മസ്‌കത്ത്‌ ഇന്റർനാഷണൽ എയർപോർട്ടിൽ സൗജന്യ കാര്‍ട്ട് സർവീസ് ആരംഭിച്ചു

മസ്‌കത്ത്‌ : മസ്‌കത്ത്‌ എയർപോർട്ടിലെ പാസഞ്ചർ ടെർമിനൽ, ഓഫീസുകൾ, പൊതു പാർക്കിംഗ് സ്ഥലങ്ങൾ എന്നിവയ്ക്കിടയിൽ ദൈനംദിന യാത്ര സുഗമമാക്കുന്നതിനായി ഒമാൻ എയർപോർട്ട്സ് മസ്‌കറ്റ് ഇന്റർനാഷണൽ എയർപോർട്ടിൽ ഇലക്ട്രിക് കാർട്ട്/ ഷട്ടിൽ സർവീസ് ആരംഭിച്ചു. യോഗ്യതയുള്ളതും പരിശീലനം ലഭിച്ചതുമായ ക്രൂ ആയിരിക്കും ഷട്ടിൽ പ്രവർത്തിപ്പിക്കുക. നിയുക്ത പാർക്കിംഗ് സ്ഥലങ്ങളിലേക്കും ടെർമിനൽ കെട്ടിടത്തിലേക്കും എയർപോർട്ടിൽ പ്രവർത്തിക്കുന്ന ഓഫീസുകളിലേക്കും എളുപ്പത്തിൽ എത്താൻ ഷട്ടിൽ സർവീസുകൾ സഹായിക്കും.

എയർപോർട്ടിലെ കാർ പാർക്കിങ്ങുകളിൽ കാറുകൾ പാർക്ക് ചെയ്യുന്ന എല്ലാ യാത്രക്കാർക്കും ജീവനക്കാർക്കും ഈ സേവനം സൗജന്യമാണ്. കൂടാതെ മുൻകൂർ റിസർവേഷൻ ആവശ്യമില്ലാതെ പീക്ക് പീരിയഡുകളും രാത്രി സമയങ്ങളും ഉൾപ്പെടെ എല്ലാ സമയത്തും ലഭ്യമാണ്. യാത്രക്കാരുടെയും ജീവനക്കാരുടെയും സുഖസൗകര്യങ്ങളും മൊബിലിറ്റിയും വർദ്ധിപ്പിക്കാനും പാർക്കിംഗ് സ്ഥലങ്ങളിൽ നിന്ന് വിവിധ വിമാനത്താവള സൗകര്യങ്ങളിലേക്ക് കാൽനടയായി ഉപയോക്താക്കൾ സഞ്ചരിക്കുന്ന ദൂരം കുറയ്ക്കാനുമായി ഒമാൻ എയർപോർട്ട്സ് ലക്ഷ്യമിടുന്ന പദ്ധതിയാണിത്. കാർബൺ ബഹിർഗമനം കുറയ്ക്കുന്നതിന് സഹായിക്കുന്ന പരിസ്ഥിതി സൗഹൃദ ഗതാഗത രീതികൾ ഉപയോഗിക്കുന്നതിലൂടെ സുസ്ഥിരതാ സംരംഭങ്ങളെ പിന്തുണയ്ക്കുന്നതിനുള്ള ഒമാൻ വിമാനത്താവളങ്ങളുടെ പ്രതിബദ്ധതയും സേവനം പ്രതിഫലിപ്പിക്കുന്നുവെന്ന് അധികൃതർ വ്യക്തമാക്കി.