയുടെ സ്പിൻ ബൗളിങ് കോച്ചായി സായ്‌രാജ് ബഹുതുലെ എത്തിയേക്കും

മുംബൈ: ഇന്ത്യൻ ക്രിക്കറ്റ് ടീമിന്റെ സ്പിൻ ബോളിംഗ് പരിശീലകനായി മുൻ താരം സായ്‌രാജ് ബഹുതുലെ എത്തിയേക്കും. നിലവിൽ ഐപിഎല്ലിൽ പഞ്ചാബ് കിങ്‌സിന്റെ സപ്പോർട്ട് സ്റ്റാഫിലുള്ള ബഹുതുലെ, സീസൺ അവസാനിക്കുന്നതോടെ ഫ്രാഞ്ചൈസിയുമായുള്ള കരാർ അവസാനിപ്പിക്കും എന്നാണ് സൂചന.

ഹെഡ് കോച്ച് ഗൗതം ഗംഭീർ, ബിസിസിഐ ഉന്നത ഉദ്യോഗസ്ഥർ എന്നിവരുമായി അദ്ദേഹം പ്രാഥമിക ചർച്ചകൾ പൂർത്തിയാക്കിയതായാണ് വിവരം.

ഇന്ത്യക്കായി രണ്ട് ടെസ്റ്റുകളും എട്ട് ഏകദിനങ്ങളും കളിച്ചിട്ടുള്ള ബഹുതുലെയുടെ പരിശീലന മികവിലുള്ള വിശ്വാസമാണ് ഗംഭീറിനെ ഇത്തരമൊരു ശുപാർശയിലേക്ക് നയിച്ചതെന്ന് ബിസിസിഐ വൃത്തങ്ങൾ സൂചിപ്പിക്കുന്നു.

നിലവിൽ ഇന്ത്യൻ ടീമിൽ ബാറ്റിംഗ്, ഫാസ്റ്റ് ബോളിംഗ്, ഫീൽഡിംഗ് മേഖലകളിൽ പ്രത്യേക പരിശീലകരുണ്ടെങ്കിലും സ്പിൻ ബോളിംഗിനായി മാത്രം സ്ഥാനമില്ല. ഈ വിടവ് നികത്താനാണ് 53-കാരനായ ബഹുതുലെയെ ഗംഭീർ നിർദ്ദേശിച്ചിരിക്കുന്നത്.

നാഷണൽ ക്രിക്കറ്റ് അക്കാദമിയിൽ (എൻസിഎ) വിവിഎസ് ലക്ഷ്മണിന് കീഴിൽ പ്രവർത്തിച്ചിട്ടുള്ള ബഹുതുലെക്ക് നേരത്തെയും ഇന്ത്യൻ സീനിയർ ടീമിനൊപ്പം പ്രവർത്തിച്ച പരിചയമുണ്ട്.

2023-ലെ ബോർഡർ-ഗവാസ്‌കർ ട്രോഫി സമയത്ത് അന്നത്തെ പരിശീലകൻ രാഹുൽ ദ്രാവിഡിന്റെ പ്രത്യേക താല്പര്യപ്രകാരം അദ്ദേഹം ടീമിനൊപ്പം ചേർന്നിരുന്നു. ദ്രാവിഡിന് കീഴിൽ ശ്രീലങ്കൻ പര്യടനത്തിലും ബഹുതുലെ സപ്പോർട്ട് സ്റ്റാഫിന്റെ ഭാഗമായിരുന്നു.

പഞ്ചാബ് കിങ്‌സുമായുള്ള കരാർ കാലാവധി സംബന്ധിച്ച തീരുമാനങ്ങൾക്ക് ശേഷം അദ്ദേഹം ഔദ്യോഗികമായി ഇന്ത്യൻ ടീമിനൊപ്പം ചേരും. റിക്കി പോണ്ടിംഗിന് കീഴിൽ ഈ സീസണിലാണ് ബഹുതുലെ പഞ്ചാബ് ടീമിലെത്തിയത്.

മുൻപ് രാജസ്ഥാൻ റോയൽസിനൊപ്പവും അദ്ദേഹം പ്രവർത്തിച്ചിട്ടുണ്ട്. ഇന്ത്യൻ ടീമിനെ പരിശീലിപ്പിക്കാനുള്ള സുവർണ്ണാവസരമായതിനാൽ പഞ്ചാബ് കിങ്‌സ് മാനേജ്‌മെന്റ് ബഹുതുലെയെ റിലീസ് ചെയ്യാനാണ് സാധ്യത. ഇതിനെക്കുറിച്ചുള്ള ഔദ്യോഗിക പ്രതികരണങ്ങൾക്കായി ക്രിക്കറ്റ് വൃത്തങ്ങൾ കാത്തിരിക്കുകയാണ്.