ഒമാനിലേക്ക് കടക്കാൻ ശ്രമിച്ച 28പേരെ പിടികൂടി

മസ്‌കത്ത്‌ : കടൽവഴി അനധികൃതമായി ഒമാനിലേക്ക് കടക്കാൻ ശ്രമിച്ച 28 ഏഷ്യൻ പൗരന്മാരെ പൊലീസ് കോസ്റ്റ് ഗാർഡ് കമാൻഡ് അറസ്റ്റ് ചെയ്തു. കോസ്റ്റ് ഗാർഡ് നടത്തിയ ഒരു ഓപ്പറേഷനിൽ സീബിലെ വിലായത്ത് തീരത്തിനുസമീപം ബോട്ടിൽനിന്നാണ് സംഘത്തെ പിടികൂടിയത്.

നിയമവിരുദ്ധമായി രാജ്യത്തേക്ക് കടക്കാൻ ശ്രമിക്കുന്നതിനിടെയാണ് സംശയിക്കപ്പെടുന്നവരെ കസ്റ്റഡിയിലെടുത്തതെന്നും അവർക്കെതിരെ നിയമനടപടികൾ നിലവിൽ പൂർത്തിയാക്കുന്നുണ്ടെന്നും റോയൽ ഒമാൻ പൊലീസ് പറഞ്ഞു.

നിയമവിരുദ്ധമായ പ്രവേശനം, മനുഷ്യക്കടത്ത്, മറ്റ് സമുദ്ര സുരക്ഷാ ലംഘനങ്ങൾ എന്നിവ തടയുന്നതിനായി റോയൽ ഒമാൻ പൊലീസ് ഒമാന്റെ തീരപ്രദേശത്ത് പതിവായി സമുദ്ര പട്രോളിങ്‌ നടത്തുന്നുണ്ട്‌. സംശയാസ്പദമായ പ്രവർത്തനങ്ങൾ റിപ്പോർട്ട് ചെയ്തുകൊണ്ട് അധികാരികളുമായി സഹകരിക്കാൻ പൊതുജനങ്ങളോട് അധികൃതർ അഭ്യർഥിച്ചു.