ക്രൂഡ് ഓയിൽ തണുത്തു; ഓഹരി വിപണി കുതിച്ചു

മുംബൈ : ഇറാനിലെ സംഘർഷങ്ങൾക്ക് അമേരിക്ക അയവു വരുത്താൻ ഒരുങ്ങിയ സാഹചര്യത്തിൽ വിപണികൾ ശക്തമായ തിരിച്ചുവരവിനൊരുങ്ങുകയാണ്. നിഫ്റ്റി ഏകദേശം 200 പോയിന്റുകൾ ഉയർന്ന് 24,200 എന്ന നിലവാരത്തിന് അടുത്തേക്കും, സെൻസെക്സ് 400 പോയിന്റിലധികം ഉയർന്ന് 77,500 എന്ന നിലയിലുമാണ് ഇന്ന് വ്യാപാരം ആരംഭിച്ചത്.

നിലവിൽ സെൻസെക്സ് 435 പോയിന്റ് അഥവാ 0.57 ശതമാനത്തിൽ 77,454 എന്ന നിലയിലാണ്. നിഫ്റ്റി 149.10 പോയിന്റ് അഥവാ 0.62 ശതമാനത്തോടെ 24,180 എന്ന നിലയിലുമാണ് വ്യാപാരം നടത്തുന്നത്.

ക്രൂഡ് ഓയിൽ വിലയിലുണ്ടായ ഇടിവ് വിപണിക്ക് ഗുണകരമായി. ചൊവ്വാഴ്ച വ്യാപാരത്തിന്റെ രണ്ടാം പകുതിയിലുണ്ടായ മുന്നേറ്റം ഇന്നും തുടരാനാണ് നിഫ്റ്റി നിക്ഷേപകർ ലക്ഷ്യമിടുന്നത്. നിഫ്റ്റിയുടെ റേഞ്ചിൽ നിലവിൽ മാറ്റമില്ല.

ഇന്ന് നിഫ്റ്റി ബാങ്ക്, നിഫ്റ്റി ഐടി സൂചികകളാണ് പ്രധാനമായും ശ്രദ്ധിക്കേണ്ടത്. ബാങ്കിംഗ് സൂചിക 55,000ന് മുകളിൽ തുടരാൻ പാടുപെടുകയാണ്. ഐടി ഓഹരികളിലും സമീപകാലത്ത് ചാഞ്ചാട്ടം പ്രകടമാണ്. എൽ ആൻഡ് ടി, ഹീറോ മോട്ടോകോർപ്പ്, എസ്ആർഎഫ്, കോഫോർജ് (Coforge), പൂനാവാല ഫിൻകോർപ്പ് തുടങ്ങിയ കമ്പനികൾ പ്രവർത്തന ഫലങ്ങൾ കാത്തിരിക്കുകയാണ്. ബജാജ് ഓട്ടോ ഇന്ന് ഫലപ്രഖ്യാപനത്തോടൊപ്പം ഓഹരി തിരിച്ചുവാങ്ങലും പ്രഖ്യാപിക്കും.

കൂടാതെ മീഷോ (Meesho), പേടിഎം (Paytm), പിബി ഫിൻടെക് തുടങ്ങിയ പ്ലാറ്റ്‌ഫോം കമ്പനികളും, ജിസിപിഎൽ (GCPL), ബ്ലൂ സ്റ്റാർ, ഹെക്സാവെയർ, കാൻസായി നെറോലാക്, റാഡിക്കോ ഖൈത്താൻ തുടങ്ങിയ പ്രമുഖ കമ്പനികളും ഇന്ന് സാമ്പത്തിക ഫലങ്ങൾ പുറത്തുവിടും.