ജിദ്ദയിൽ പുതിയ ഹൈപ്പർമാർക്കറ്റ് തുറന്ന് ലുലു

ജിദ്ദ : സൗദി അറേബ്യയിൽ 72–ാമത്‌ ഹൈപ്പർമാർക്കറ്റ് തുറന്ന് ലുലു. ജിദ്ദ സെനോമി അസീസ് മാളിലാണ്‌ ജിസിസിയിലെ 267–ാമത്തെ സ്റ്റോർ തുറന്നത്. ജിദ്ദ കൊമേഴ്സ് ചേന്പർ പ്രസിഡന്റും ബോർഡ് ചെയർമാനുമായ മുഹമ്മദ് യൂസഫ് നാഖി ഉദ്‌ഘാടനം ചെയ്‌തു. ലുലു ​ഗ്രൂപ്പ് ചെയർമാൻ എം എ യൂസഫലി, ജിദ്ദയിലെ യുഎഇ സ്ഥാനപതി ജനറൽ നാസർ ഹുവൈദൻ തായ്ബാൻ അലി അൽ കെത്ബി, ഇന്ത്യൻ സ്ഥാനപതി ഫഹദ് അഹമ്മദ് ഖാൻ സുരി, ഫിലിപീൻസ് സ്ഥാനപതി റോമെൽ എ റൊമാറ്റോ എന്നിവർ പങ്കെടുത്തു.

10,157 ചതുരശ്ര മീറ്ററിലുള്ള ഹൈപ്പർമാർക്കറ്റിൽ ​പഴം, പച്ചക്കറി, പലചരക്ക്, ബേക്കറി, മത്സ്യം, മാംസം, വീട്ടുപകരണങ്ങൾ, ഇലക്‌ട്രോണിക്‌സ്‌, സ‍ൗന്ദര്യ വർധക ഉൽപ്പന്നങ്ങൾ തുടങ്ങിയവയുടെ വിപുലമായ ശേഖരമുണ്ട്‌. ഷോപ്പിങ് സു​ഗമമാക്കാൻ സെൽഫ് ചെക്ക് ഔട്ട് കൗണ്ടറും മികച്ച പാർക്കിങ്ങും സൗകര്യവും ലഭ്യമാണ്‌. വിപുലമായ വികസന പദ്ധതികളാണ് സൗദിയിൽ ലുലു നടപ്പാക്കുന്നതെന്ന്‌ എം എ യൂസഫലി പറഞ്ഞു. 15ൽ അധികം റീട്ടെയ്ൽ സ്റ്റോർ സൗദിയിൽ ഉടൻ തുറക്കും. 2030ന്‌ മുന്പ്‌ 100 സ്റ്റോർ എന്നതാണ്‌ ലക്ഷ്യമെന്നും അദ്ദേഹം വ്യക്തമാക്കി. ലുലു എക്സിക്യൂട്ടീവ് ഡയറക്‌ടർ എം എ അഷറഫ് അലി, സൗദി ഡയറക്‌ടർ മുഹമ്മദ് ഹാരിസ് തുടങ്ങിയവരും ചടങ്ങിൽ പങ്കെടുത്തു.