‘സലാമ’ എഐ പ്ലാറ്റ്‌ഫോമുമായി ദുബായ്; ഇനി വിസ നടപടി അതിവേഗം

ദുബായ്: പ്രവാസികൾക്കുള്ള വിസ സേവനങ്ങൾക്കായി ‘സലാമ' എന്ന പേരിൽ പുതിയ നിർമിത ബുദ്ധി (എഐ) പ്ലാറ്റ്ഫോമുമായി ദുബായ്‌. ജനറൽ ഡയറക്‌ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സിന്റെ (ജിഡിആർഎഫ്എ) പുതിയ സംരംഭത്തിലൂടെ ദുബായിലെ പ്രവാസികൾക്ക് ഇനി നിമിഷങ്ങൾക്കുള്ളിൽ വിസ പുതുക്കാനും റദ്ദാക്കാനും സാധിക്കും. സർക്കാർ സേവനങ്ങളുടെ കാര്യക്ഷമത വർധിപ്പിക്കുകയെന്ന ലക്ഷ്യത്തോടെയാണ് പുതിയ പ്ലാറ്റ്‌ഫോം രൂപകൽപ്പന ചെയ്തിരിക്കുന്നത്. വാർഷിക മീഡിയ കൗൺസിലിന്റെ നാലാം പതിപ്പിൽ ജിഡിആർഎഫ്എ ദുബായ് ഡയറക്‌ടർ ജനറൽ മുഹമ്മദ് അഹമ്മദ് അൽ മർറി ഇതുമായി ബന്ധപ്പെട്ട പ്രഖ്യാപനം നടത്തി.

എമിറേറ്റിലെ റെസിഡൻസി സേവനങ്ങൾ ലളിതമാക്കുകയെന്ന ലക്ഷ്യത്തോടെ രൂപകൽപ്പന ചെയ്തതാണ് സലാമ പ്ലാറ്റ്‌ഫോം. ഉപയോക്താക്കൾക്ക് പരമ്പരാഗത ഫോമുകളുടെയോ പേപ്പർ വർക്കുകളുടെയോ ആവശ്യമില്ലാതെ ഇടപാടുകൾ പൂർത്തിയാക്കാനും പണമിടപാട്‌ നടത്താനും മറ്റ് റെസിഡൻസി സംബന്ധിയായ പ്രവർത്തനങ്ങൾ നടത്താനും കഴിയും. ദുബായിലെ ജീവിത നിലവാരം മെച്ചപ്പെടുത്തുന്നതിന് പുത്തൻ സാങ്കേതികവിദ്യകൾ പ്രയോജനപ്പെടുത്തുന്നതിനുള്ള ജിഡിആർഎഫ്എയുടെ ശ്രമങ്ങളുടെ ഭാഗമാണ് പ്ലാറ്റ്‌ഫോം എന്ന്‌ ജിഡിആർഎഫ്എ ദുബായ് ഡയറക്‌ടർ പറഞ്ഞു.

ഉപയോക്താക്കളുടെ റെസിഡൻസി പെർമിറ്റുകൾ പ്ലാറ്റ്‌ഫോം വഴി പുതുക്കാനും റദ്ദാക്കാനും വിസ സേവനങ്ങളുമായി ബന്ധപ്പെട്ട അന്വേഷണങ്ങൾ നടത്താനും നിമിഷനേരംകൊണ്ട് സാധിക്കും. വിവിധ നടപടിക്രമങ്ങൾ പാലിക്കുകയോ സേവന കേന്ദ്രങ്ങൾ സന്ദർശിക്കുകയോ ചെയ്യാതെതന്നെ ഇടപാടുകൾ പൂർത്തിയാക്കാൻ കഴിയും എന്നതാണ് പ്രധാന സവിശേഷത. നിലവിൽ വ്യക്തികൾക്ക് മാത്രമാണ് സലാമയുടെ സേവനം ലഭിക്കുക. താമസിയാതെ കമ്പനികൾക്കും ലഭ്യമാവുന്ന രീതിയിൽ ഇതിന്റെ സേവനം വിപുലീകരിക്കുമെന്നും അൽ മർറി പറഞ്ഞു.

സങ്കീർണമായ അൽഗോരിതങ്ങൾ ഉപയോഗിച്ച് പ്രവർത്തിക്കുന്ന ഈ എഐ പ്ലാറ്റ്‌ഫോമിൽ ഓരോ വ്യക്തിയുടെയും ആവശ്യങ്ങൾക്കനുസരിച്ച നടപടിക്രമങ്ങളാണ് ലഭ്യമാകുക. വേഗത്തിലും കൃത്യമായുമുള്ള സേവനം പ്ലാറ്റ്‌ഫോം വാഗ്ദാനം ചെയ്യുന്നു. സ്മാർട്ട് ചാനൽ വഴിയും യുഎഇ പാസ് വഴിയും സലാമയുടെ സേവനം ലഭ്യമാകും. ഉപയോക്താവ് റെസിഡൻസി പെർമിറ്റ് പുതുക്കുന്നതിന് പ്ലാറ്റ്‌ഫോം ലോഗിൻ ചെയ്യുമ്പോൾ തന്നെ അപേക്ഷകന്റെ ഡാറ്റ സിസ്റ്റം സ്വയമേവ തിരിച്ചറിയുകയും അവരുടെ സ്‌പോൺസർഷിപ്പിന് കീഴിലുള്ള ആശ്രിതരുടെ വിശദാംശങ്ങൾ പ്രദർശിപ്പിക്കുകയും ചെയ്യും. ഓരോ ആശ്രിതന്റെയും താമസ കാലയളവും കാണിക്കും. ഇതിൽനിന്ന് പുതുക്കേണ്ട വ്യക്തിയെയും കാലയഴവും തെരഞ്ഞെടുത്താൽ പ്ലാറ്റ്‌ഫോം എഐയുടെ സഹായത്തോടെ ആവശ്യമായ വിവരങ്ങൾ വീണ്ടെടുക്കുകയും അഭ്യർഥന പ്രോസസും ചെയ്യും. പണം അടച്ചാലുടൻ പുതുക്കിയ വിസ ഉപഭോക്താവിന്റെ രജിസ്റ്റർ ചെയ്ത ഇമെയിലിലേക്ക് നേരിട്ട് അയയ്ക്കും. 10 മുതൽ 20 വരെ സെക്കന്റുകൾക്കുള്ളിൽ നടപടിക്രമങ്ങൾ പൂർത്തിയാക്കാൻ ഇതുവഴി സാധിക്കും.