ഇന്ത്യൻ സ്കൂൾ നിസ്‌വയിൽ അധ്യാപക സ്ഥലംമാറ്റം; രാജി, സുരക്ഷാ പ്രശ്നങ്ങൾ – രക്ഷിതാക്കൾ ആശങ്കയിൽ

നിസ്‌വ: ഇന്ത്യൻ സ്കൂൾ നിസ്‌വയിലെ പേരെന്റ്സ്ഫോറം പ്രവർത്തകർ സ്കൂൾ പ്രിൻസിപ്പാളിന് മെമ്മോറാണ്ടം സമർപ്പിച്ചു. അതിന്റെ പകർപ്പ് മാനേജ്മെന്റ് കമ്മിറ്റിക്കും നൽകിയിട്ടുണ്ട്. സ്കൂളിൽ അടുത്തിടെ നടന്ന ചില സംഭവവികാസങ്ങളെക്കുറിച്ചുള്ള ഗുരുതരമായ ആശങ്കകളാണ് മെമ്മോറാണ്ടത്തിൽ രേഖപ്പെടുത്തിയിരിക്കുന്നത്.

പരിചയസമ്പന്നരായ അധ്യാപകരെ യാതൊരു വ്യക്തതയും കൂടാതെ നിരന്തരം സ്ഥലംമാറ്റുന്നതായി രക്ഷിതാക്കൾ ആരോപിക്കുന്നു. ഇത്തരത്തിലുള്ള നടപടികൾ പഠനതുടർച്ചയെ ബാധിക്കുകയും അക്കാദമിക് സ്ഥിരത തകരുകയും ചെയ്യുന്നുവെന്നാണ് അവരുടെ നിലപാട്.

കൂടാതെ, നിരവധി പരിചയസമ്പന്നരായ അധ്യാപകർ കൂട്ടത്തോടെ രാജിവെച്ചതായും, ഈ രാജികൾ മാനസിക സമ്മർദ്ദം, പീഡനം, അസ്വസ്ഥമായ ജോലി അന്തരീക്ഷം എന്നിവയുമായി ബന്ധപ്പെട്ടതാണെന്നും രക്ഷിതാക്കൾ വ്യക്തമാക്കുന്നു. മുതിർന്ന അധ്യാപകരുടെ നഷ്ടം വിദ്യാർഥികളുടെ പഠന നിലവാരത്തെയും മാനസിക നിലയെയും ബാധിക്കാമെന്ന ആശങ്കയും അവർ ഉന്നയിച്ചു.

ദീർഘകാലമായി സേവനം ചെയ്ത ചില അദ്ധ്യാപകരെ പിരിച്ചുവിട്ടതും, തുടർന്ന് നടന്ന നിയമനങ്ങളിൽ സുതാര്യതയില്ലായ്മയുമാണ് മറ്റൊരു പ്രധാന വിഷയം. ഇത്തരത്തിലുള്ള നടപടികൾ സ്കൂളിന്റെ ദീർഘകാല സ്ഥിരതയെ ബാധിക്കാമെന്ന ആശങ്ക രക്ഷിതാക്കൾ പ്രകടിപ്പിച്ചു. സ്കൂൾ പരിസരങ്ങളിലെ അച്ചടക്കത്തിലും സുരക്ഷയിലും ഇടിവ് സംഭവിച്ചിരിക്കുന്നതായും രക്ഷിതാക്കൾ ചൂണ്ടിക്കാട്ടി. സുരക്ഷിതമായ പഠനാന്തരീക്ഷം ഉറപ്പാക്കേണ്ടത് സ്കൂളിന്റെ അടിസ്ഥാന ഉത്തരവാദിത്വമാണെന്ന് അവർ പറഞ്ഞു.

പ്രശ്നങ്ങൾ ചർച്ച ചെയ്ത് പരിഹാരം കാണുന്നതിനായി ഒരാഴ്ചയ്ക്കുള്ളിൽ പേരെന്റ്സ് ഓപ്പൺ ഫോറം വിളിച്ചുചേർക്കണമെന്ന് രക്ഷിതാക്കൾ ആവശ്യപ്പെട്ടു. ഇതുമായി ബന്ധപ്പെട്ട് സ്കൂൾ അധികാരികളുടെ ഔദ്യോഗിക പ്രതികരണം ഇതുവരെ ലഭ്യമായിട്ടില്ല.