കേടായ നോട്ടുകൾ മാറ്റൽ; നടപടികൾ വ്യക്തമാക്കി ഒമാൻ സെൻട്രൽ ബാങ്ക്

മസ്‌കത്ത്‌ : കേടായ നോട്ടുകൾ മാറ്റിനൽകാനുള്ള നടപടിക്രമങ്ങൾ വ്യക്തമാക്കി ഒമാൻ സെൻട്രൽ ബാങ്ക്. കീറിയതും കത്തിയതും കേടുവന്നതുമായ കറൻസികൾ പൊതുജനങ്ങളിൽനിന്ന് പ്രത്യേക വ്യവസ്ഥകൾക്ക്‌ വിധേയമായി സ്വീകരിക്കും. അപേക്ഷകർ ആവശ്യമായ മാനദണ്ഡങ്ങൾ പാലിക്കുകയും രേഖകൾ സമർപ്പിക്കുകയും ചെയ്യണം. കേടുവന്ന നോട്ടുകൾക്കുപകരം പ്രചാരത്തിന് അനുയോജ്യമായ കറൻസി നൽകുമെന്നും ബാങ്ക് പ്രസ്താവനയിൽ വ്യക്തമാക്കി.

കത്തിയ നോട്ടുകൾക്ക്, തീപിടിത്തം സ്ഥിരീകരിച്ച് റോയൽ ഒമാൻ പൊലീസോ ബന്ധപ്പെട്ട വാലിയോ നൽകിയ ഒറിജിനൽ റിപ്പോർട്ടും സാധുവായ ദേശീയ ഐഡി കാർഡോ റസിഡന്റ് കാർഡോ ഹാജരാക്കണം. കേടായ നോട്ടുകളും നേരിട്ട് ഹാജരാക്കണം. കീറിയ നോട്ടുകളുടെ കാര്യത്തിൽ, കുറഞ്ഞത് പൂർണ സീരിയൽ നമ്പറും വ്യക്തമായ ഒപ്പും ഉൾപ്പെടെ പകുതിയിലധികം നോട്ടുകളും കേടുകൂടാതെയിരിക്കണമെന്ന് സെൻട്രൽ ബാങ്ക് അറിയിച്ചു.

കേടുവന്ന കറൻസി ഈ വ്യവസ്ഥകൾ പാലിക്കാത്ത സാഹചര്യങ്ങളിൽ, വ്യക്തിയുടെ സാഹചര്യങ്ങൾ വിശദീകരിച്ച് കൈമാറ്റം അഭ്യർത്ഥിക്കുന്ന സാമൂഹിക വികസന മന്ത്രാലയത്തിൽനിന്നോ വാലിയിൽനിന്നോ ഔദ്യോഗിക കത്ത് പിന്തുണയ്ക്കുന്നുണ്ടെങ്കിൽ ഒഴിവാക്കലുകൾ പരിഗണിക്കാമെന്നും ബാങ്ക് കൂട്ടിച്ചേർത്തു.